کٹھ پُتلی تماشے سے جمہور کو کیا سروکار؟


لیجئے ایک اور کٹھ پُتلی تماشہ لگنے جارہا ہے اور سیاسی منظر کیا کیا رنگ اختیار کرے گا کسی کو اندازہ ہو تو بتائے۔ لگتا ہے کہ آصف علی زرداری نے جو پتا کھیلا تھا کہ پہلے عمران خان کو ہٹاﺅ تو پھر بات ہوگی کو کم از کم پی ڈی ایم کی جماعتوں نے تھام لیا ہے اور اُنکی اُمیدوں کا مرکز اگر کوئی ہے بھی تو تحریک انصاف کے ممکنہ منحرفین اور اس کی اتحادی جماعتیں ہیں جن میں اب بلوچستان عوامی پارٹی کا کہنا ہے کہ اُنہیں اب ”اشارے“ ملنے بند ہو گئے ہیں اور انہیں اپنی جنگ خود لڑنے کی ”آزادی“ مل گئی ہے۔ جس مقتدرہ سے میاں نواز شریف، مولانا فضل الرحمان اور مریم نواز ”ووٹ کو عزت دو“ کے نعرے پہ کبھی مزاحمت پہ کاربند تھے، اُسے اب عدم اعتماد کے ووٹ کے لیے پسِ پشت ڈال دیا گیا ہے۔ اب اداروں سے شفقت بھری ”غیر جانبداری“ کی اُمیدیں باندھ کر پی ڈی ایم خاص طور پر مولانا فضل الرحمان اور شہباز شریف آصف علی زرداری کی سجھائی راہ پہ چل نکلے ہیں۔

اگرچہ حکومتی اتحادی پارٹیاں، مسلم لیگ ق ہو یا ایم کیو ایم پاکستان، ہوا کے بدلتے رُخ کا جائزہ لینے میں مصروف ہیں، اصل بے چینی تحریک انصاف کے دو تین درجن اراکین قومی اسمبلی اور پنجاب کے کئی درجن پی ٹی آئی کے اراکین صوبائی اسمبلی کی ہے جو پارٹی کی تیزی سے کھوتی ہوئی ساکھ کا بوجھ شاید زیادہ دیر تک اُٹھانے کے لیے تیار نہیں ہیں اور ان کی خوفزدہ نگاہیں 2023ءکے عام انتخابات کے انتظار میں منجمد رہنے کو تیار نہیں ہیں۔ لگتا یوں ہے کہ نواز لیگ میں ہاﺅس فل ہونے کے باعث یا تو پنجاب میں تحریک انصاف کے بطن سے بلوچستان طرز کی ایک باپ پارٹی جنم لے گی یا پھر پیپلزپارٹی کے پنجاب کے خالی دامن میں ان کے لیے جگہ ہی جگہ ہوگی۔

گجرات کے چوہدریوں کی ملنساری تو پنجاب میں ایک متبادل عارضی بندوبست کا اہتمام کرنے میں کارآمد ہوسکتی ہے لیکن ایم کیو ایم والے تحریک انصاف کے کراچی سے انخلا پر جس حصے کی اُمید کر رہے ہیں وہ پیپلزپارٹی کے ہوتے ہوئے برآتی نظر نہیں آتی۔ رہی بلوچستان کی باپ تو وہ اپنے باپ کے اشارے پہ اپنا قبلہ کبھی بھی بدل سکتی ہے۔ عمران خان کے خلاف عدم اعتماد کی تحریک اگر کامیاب ہوتی ہے تو ایسی حکومت جس کی کارکردگی پہ انہوں نے خود عدم اعتماد کردیا ہے جاتی ہے تو جائے، اُن کی بلا سے۔ جو ساڑھے تین برس کی نالائقیوں اور ناکامیوں کا ملبہ ان کے سر پہ پڑا ہے وہ کسی اور کے سر منڈھا جاتا ہے تو سیاسی طور ان کے لیے باعث طمانیت ہوگا اور وہ زیادہ خطرناک نہ بھی بنے تو چھوٹے موٹے خطرات تو پیدا کرہی سکیں گے۔

گو کہ عدم اعتماد کا ووٹ لانا حزب اختلاف کا آئینی و جمہوری حق ہے اور ایک سلیکٹڈ حکومت کو گھر بھیجنے کا اخلاقی جواز بھی بنتا ہے۔ لیکن سارے کے سارے آئینی و جمہوری اور اخلاقی جواز کی بنیاد اگر تحریک انصاف کے ٹکٹ پر منتخب ہونے والے اراکین اسمبلی کے غیر آئینی و غیر اخلاقی انحراف پہ رکھی جائے گی تو اس کے پلے آئینی و اخلاقی معنوں پہ کچھ بھی نہیں بچے گا۔ البتہ عمران حکومت کے اتحادی ٹوٹ کر علیحدہ ہوتے ہیں تو یہ ان کا حق ہے لیکن پنجاب میں ن لیگ گجرات کے چوہدریوں اور پیپلزپارٹی سندھ میں ایم کیو ایم پاکستان کو کہاں تک خوش کر پائیں گے بذات خود ایک گھمبیر معاملہ ہے۔

