کراچی سے گرفتار ہونے والے بھارتی جاسوس کا ’را‘ کا ایجنٹ ہونے کا اعتراف


\"jasoos\"گزشتہ ماہ کیماڑی سے گرفتار ہونے والے بھارتی جاسوس نے “را” کا ایجنٹ ہونے کا اعتراف کرلیا جب کہ عدالت نے ملزم کو 2 روزہ جسمانی ریمانڈ پر پولیس کے حوالے کردیا۔
ایک نجی ٹی وی چینل کے مطابق سی آئی ڈی پولیس نے اپریل 2016 میں گرفتار کئے گئے بھارتی جاسوس کو ریمانڈ کے لئے مقامی عدالت میں پیش کیا جہاں پولیس نے عدالت سے استدعا کی کہ ملزم سے مزید تحقیقات کے لئے اسے 14 روزہ ریمانڈ پرتحویل میں دیا جائے جس پرعدالت نے 2 روزہ جسمانی ریمانڈ منظور کرتے ہوئے ملزم کو 11 مئی تک پولیس کے حوالے کردیا۔
دوسری جانب ملزم کی گرفتاری کے حوالے سے بنائی گئی جوائنٹ انویسٹی گیشن ٹیم (جے آئی ٹی) کی رپورٹ بھی عدالت میں پیش کی گئی جس میں بتایا گیا کہ ملزم صدام جتوئی کو قانون نافذ کرنے والے اداروں نے کیماڑی سے گرفتار کیا جب کہ دوران تفتیش ملزم نے بھارتی خفیہ ایجنسی “را” کا ایجنٹ ہونے کا اعتراف کیا۔ رپورٹ کے مطابق صدام جتوئی نے ملکی سا لمیت کو نقصان پہنچانے کی کوشش کی اور اس نے کراچی کے حساس مقامات کیماڑی، فشری، کوسٹ گارڈ، ڈالمیا، کارساز، فیصل اور مہران بیس کی تصاویر بھارتی خفیہ ایجنسی کو ارسال کیں۔ جے آئی ٹی رپورٹ کے مطابق ملزم نے دوران تفتیش خفیہ اداروں کے اہلکاروں سے دوستی کا بھی اعتراف کیا۔


Comments

'ہم سب' کا کمنٹس سے متفق ہونا ضروری نہیں ہے۔ کمنٹ کرنے والا فرد اپنے الفاظ کا مکمل طور پر ذمہ دار ہے اور اس کے کمنٹس کا 'ہم سب' کی انتظامیہ سے کوئی تعلق نہیں ہے۔