میچ فکسنگ کے بارے بیان کے بعد عمر اکمل کی پی سی بی کے سامنے پیشی
پاکستان کے کرکٹر عمراکمل میچ فکسنگ کے حوالے سے اپنے حالیے بیان کے بعد پاکستان کرکٹ بورڈ کے انٹی کرپشن یونٹ کے سامنے پیش ہو گئے ہیں۔
پاکستان کرکٹ بورڈ نے کرکٹر عمر اکمل سے ان کے حالیہ ٹی وی انٹرویو کی وضاحت طلب کرتے ہوئے انھیں 27 جون کو پی سی بی کے انٹی کرپشن یونٹ کے سامنے پیش ہونے کے لیے کہا تھا۔
اس بارے میں جاننے کے لیے مزید پڑھیے
عمر اکمل کا مکی آرتھر پر نازیبا زبان استعمال کرنے کا الزام
تاہم عمر اکمل نے پاکستان کرکٹ بورڈ سے درخواست کی کہ وہ پیر کو ہی پی سی بی کے انٹی کرپشن یونٹ کے سامنے پیش ہونا چاہتے ہیں لہذا انہوں نے اپنا موقف دو روز پہلے ہی انٹی کرپشن یونٹ کو ریکارڈ کروا دیا ہے۔
عمر اکمل نے گذشتہ دنوں ایک ٹی وی چینل کو دیے گئے انٹرویو میں یہ انکشاف کیا تھا کہ 2015کے عالمی کپ میں بھارت کے خلاف میچ سے قبل انھیں مبینہ طور پر یہ پیشکش ہوئی تھی کہ وہ دو گیندیں نہ کھیلیں جس کے عوض انھیں دو لاکھ ڈالرز ملیں گے۔
عمراکمل نے اپنے انٹرویو میں یہ بھی کہا تھا کہ صرف یہی میچ نہیں بلکہ بھارت کے خلاف ہر میچ سے قبل انھیں پیسوں کی پیشکش ہوئی تھی کہ وہ کوئی بھی بہانہ کر کے وہ میچ نہ کھیلیں لیکن بقول ان کے وہ اپنے ملک سے مخلص ہیں لہذا ان سے اس موضوع پر بات نہ کی جائے۔
آئی سی سی نے بھی عمر اکمل کے اس انٹرویو کا نوٹس لیا ہے اور اس بارے میں تحقیقات شروع کردی ہے۔ آئی سی سی کا کہنا ہے کہ وہ جتنا جلد ہو سکے عمراکمل سے اس بارے میں بات کرنا چاہیں گی۔
عمراکمل کے اس انٹرویو کے بعد سب سے اہم سوال یہ سامنے آیا ہے کہ اگر انہیں اس طرح کی کوئی پیشکش ہوئی تھی تو کیا انھوں نے اسی وقت آئی سی سی یا پاکستان کرکٹ بورڈ کے انٹی کرپشن یونٹ کو مطلع کیا تھا یا نہیں؟
واضح رہے کہ آئی سی سی کے قوانین کے مطابق کھلاڑیوں پر لازم ہے کہ اگر اسے میچ فکسنگ یا اسپاٹ فکسنگ سے متعلق کوئی بھی پیشکش ہوتی ہے تو وہ اس بارے میں فوری طور پر مطلع کرے۔ ماضی میں ایسے متعدد کرکٹرز کو بروقت اطلاع نہ دینے پر سزا ہو چکی ہے۔
عمراکمل ڈانس پارٹیوں میں شرکت، تھیٹر کے باہر مارپیٹ اور ٹریفک وارڈن سے جھگڑے کی وجہ سے اکثر شہ سرخیوں میں رہے ہیں۔
گذشتہ سال چیمپئنز ٹرافی سے قبل ہیڈ کوچ مکی آرتھر نے انھیں فٹس ٹیسٹ پاس نہ کرنے پر انگلینڈ سے وطن واپس بھیج دیا تھا۔
کوچ مکی آرتھر پر تنقید کرنے پر پاکستان کرکٹ بورڈ نے ان پر تین میچوں کی پابندی اور جرمانہ بھی عائد کیا تھا جبکہ پاکستان سپر لیگ میں مایوس کن کارکردگی کی وجہ سے لاہور قلندر نے انھیں ٹیم سے باہر کردیا تھا۔
- جنوبی کوریا کے ’پہلے اور سب سے بڑے‘ سیکس فیسٹیول کی منسوخی: ’یہ میلہ خواتین کے لیے نہیں کیونکہ ٹکٹ خریدنے والے زیادہ تر مرد ہیں‘ - 24/04/2024
- ’نیتزہ یہودا‘: انتہائی قدامت پسند یہودی نوجوانوں پر مشتمل اسرائیلی فوج کے یونٹ کو ممکنہ امریکی پابندیوں کا سامنا کیوں ہے؟ - 24/04/2024
- برطانیہ میں مقیم جنوبی ایشیائی نوجوانوں کے ڈیٹنگ مسائل: ’ہمارے والدین کو نہیں معلوم کہ ہم خفیہ زندگیاں جی رہے ہیں‘ - 24/04/2024
Facebook Comments - Accept Cookies to Enable FB Comments (See Footer).