الیکشن 2018: انتخابی بینرز پر آرمی چیف اور چیف جسٹس کی تصاویر، تحریک انصاف کا امیدوار نااہل

شہزاد ملک - بی بی سی اردو ڈاٹ کام، اسلام آباد


پاکستان کے الیکشن کمیشن نے انتخِابی بینرز پر فوج کے سربراہ جنرل قمر جاوید باجوہ اور سپریم کورٹ کے چیف جسٹس کی تصاویر لگانے پر امیدوار کو 25جولائی کو ہونے والے عام انتخابات میں حصہ لینے سے نااہل قرار دے دیا ہے۔

نااہل ہونے والے امیدوار ناصر چیمہ پاکستان تحریک انصاف کے ٹکٹ پر پنجاب کے شہر گوجرانوالہ سے صوبائی اسمبلی کے حلقہ پی پی53 سے حصہ لے رہے تھے۔

بی بی سی کے نامہ نگار شہزاد ملک کے مطابق ناصر چیمہ کی طرف سے بری فوج اور سپریم کورٹ کے چیف جسٹس کی تصاویر انتخابی بینرز پر آویزاں کرنے سے متعلق ایک درخواست الیکشن کمیشن میں آئی تھی۔

چیف الیکشن کمشنر جسٹس ریٹائرڈ سردار رضا خان نے اس درخواست کی سماعت کرتے ہوئے امیدوار ناصر چیمہ کو طلب کیا تھا۔

نامہ نگار کے مطابق چیف الیکشن کمشنر نے پاکستان تحریک انصاف کے امیدوار سے استفسار کیا کہ کیا آرمی چیف جنرل قمر جاوید باجوہ اور سپریم کورٹ کے موجودہ چیف جسٹس میاں ثاقب نثار ان کے رشتہ دار ہیں، جس پر ناصر چیمہ کا کہنا تھا کہ یہ دونوں شخصیات ان کے رشتہ دار نہیں ہیں۔

یہ بھی پڑھیں!

‘میں نے اپنی مخالفت کو ہی اپنی طاقت بنایا ہے’

الیکٹ ایبلز کون ہوتے ہیں؟

’ووٹ مانگنے نہ آئیں، اس نظام سے بیزار ہیں‘

چیف الیکشن کمشنر نے امیدوار سے استفسار کیا کہ تو پھر اُنھوں نے ان دو اہم شخصیات کی تصاویر اپنے انتخابی بینرز پر کیوں لگائی ہیں۔ جس پر پہلے تو ناصر چیمہ نے کہا کہ یہ بینرز اُنھوں نے نہیں تیار کروائے بلکہ اُن کے سپورٹرز نے تیار کیے ہیں۔

عمران

EPA
ملک میں عام انتخابات 25 جولائی کو منعقد ہوں گے

چیف الیکشن کمشنر کے استفسار پر پاکستان تحریک انصاف کے امیدوار نے یہ موقف اختیار کیا کہ چونکہ انتخابات سے قبل الیکشن کمیشن کی طرف سے ضابطۂ اخلاق جاری نہیں ہوا تھا اس لیے اُنھوں نے آرمی چیف اور چیف جسٹس کی تصاویر لگائی تھیں۔

امیدوار کا کہنا تھا جب الیکشن کمیشن کی طرف سے ضابطۂ اخلاق جاری ہوا اس کے بعد سے ان دونوں شخصیات کی تصاویر انتخابی بینرز سے ہٹا دی گئی ہیں۔

ناصر چیمہ نے اس ضمن میں تحریری جواب بھی جمع کروایا جسے چیف الیکشن کمشنر نے اس تحریری جواب کو مسترد کرتے ہوئے اُنھیں اس ماہ ہونے والے عام انتخابات میں حصہ لینے کے لیے نااہل قرار دے دیا۔

پاکستان تحریک انصاف کے امیدوار کے پاس الیکشن کمیشن کے فیصلے کو سپریم کورٹ میں چیلنج کرنے کا آپشن موجود ہے۔

الیکشن

BBC
image_pdfimage_print

Comments - User is solely responsible for his/her words

اگر آپ یہ سمجھتے ہیں کہ ”ہم سب“ ایک مثبت سوچ کو فروغ دے کر ایک بہتر پاکستان کی تشکیل میں مدد دے رہا ہے تو ہمارا ساتھ دیں۔ سپورٹ کے لئے اس لنک پر کلک کریں

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 4548 posts and counting.See all posts by british-broadcasting-corp