ریئیلٹی چیک: کیا چین شہریوں کے ہر قدم پر نظر رکھے ہوئے ہے؟

ریئیلٹی چیک - بی بی سی نیوز


China's social credit system

BBC

امریکی نائب صدر مائیک پینس نے چینی حکومت کے ایک سوشل کریڈٹ نظام کو متعارف کروانے کے منصوبے کو تنقید کا نشانہ بنایا ہے۔

ایک حالیہ تقریر میں انھوں نے کہا کہ ’چینی حکام ایک اورویلیئن نظام رائج کرنا چاہتے ہیں جو کہ انسانی زندگی کے تقریباً ہر شعبے کو کنٹرول کرے گا۔‘

چینی حکومت کا اصرار ہے کہ اس نظام سے اعتماد میں اضافہ ہوگا اور اس سے ان لوگوں کو فائدہ ہوگا جو ’اعتماد کو ٹھیس پہنچانے کے اقدامات کی رپورٹ کریں گے۔‘

تو کیا چین ایک نظام بنا رہا ہے جو کہ ان کی سماجی اور سیاسی زندگی کے ہر شعبے کو کنٹرول کرے؟

’بھروسہ نبھانے کی صلاحیت‘

یہ بات درست ہے کہ ہر چینی شہری کو اس نظام میں شریک ہونا پڑے گا جس میں سماجی رویے کی درجہ بندی ہوگی اور جو لوگ اس نظام سے ہم آہنگ نہیں ہوں گے ان کو نقصان ہو سکتا ہے۔

اب تک ملنے والے شواہد سے معلوم ہوتا ہے کہ یہ نظام مختلف شعبوں میں مداخلت کرے گا تاہم بہت سے چینی لوگ بظاپر اس نظام کے حامی ہیں۔

بہت سے ممالک میں ہر شخص کی مالی حوالے سے کریڈٹ سکور ان کے قرضے لینے کے صلاحیت یا کوئی کاروبار کھولنے پر اثر انداز ہوتی ہے۔

مگر 2020 تک متوقع چین کا مجوزہ سوشل کریڈٹ سسٹم اس سے کہیں زیادہ آگے جائے گا اور تمام شہریوں کی ’بھروسہ نبھانے کی صلاحیت‘ کی بھی درجہ بندی کرے گا۔

اسی طرح ایک سوشل کریڈٹ سکور کمپنیوں اور تنظیموں پر بھی لاگو ہوگا۔

یعنی حکومت نہ صرف یہ جانچ رہی ہے کہ کوئی کیا خریدتا ہے بلکہ یہ بھی کہ وہ سماجی طور پر کیا کرتے ہیں یا شاید سیاسی طور پر بھی۔

Surveillance cameras

AFP
اگر کسی ایسی جگہ پر سگریٹ نوشی کی جاتی ہے جہاں اس کی ممانعت ہے، تو ایسی صورت میں اس شہری کے خلاف منفی سکور ہوسکتا ہے۔

مثال کے طور پر اگر کسی ایسی جگہ پر سگریٹ نوشی کی جاتی ہے جہاں اس کی ممانعت ہے، تو ایسی صورت میں اس شہری کے خلاف منفی سکور ہوگا۔

شہریوں کو مثبت کام جیسے کہ فلاحی کاموں کے لیے اچھا سکور ملے گا۔

بنیادی طور پر یہ سکونگ نظام منفی سکور والوں کی ’بلیک لسٹ‘ اور مثبت سکور والوں کی لال فہرست تیار کرے گا۔

اس پروگرام کے پائلٹ مختلف اضلاع میں علاقائی حکومتیں ٹیسٹ کر رہی ہیں۔

مغربی چین کا رونچینگ علاقہ ایک ایسی مثال ہے جہاں شہریوں کو ایک ہزار کا ابتدائی سکور دیا گیا جو کہ لوگوں کی کارکردگی کے بعد کم (جیسے کہ ٹریفک چالان کی وجہ سے) یا زیادہ (جیسے کہ کسی ضرورت مند فیملی کی مدد کرنے سے) ہو سکتا ہے۔

