چوڑیاں بنانے والے ہاتھ چوڑیوں سے محروم
جیسے جیسے چوڑی پاڑہ قریب آتا جا رہا تھا گرمی اور ہمارے تجسس میں اضافہ ہو رہا تھا۔ حیدر آ باد کی شدید گرمی میں ہم لیاقت کالونی کے اندر چوڑی پاڑہ کی طرف جا رہے تھے۔
ہم بی بی سی اردو کی سیریز ‘بی بی سی اردو آن ویلز’ کے سلسلے میں پنجاب اور خیبر پختونخوا کے بعد سندھ پہنچے تھے۔ حیدرآباد میں چوڑیوں کی صنعت میں کام کرنے والی خواتین کے مسائل کو منظر عام پر لا نا ہمارے اِس شہر میں آنے کا مقصد تھا۔
ہم آگے بڑھ رہے تھے، گلیاں تنگ ہوتی جا رہی تھیں۔ کیمیکلز اور سیوریج کی کھلی نالیوں کی بو بھی ساتھ ساتھ چل رہی تھی۔ گلیوں میں جگہ جگہ ٹوٹی ہوئی چوڑیاں پڑی ہوئی تھیں۔ ہمارے ہاتھوں میں کیمرے دیکھ کر بچے اور بڑے ٹولیاں بنا کر ساتھ چلنے لگے۔
اسی بارے میں
چوڑیوں کی کھنک کے پیچھے خطرے کی گھنٹی
وہاں ہماری ملاقات نظیرہ زاہد سے ہوئی۔ میں نے دیکھا کہ دن میں دس گھنٹے چوڑیاں بنانے والی کے اپنے ہاتھوں میں چوڑیاں نہیں تھیں۔ میں نے نظیرہ سے پوچھا کیا انھیں چوڑیوں کا شوق نہیں ہے تو وہ کہنے لگیں کہ شوق تو ہے لیکن چوڑیاں بازار میں مہنگی ملتی ہیں اِس لیے وہ صرف خاص مواقع پر پہنتی ہیں۔
نظیرہ 25 سال سے یہ کام کر رہی ہیں۔ ساڑھے تین سو چوڑیاں بنانے کے انھیں 10 روپے ملتے ہیں۔ 350 چوڑیوں کے گھچے کو یہ لوگ توڑہ کہتے ہیں۔ دن میں دس توڑے بنا کر یہ خواتین 100 روپے کما لیتی ہیں۔
چوڑیاں پانچ مختلف مراحل سے گزر کر بازار پہنچتی ہیں۔ اِن مراحل کو جڑائی، صدائی، چکلائی، چٹک اور گنائی کہتے ہیں۔ اِن سارے مراحل میں 350 چوڑیوں پر مزدوری کے لحاظ سے 20 روپے لاگت آتی ہے۔ یہی چوڑیاں بازار میں 120 روپے درجن میں بکتی ہیں۔
چوڑی پاڑہ میں ہم نے چوڑیاں بننے کے کئی مراحل دیکھے ایک گھر میں بھٹی لگی ہوئی تھی جس میں چوڑیاں پکائی جا رہی تھیں۔ اِس عمل کو صدائی کہتے ہیں۔ جبکہ ایک اور گھر میں آگ کے چھوٹے چھوٹے شعلوں پر جڑائی ہوتے دیکھی۔
چکلائی کا عمل بھی دیکھا جو ایک طرح کوائلٹی کنٹرول کا کام ہے جس میں چوڑیوں کی سطح کو ہموار کیا جاتا ہے۔ یہ سب ایک سخت کام ہے جو پچاس ڈگری سینٹی گریڈ سے زیادہ درجۂ حرارت میں کیا جاتا ہے۔ اِس کا سبب بھٹی سے نکلتی گرمی اور ہر تین چار انچ کے بعد گیس کی لائن میں سے نکلنے والے شعلے ہوتے ہیں۔
میں نے نظیرہ سے پوچھا کہ اگر آج انھیں کوئی اور کام کرنے کا موقع ملے تو کیا وہ چوڑیاں بنانا چھوڑ دیں گی تو ان کا کہنا تھا کہ اب یہ ممکن نہیں۔
‘ہم نے ساری زندگی یہی کام کیا ہے اب کچھ اور نہیں کر سکتے۔’
ہمیں چوڑی پاڑہ میں شکیلہ خان لے کر گئیں تھیں جو ہوم بیس ووِمن ورکرز فیڈریشن کی سیکریٹری اطلاعات ہیں۔
شکیلہ نے بتایا کہ ساڑھے تین لاکھ افراد چوڑیاں بنانے کی صنعت سے منسلک ہیں جن میں زیادہ تر عورتیں اور بچے ہیں۔