چلئے ان میں معاملات طے بھی ہوجاتے ہیں تو عمران حکومت کے مقابلے میں متبادل حکومت اور کارگر متبادل ایجنڈا اور منصوبہ کیا ہے جو موجودہ بحران کا قابل عمل اور موثر علاج کرپائے؟ اس عبوری دور کے عبوری انتظام کا کیا محدود مینڈیٹ ہوگا؟ اگر تو عمران حکومت کو فارغ کر کے، فوری انتخابات کا انعقاد بنیادی مقصد ہے تو اس کا آسان ترین راستہ یہ ہے کہ تحریک انصاف کو چھوڑنے کے لیے جو اراکین اسمبلی اتنے ہی بے چین ہیں تو وہ اپنی نشستوں سے مستعفی ہو جائیں (جو کہ اُن کا جمہوری حق ہے) تو وزیراعظم عمران خان اکثریت کھو بیٹھیں گے اور نئے انتخابات کروانے پڑیں گے۔ لیکن ابھی ایسا ہوتا نظر نہیں آ رہا اور اپوزیشن نمبر گیم کا غیر اخلاقی بوجھ اُٹھا کر کسی صورت جمہوری عمل کو آگے نہیں بڑھا پائے گی۔ سیاسی بحران کا ایسا سلسلہ چل نکلے گا کہ سیاستدانوں کے پلے کچھ نہیں رہے گا۔ وزیراعظم عمران خان پہلے ہی اپنی کابینہ کے اراکین کی کارکردگی کے حوالے سے بڑی بھاری اکثریت کو فیل قرار دے چکے ہیں اور جو دس حسن کارکردگی کے تمغہ کے حقدار ٹھہرے بھی ہیں تو اس میں مضحکہ خیز طور پر اول آئے بھی ہیں تو وزیر مواصلات مراد سعید۔

دراصل ہائبرڈ نظام اپنے اندرونی تضادات کے باعث ایک طرح کی اندرونی کھلبلی کی لپیٹ میں ہے۔ فریقین اپنی اپنی گیم میں مصروف ہیں۔ عدم اعتماد کے ووٹ کا چالا بھی وزیراعظم عمران خان کو چیک کرنے کے لیے سامنے آیا ہے اور اپوزیشن اپنی موضوعی ضرورتوں کے باعث اس کھیل میں کود گئی ہے جو جمہوری ٹرانزیشن کے ہائبرڈ نظام سے آئینی و جمہوری نظام کی جانب سفر کے لیے تباہ کن ہے۔ اور اس کا کھلے عام اعتراف کیا جا رہا ہے کہ مقتدرہ ہمیشہ سے سیاست میں رہتی ہے اور اس کے ساتھ مل کر ہی سیاست کی جا سکتی ہے۔ پاکستان کو اکانومسٹ نے جمہوری انڈکس میں 104 واں نمبر دیا ہے اور یہ ہائبرڈ نظام (نہ جمہوری، نہ آمریت) والے ملکوں میں شامل کیا گیا ہے اور ان میں بھی اس کا نمبر آٹھواں ہے۔ فریڈم ہاﺅس کے جائزے کے مطابق سیاسی حقوق ہوں یا پھر شہری آزادیاں پاکستان کی ریٹنگ 37/100 ہے۔ اب جو جھگڑا ہے تو اگلے سیٹ اپ پر۔

عمران خان کا اپنا منصوبہ ہے اور وہ ابھی سے اپنا کلا مضبوط کرنے کے لیے اپنے صوابدیدی اختیار کو استعمال کرنے کے لیے پر تول رہے ہیں۔ دوسری جانب مقتدرہ کے چیف ہیں اور اُن کا ادارہ اپنی اور آگے کی فکر میں ہیں۔ اپوزیشن تو اس کھیل میں کود چکی ہے اور عمران خان بھی ڈٹ گئے ہیں۔ اگرچہ کہ زمین وزیراعظم کے پاﺅں تلے سے کھسک رہی ہے، لیکن وہ اتنے بااختیار ہیں کہ کوئی بھی بڑا قدم اٹھا سکتے ہیں اور اس کا خمیازہ بھی بھگت سکتے ہیں۔ وزرائے اعظم اور مقتدرہ میں کشمکش کا یہ نظارہ ہم کئی بار کرچکے ہیں۔ وزیراعظم کے خلاف عدم اعتماد کامیاب کرانا آسان نہیں، سوائے ان کے جن کے ہاتھ میں فیصلہ کن ووٹوں کی پتوار ہے اور ایک وزیراعظم کا مقتدرہ سے پھڈا نیا نہیں ہے جس میں آخری نتیجہ میں وزیراعظم کو سنگین نتائج بھگتنا پڑے۔

صرف صاف شفاف پرچی جمہوریت ہی نہیں، آئینی، انسانی، سیاسی، معاشی اور عوامی حقوق والی جمہوریہ درکار ہے جو عوام کی حکمرانی کو تسلیم کرے اور عوام کی اُمنگوں کے مطابق عوامی ترقی اور پائیدار خوشحالی کو یقینی بنائے۔ پاکستان عظیم اندرونی بحران کی لپیٹ میں ہے اور یہ غیر پائیدار بنیادوں پہ کھڑا ہے۔ اسے نئے ویژنری لیڈرز اور عوامی کایا پلٹ کی ضرورت ہے۔ وگرنہ مملکت خداد یونہی اپنے لاینحل تضادات میں پھنسی رہے گی۔ پاور پالیٹیکس کا یہ کھیل اور کٹھ پتلی تماشے کا جمہوری اُمنگوں اور آئینی تقاضوں سے کیا سروکار؟

بشکریہ: بدلو


Facebook Comments - Accept Cookies to Enable FB Comments (See Footer).

امتیاز عالم

بشکریہ: روزنامہ جنگ

imtiaz-alam has 58 posts and counting.See all posts by imtiaz-alam

Subscribe
Notify of
guest
0 Comments (Email address is not required)
Inline Feedbacks
View all comments