آدھے ننگے مردوں کو فٹ بال کھیلتے دیکھ کر عورتیں جنسی طور پر مشتعل ہوتی ہیں: ایرانی حکومت

ویب سائٹ deadspin.com کی ایک رپورٹ میں یہ بھی کہا گیا ہے، کہ ایران اور بولیویا کے دوستانہ فٹ بال میچ کے دوران اسٹیڈیم جانے والی خواتین کا محض دکھاوے کے لیے بطور خاص انتخاب کیا گیا تھا۔ ایرانی حکومت نے تقریباً چار دہائیوں سے خواتین کے اسٹیڈیم میں جا کر میچ دیکھنے پر پابندی لگا رکھی ہے۔ اب یہ بہت عام بات ہو گئی ہے کہ بعض اوقات خواتین میچ دیکھنے کے لیے ٹکٹ خریدتی ہیں، اور کسی نہ کسی طور اسٹیڈیم بھی پہنچ جاتی ہیں لیکن انھیں واپس بھیج دیا جاتا ہے، اور بعض اوقات تو انھیں گرفتار بھی کر لیا جاتا ہے۔

مارچ کے مہینے میں ایک میچ کے موقع پر بین الاقوامی فٹ بال فیڈریشن کے صدر گیانی انفانتینو بھی تہران میں موجود تھے اور اس میچ سے پہلے بھی کچھ خواتین کو گرفتار کیا گیا تھا۔ اس واقعے پر گیانی انفانتینو کو بھی تنقید کا نشانہ بنایا گیا کہ اسٹیڈیم میں ان کی موجودگی ایک طرح سے اس بات کی حمایت کے مترادف تھی کہ خواتین کو اسٹیڈیم میں داخل ہو کر میچ دیکھنے کی اجازت نہیں۔ انھوں نے اس بات پر وضاحت کرتے ہوئے کہا کہ ”ایرانی صدر حسن روحانی نے مجھ سے وعدہ کیا تھا کہ خواتین کو اسٹیڈیم میں میچ دیکھنے کی اجازت دی جائے گی۔ انھوں نے مجھے بتایا تھا کہ اس طرح کے ممالک میں ایسی چیزوں پر عمل درآمد میں وقت لگتا ہے۔“