شکیلہ کا کہنا تھا کہ چوڑیاں کی جڑائی کے دوران آگ کے شعلے پر کام کرنے کی وجہ سے اِن خواتین کی انگلیاں اور انگھوٹے کی کھال اتنی مرتبہ جلتی ہے کہ فنگر پرنٹس ختم ہو جاتے ہیں جس کی وجہ سے انھیں بایو میٹرکس میں مسائل ہوتے ہیں اور چھ مہینے انتظار کرنا پڑتا ہے کہ فنگر پرنٹس بحال ہو جائیں۔
‘اگر کوئی حادثہ ہو جائے یا مسلسل گرمی اور کیمیکلز کے بخارات کے سانس میں جانے سے بیماریاں ہو جائیں تو علاج کے لیے کوئی مدد نہیں کرتا۔ ٹھیکے دار مدد کو آتا ہے نہ ہی مالک جس کے لیے ہم یہ چوڑیاں بناتے ہیں۔’
شکیلہ کے مطابق اب ورکرز میں اپنے حقوق کے بارے میں شعور بڑھ رہا ہے۔
‘ ایک وقت تھا جب اِن خواتین کو اپنے حقوق کے بارے میں پتہ نہیں تھا لیکن اب ہمارا پیغام پھیل رہا ہے۔’
شکیلہ نے بتایا کہ اب کئی خواتین اپنے حقوق کے لیے مطالبات کرنے لگی ہیں۔ ملک میں عام انتخابات ہونے والے ہیں اور ہم اِس موقع پر اپنے علاقوں کے امیدواروں کے پاس جا رہے ہیں، ریلیاں نکال رہے ہیں، اپنے حقوق کے لیے مطالبے کر رہے ہیں۔ یہی موقع ہے کہ یہ لوگ ہماری بات سنیں گے۔
‘ہم چاہتے ہیں کہ مزدوروں سے متعلق جو قوانین ہیں اُن کا اطلاق چوڑیاں بنانے والی اِن مزدور خواتین پر بھی ہو۔ یہی ہماری جدوجہد کا بنیادی مقصد ہے۔’
لیکن ابھی یہ سب بہت دور نظر آتا ہے۔ مہینے بھر کی محنت کے بعد تقریباً ڈھائی ہزار روپے کمانے والی یہ خواتین ایک ایسے بھنور میں پھنسی ہوئی ہیں جس سے نکلنا کوئی آسان کام نہیں۔ حالات کے جبر نے انھیں اِسی کام پر لگایا ہوا ہے۔
چوڑیاں بنانے والی ایک اور مزدور جمیلہ کا کہنا تھا کہ مالکان تو امیر سے امیر تر ہوتے جا رہے ہیں لیکن مزدور اگر آٹھ آنے یا ایک روپیہ فی توڑہ بڑھانے کا مطالبہ کریں تو رد کر دیا جاتا ہے۔ ‘جو ہاتھ یہ چوڑیاں بناتے ہیں اُن کی کوئی قدر ہے۔’
حیدرآباد کے چوڑی پاڑہ میں خاندان کے خاندان اِس کام میں مصروف ہیں۔ چھوٹے چھوٹے بچے ہوش سنبھالتے ہی چوڑیاں سنبھال لیتے ہیں۔ سکول کے بجائے یہ گھریلو کارخانے اِن کا مقدر ہیں۔ میں جب میں چوڑی پاڑہ سے واپس آ رہا تھا تو مجھے ایسا محسوس ہوا کہ یہ نازک چوڑیاں نہیں بلکہ لوہے کی بیڑیاں ہیں جو اِن لوگوں کو ایک بہتر مستقبل کی طرف بڑھنے سے روک رہی ہیں۔
- امریکہ کی جانب سے فراہم کردہ 61 ارب ڈالر کی عسکری امداد یوکرین کو روس کے خلاف کیسے فائدہ پہنچائے گی؟ - 25/04/2024
- امریکی محکمہ خارجہ کی سالانہ رپورٹ میں عمران خان اور ان کی جماعت کے بارے میں کیا کہا گیا اور کیا یہ پاکستان کے لیے مشکلات کھڑی کر سکتا ہے؟ - 25/04/2024
- ہیلری کلنٹن کے ساتھ کام، غزہ جنگ پر ’خاموشی‘: غزہ کے لوگوں کے لیے میری حمایت پر کوئی کنفیوژن نہیں ہونی چاہیے، ملالہ یوسفزئی کا تنقید پر جواب - 25/04/2024
Facebook Comments - Accept Cookies to Enable FB Comments (See Footer).