ریحانہ کے ایک بیان سے اسنیپ چیٹ کو ایک کھرب 10 ارب پاکستانی روپے کا نقصان کیسے ہوا؟

امریکی ریئلٹی ٹی وی اسٹار و معروف ماڈل کایلی جینر کے محض 18 الفاظ کی ایک ٹوئیٹ سے سوشل شیئرنگ ایپلی کیشن اسنیپ چیٹ کو ایک کھرب 30 ارب روپے (ایک ارب 30 کروڑ ڈالر) کا نقصان ہوا ہے۔

اور اب ایسا ہی معروف گلوکارہ ریحانہ نے بھی کردکھایا ہے جنھوں نے اسنیپ چیٹ کی مخالف فیس بک کی ملکیت میں موجود ایپ انسٹاگرام کے اسٹوریز فیچر میں ایک بیان پوسٹ کیا، جس کے باعث اسنیپ چیٹ کو ایک کھرب 10 ارب پاکستانی روپے سے زائد (لگ بھگ ایک ارب ڈالرز) کا نقصان ہوگیا۔

30 سالہ گلوکارہ کی جانب سے اسنیپ چیٹ پر تنقید اس وقت سامنے آئی، جب اس سوشل میڈیا ایپ میں ایک اشتہار کی میزبانی کی گئی جو کہ گھریلو تشدد کے حوالے سے تھا۔

ایک موبائل گیم ‘ Would You Rather ‘ کے اس اشتہار میں گلوکارہ ریحانہ اور ایک اور گلوکار کرس براﺅن کی تصاویر موجود تھیں اور کھیلنے والے سے پوچھا گیا تھا کہ وہ گلوکارہ کو تھپڑ ماریں گے یا گلوکار کو مکا؟

خیال رہے کہ کرس براﺅن وہ شخص ہیں، جنھیں 2009 میں اس وقت گرفتار کیا گیا تھا جب انہوں نے اس وقت اپنی گرل فرینڈ ریحانہ پر حملہ کیا تھا۔

ٹوئٹر پر تنقید کے بعد اسنیپ چیٹ نے اس اشتہار کو واپس لیتے ہوئے رسمی معذرت کرتے ہوئے کہا کہ یہ اس کی گائیڈلائنز کی خلاف ورزی پر مبنی تھا۔

اس کے بعد ریحانہ نے جمعرات کو انسٹاگرام اسٹوریز پر اسنیپ چیٹ کو شدید تنقید کا نشانہ بناتے ہوئے کہا ‘ میں نظرانداز کرنا پسند کروں گی، مگر میں جانتی ہوں کہ آپ بہرے نہیں، آپ نے ایسی چیز پر پیسے لگائے جو نہ بین الاقوامی سطح پر گھریلو تشدد کے شکار افراد کو شرمندہ کرے گی اور انہیں مذاق بنادے گی’۔

ان کا مزید کہنا تھا ‘ یہ میرے اپنے جذبات نہیں، بلکہ تمام خواتین، بچوں اور مردوں کے ہیں جو ماضی میں گھریلو تشدد کا ہدف بن چکے ہیں، آپ نے ہم سب کو نیچے گرادیا، شرم کرو’۔

انہوں نے اپنے مداحوں کو اس ایپ کو اپنے فون سے نکال پھینکنے کا مشورہ بھی دیا۔

اس پیغام کے بعد اسنیپ چیٹ کے حصص کی قیمت میں راتوں رات لگ بھگ 5 فیصد کمی آئی جس کے نتیجے میں کمپنی کو ایک بار پھر ایک کھرب روپے سے زائد کا نقصان اٹھانا پڑا۔

بعد ازاں اسنیپ چیٹ کے ایک ترجمان نے ریحانہ کے بیان پر ای میل کے ذریعے ردعمل دیتے ہوئے کہا یہ اشتہار قابل مذمت اور ہماری سروس میں نظر نہیں آنا چاہئے تھے، ہم اس بڑی غلطی پر معذرت کرتے ہیں، اس معاملے کی تحقیقات کی جارہی ہے کہ ایسا کیسے ہوا اور آئندہ ایسا ہونے سے روکنے کو یقینی بنایا جائے گا۔

خیال رہے کہ اس سوشل میڈیا ایپ کو اپنے ری ڈیزائن کی وجہ سے بھی لوگوں کی تنقید کا سامنا ہے، جس کے خلاف ہی کایلی جینر نے ٹوئیٹ کیا تھا۔