گذشتہ سال چین کی عدالتِ عظمیٰ کو بتایا گیا کہ سماجی غلطیوں کی وجہ سے 61 لاکھ سے زیادہ لوگوں کو فضائی سفر کرنے سے روک دیا گیا تھا۔

اور یہ صرف گذشتہ پروازوں پر مسئلوں کی وجہ سے نہیں تھا، بلکہ دہشتگردی کے بارے میں جھوٹی اطلاعات پھیلانے، یا سگریٹ نوشی کی متعین جگہ کے باہر سگریٹ پینے کی وجوہات بھی شامل تھیں۔

Shopping mall in China

AFP
گذشتہ سال چین کی عدالتِ عظمیٰ کو بتایا گیا کہ سماجی غلطیوں کی وجہ سے 61 لاکھ سے زیادہ لوگوں کو فضائی سفر کرنے سے روک دیا گیا تھا

کیا کرنا ہے کیا نہیں؟

کسی کو ابھی یقین کے ساتھ پتا نہیں ہے کہ چینی حکومت کن چیزوں پر منفی سکور دے گی اور 2020 کے بعد یہ نظام کیسے چلے گا۔

سٹاک ہوم یونیورسٹی میں چینی امور کے ماہر یوہان لیگروسٹ کا کہنا ہے کہ ’مبصرین کو اصل میں معلوم نہیں کہ ہو کیا رہا ہے۔‘

تاہم لائڈن یونیورسٹی کے روگیئر کریمرز کا کہنا ہے کہ چینی حکومت انتہائی کنٹرول پسند ہے اور یہ نظام اسی سلسلے کی کڑی ہے۔ ان کا خیال ہے کہ یہ ایک نظام ہونے کے بجائے مختلف قسم کے نظاموں کا جوڑ ہوگا۔

کچھ ایسے کام جو مثبت ہو سکتے ہیں، ان میں شاید مندرجہ ذیل چیزیں ہوں گی:

  • خون کا عطیہ کرنا
  • فلاحی کاموں کے لیے پیسے دینا یا فلاحی تنظیموں کے لیے کام کرنا
  • ایسی اشیا خریدنا جو کہ صحت مند ہیں بجائے ایسے کھانوں کے جنھیں غیر صحت مند تصور کیا جاتا ہے۔

شاید منفی کام یہ ہو سکتے ہیں:

  • بدعنوانی
  • فراڈ
  • ٹیکس نہ ادا کرنا
  • سماجی توازن کے لیے نقصان دہ سمجھی جانی والی معلومات پھیلانا

شاید اس نظام میں یہ بھی دیکھا جائے گا کہ آپ کے دوست کون ہیں اور آپ کن کے ساتھ زیادہ وقت گزارتے ہیں۔

Protest against lending scheme in Beijing

Getty Images
سٹاک ہوم یونیورسٹی میں چینی امور کے ماہر یوہان لیگروسٹ کا کہنا ہے کہ ‘مبصرین کو اصل میں معلوم نہیں کہ ہو کیا رہا ہے۔’

اس سکور کا تعین کرنے کے لیے حکومت کو بہت زیادہ ڈیٹا کو چھاننا پڑے گا اور ماہرین کا خیال ہے کہ اس سلسلے میں چینی حکومت بے تہاشا مالی وسائل لگانے پڑیں گے۔

اس نظام میں ہوٹلوں کے ریکارڈ، شاپنگ کے ریکارڈ، سی سی ٹی وی کیمرے، فیشل ریکگنیشن ٹیکنالوجی، سبھی کا استعمال کیا جائے گا۔


Reality Check branding

BBC
image_pdfimage_print
Comments - User is solely responsible for his/her words


اگر آپ یہ سمجھتے ہیں کہ ”ہم سب“ ایک مثبت سوچ کو فروغ دے کر ایک بہتر پاکستان کی تشکیل میں مدد دے رہا ہے تو ہمارا ساتھ دیں۔ سپورٹ کے لئے اس لنک پر کلک کریں

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 5652 posts and counting.See all posts by british-broadcasting-corp