روبینہ فیصل کا سچ
روبینہ فیصل کا سچ
؎ تیرا‘ میرا‘ سب کا سچ ہے
چکھنا ہے تو چکھ کر دیکھو
میٹھا‘ کھٹا‘ کڑوا‘ سچ ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
روبینہ فیصل
ایک ادیبہ ہیں
ایک افسانہ نگار ہیں
ایک جرنلسٹ ہیں
ایک کالم نگار ہیں
ایک نثری شاعرہ ہیں
وہ ایک ہمہ جہت شخصیت کی مالک ہیں
روبینہ فیصل ایک فنکارہ ہیں
ان کا میڈیم الفاظ ہیں
وہ اپنے الفاظ سے
اپنے خیالات‘ جذبات‘احساسات‘اعتقادات اور نظریات
اپنے دل سے
دوسروں کے دلوں تک پہنچاتی ہیں
کبھی ان کے الفاظ پھول بن جاتے ہیں کبھی کانٹے
کبھی وہ لوگوں کو آئینہ دکھاتی ہیں
کبھی سوچنے پر مجبور کرتی ہیں
کبھی خواب دیکھنے کی دعوت دیتی ہیں
اکثر اوقات وہ الجھے ہوئے مسائل کو سلجھا دیتی ہیں
کبھی کبھار سلجھی باتوں کو الجھا دیتی ہیں
روبینہ کی تحریروں میں
ایک جوش ہے
ایک جذبہ ہے
ایک ولولہ ہے
ایک آدرش ہے
ایک خواب ہے
وہ خواب امن کا ہے آشتی کا ہے انسانی ارتقا کا ہے
اسی لیے
اپنے تما تر نظریاتی اختلافات کے باوجود
ہماری دوستی ہے
ہمارے راستے جدا سہی
منزل ایک ہی ہے
اور وہ منزل انسان دوستی کی ہے
انسانیت سے محبت کی ہے
ایک پرامن سماج کی ہے
روبینہ سچ لکھتی ہیں
کبھی وہ سچ میٹھا ہوتا ہے کبھی کھٹا اور کبھی کڑوا
وہ اپنے سچ کے لیے قربانیاں دیتی ہیں
یہ علیحدہ بات
کہ آج کے دور میں
لوگ ابن انشاؔ کا مصرعہ گنگناتے ہیں
؎ سچ اچھا پر اس کے لیے کوئی اور مرے تو اور اچھا
میں نے روبینہ فیصل کو
ایک ادبی پودے سے درخت بنتے دیکھا ہے
اب اس درخت پر پھول بھی ہیں پھل بھی
اکثر پھل پکے اور میٹھے ہیں
بعض ابھی کچے ہیں
جو وقت کے ساتھ میٹھے ہو جائیں گے
روبینہ جان گئی ہیں انہیں کیا کہنا ہے کیا لکھنا ہے
انہوں نے ابھی یہ نہیں سیکھا کہ کیا نہیں کہنا کیا نہیں لکھنا
روبینہ کے ادبی سفر میں
پہلی منزل روایت تھی
دوسری منزل بغاوت تھی
اب وہ تیسری منزل کی طرف رواں دواں ہیں
وہ منزل دانائی کی ہے
اور دانائی کا خاموشی اور تنہائی سے گہرا رشتہ ہے
روبینہ فیصل سے میری ملاقاتیں
کبھی کبھار ہوتی ہیں اور مختصر ہوتی ہیں
مجھے وہ ملاقاتیں عزیز ہیں
کیونکہ مجھے ان کی دوستی عزیز ہے۔۔۔خالد سہیل ۔۔۔ستمبر ۲۰۱۸
- ’خدا نے کائنات کو تخلیق نہیں کیا‘: سائنسدان سٹیون ہاکنگ - 16/04/2024
- کیا آپ اپنے بچوں سے اپنی محبت کا اظہار کرتے ہیں؟ - 12/04/2024
- درویش، چاند اور سورج - 07/04/2024
Facebook Comments - Accept Cookies to Enable FB Comments (See Footer).