وزن کم کرنے کا آسان ترین نسخہ، چیونگ گم چبائیے!
آپ نے وزن کم کرنے کے بہت سے نسخے آزمائے ہوں گے اور بہت سے مشورے حاصل کیے ہوں گے لیکن جاپانی محققوں کا خیال ہے کہ ‘وزن کم کرنا اتنا ہی آسان ہے جتنا چیونگ گم چباتے ہوئے پیدل چلنا۔’
انھوں نے خبررساں ادارے اے ایف پی کو بتایا کہ ان کی تحقیق میں 21 سال سے 69 سال کی عمر کے افراد شامل تھے اور جب وہ چیونگ گم چباتے ہوئے اپنی فطری چال سے چل رہے تھے ان کے دل کے دھڑکنے کی شرح بڑھ گئی۔
جاپانی تحقیق کاروں نے ویانا میں موٹاپے پر منعقدہ یورپین کانگریس میں اپنی تحقیق کے بارے میں بتایا کہ چیونگ گم چبانے کے عمل نے ہر عمر اور مرد عورت دونوں اصناف کے افراد پر خاطر خواہ فرق پیدا کیا۔
یہ بھی پڑھیے
صرف دس منٹ تیز واک، جلد موت سے دوری
ورزش کرو تو جسم کی چربی کہاں جاتی ہے؟
ان کا کہنا تھا کہ اس کا سب سے زیادہ اثر 40 سال سے زیادہ عمر کے مردوں پر نظر آیا جن کی چال میں بھی اضافہ ہوا اور توانائی صرف کرنے میں بھی۔
محققوں نے بتایا: ‘وزن کو موثر طور پر کنٹرول کرنے کے لیے چلنے اور چبانے کی ملی جلی ورزش اہم ہو سکتی ہے۔’
انھوں نے کہا کہ جاپان جیسے ممالک میں بطور خاص یہ زیادہ اہمیت کی حامل ہے کیونکہ وہاں زیادہ تر لوگ پیدل چلنے پر زیادہ زور دیتے ہیں۔
اس سے پہلے کی تحقیق میں یہ بات سامنے آئی تھی کہ آرام کی حالت میں چیونگ گم کھانے سے حرکت قلب میں اضافہ ہوتا ہے اور توانائی صرف ہوتی ہے۔
دی جرنل آف فیزیکل سائنس نامی جریدے میں شائع اس تحقیق کے مصنفین کا کہنا ہے کہ انھوں نے ہی پہلی بار چلتے ہوئے لوگوں پر چیونگ گم چبانے کی تحقیق کی ہے۔
اس تحقیق میں شامل 46 رضا کاروں نے 15-15 منٹ کی چہل قدمی کے دو ٹرائل دیے۔
یہ بھی پڑھیے
’ورزش کے دماغی اثرات اگلی نسلوں تک منتقل ہوتے ہیں‘
کیا زیادہ کھانے والا ہر شخص ضرور موٹا ہو گا؟
پہلے میں انھوں نے دو چیونگ گم لیں جن میں تین کلو کیلوریز تھیں اور پھر انھوں نے چہل قدمی کی، جبکہ دوسرے میں انھوں نے اتنی ہی کیلوری کا ایک پاؤڈر پی لیا جس میں وہی تمام اجزا تھے جو چیونگ گم میں تھے۔
اور پھر انھوں نے آرام کی حالت اور چلنے کی حالت میں حرکت قلب کی شرح ماپی اور یہ کام انھوں نے تیز چلنے اور قدرتی چال دونوں صورتوں میں کیا۔ اس کا بھی خیال رکھا کہ دونوں میں قدموں کی تعداد یکساں ہو۔
محققوں نے بتایا کہ چیونگ گم چباتے ہوئے چلنے میں تمام طرح کے شرکا کے قلب کی حرکت کی شرح خاطر خواہ اضافہ ہوا۔
ان کا کہنا ہے کہ دنیا بھر میں موٹاپا کسی وبا کی طرح پھیلتا جا رہا ہے اور اس کی وجہ سے دل کی بیماری، فالج، ذیابیطس، اور بعض کینسر کے امکان بڑھ جاتے ہیں اور ایسے میں موثر پرہیز اور علاج کی ضرورت ہے۔
- ’موت کا جزیرہ‘: اینتھریکس کے وہ خفیہ تجربے جن کے لیے برطانوی فوج نے سائنسدانوں کی مدد حاصل کی - 24/04/2024
- جمیلہ علم الہدیٰ: مشکل وقت میں شوہر کے ہمراہ ’گھریلو اخراجات اٹھانے والی‘ ایرانی صدر کی اہلیہ کون ہیں؟ - 23/04/2024
- ’مایوس‘ والدہ کی چیٹ روم میں اپیل جس نے اُن کی پانچ سالہ بیٹی کی جان بچائی - 23/04/2024
Facebook Comments - Accept Cookies to Enable FB Comments (See Footer).