شریف خاندان کے خلاف ریفرنسز کی سماعت مکمل کرنے کے لیے مزید ایک ماہ کی مہلت


پاکستان کی سپریم کورٹ نے میاں نواز شریف اور ان کے خاندان کے خلاف اسلام آباد کی احتساب عدالت میں دائر مقدمات کی سماعت میں مزید ایک ماہ کی توسیع کر دی ہے۔

سپریم کورٹ نے اب احتساب عدالت کے جج کو نو جون تک ان ریفرنسز کی سماعت مکمل کرنے کا حکم دیا ہے۔

یہ دوسرا موقع ہے جب عدالت عظمیٰ نے احتساب عدالت کو سماعت کی تکمیل کے لیے مقررہ مدت بڑھانے کی اجازت دی ہے۔

اس سے قبل مارچ میں اس مدت میں دو ماہ کا اضافہ کیا گیا تھا۔

اس بارے میں پڑھیے

شریف خاندان کے مقدمے مکمل کرنے کی مدت میں توسیع

شریف خاندان ایک اور ڈیل کی تلاش میں ہے: سیاسی جماعتیں

نیب نے شریف خاندان کے خلاف تحقیقات کا آغاز کردیا

پاناما لیکس: ‘رپورٹ کی جلد نمبر چار شریف خاندان کے لیے خطرناک’

جسٹس عظمت سعید کی سربراہی میں سپریم کورٹ کے دو رکنی بینچ نے بدھ کو احتساب عدالت کے جج محمد بشیر کی طرف سے مقدمات کی سماعت کے لیے مزید وقت دینے سے متعلق درخواست کی سماعت کی۔

سماعت کے دوران ملزم نواز شریف کے وکیل خواجہ حارث نے ان مقدمات کی سماعت کے لیے تین ماہ کی توسیع کی درخواست کی جو مسترد کر دی گئی۔

خواجہ حارث نے عدالت میں دلائل دیتے ہوئے کہا کہ رمضان شروع ہونے والا ہے جس میں کارروائی کے لیے آدھا دن ہو گا۔ اُنھوں نے کہا کہ عدالت کی طرف سے ایک ماہ کی مہلت بہت کم ہے۔

خواجہ حارث کا کہنا تھا کہ ان کی طرف سے ٹرائل عدالت سے التوا نہیں مانگا جا رہا۔ نواز شریف کے وکیل کا کہنا تھا کہ ہر قانونی نکتے پر بحث کرنی ہے اس لیے جلدی میں ٹرائل مکمل کرنے میں غلطی ہوگی۔

سپریم کورٹ کے دو رکنی بینچ میں موجود جسٹس اعجاز الااحسن نے نواز شریف کے وکیل سے استفسار کیا کہ ایک ریفرنس میں تو دلائل مکمل ہوچکے ہیں اگر اس ریفرنس کا فیصلہ پہلے اور باقی دو کا بعد میں آ جائے تو کیا حرج ہے جس پر خواجہ حارث کا کہنا تھا کہ ان تینوں ریفرنس میں ایک جیسے گواہ ہیں لہٰذا ایسا کرنے سے ان کا دفاع متاثر ہوسکتا ہے۔

بینچ کے سربراہ کا کہنا تھا کہ نو جون تک اگر سماعت مکمل نہ ہوئی تو دوبارہ آ جائیے گا تو پھر اس معاملے کو دیکھیں گے۔

image_pdfimage_print
Comments - User is solely responsible for his/her words


اگر آپ یہ سمجھتے ہیں کہ ”ہم سب“ ایک مثبت سوچ کو فروغ دے کر ایک بہتر پاکستان کی تشکیل میں مدد دے رہا ہے تو ہمارا ساتھ دیں۔ سپورٹ کے لئے اس لنک پر کلک کریں

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 4908 posts and counting.See all posts by british-broadcasting-corp