ایشیا کپ ایمرجنگ کرکٹ ٹورنامنٹ، بھارتی ٹیم تمام میچز سری لنکا میں کھیلے گی


نیشنل سٹیڈیم

Getty Images
پاکستان میں گروپ بی کے چھ میچز کے لیے کراچی کے نیشنل اسٹیڈیم اور ساؤتھ اینڈ گراؤنڈ ڈی ایچ اے کا انتخاب کیا گیا ہے

پاکستان ایشیا کپ ایمرجنگ کرکٹ ٹورنامنٹ کے گروپ بی کے میچوں کی میزبانی کررہا ہے جبکہ گروپ اے کے میچز سری لنکا میں کھیلے جائیں گے۔

ایشیا کپ ایمرجنگ کرکٹ ٹورنامنٹ کی مکمل میزبانی پاکستان کو دینے کا فیصلہ گزشتہ سال اکتوبر میں ایشین کرکٹ کونسل کے لاہور میں منعقدہ اجلاس میں کیا گیا تھا لیکن گزشتہ ماہ بھارتی کرکٹ بورڈ نے اپنی ٹیم پاکستان بھیجنے سے انکار کر دیا جس کے بعد سری لنکا ٹورنامنٹ کا مشترکہ میزبان بنا ہے اور بھارتی ٹیم اپنے تمام میچز سری لنکا میں ہی کھیلے گی۔

یہ بھی پڑھیئے

ایشیا کپ: پاکستان بمقابلہ افغانستان، تصاویر میں

ایشیا کپ: انڈیا کو شارجہ میں کھیلنے سے کیا مسئلہ ہے؟

سنسی خیز مقابلے کے بعد انڈیا ایشیا کپ کا فاتح

کراچی میں نامہ نگار عبدالرشید شکور کے مطابق ٹورنامنٹ کے دونوں سیمی فائنلز تیرہ دسمبر کو کولمبو میں ہونگے جبکہ پندرہ دسمبر کو ہونے والے فائنل کی میزبانی بھی کولمبو کرے گا۔

گروپ بی میں میزبان پاکستان کے علاوہ بنگلہ دیش، ہانگ کانگ اور متحدہ عرب امارات کی ٹیمیں شامل ہیں۔

گروپ اے بھارت، افغانستان، اومان اور میزبان سری لنکا پر مشتمل ہے۔

ایشین کرکٹ کونسل کے قواعد و ضوابط کے مطابق اس ٹورنامنٹ میں ٹیسٹ رکنیت رکھنے والے پانچ ممالک پاکستان، بھارت، سری لنکا، بنگلہ دیش اور افغانستان کی ٹیموں میں گیارہ کرکٹرز تیئس سال سے کم عمر ہونگے جبکہ تیئس سال سے زائد عمر کے چار کھلاڑیوں کو ٹیم میں شامل کرنے کی اجازت ہے البتہ ہانگ کانگ، متحدہ عرب امارات اور اومان کی ٹیموں کے لیے عمر کی حد نہیں رکھی گئی ہے اور ان کی قومی ٹیمیں ٹورنامنٹ میں حصہ لے رہی ہیں۔

پاکستان میں گروپ بی کے چھ میچز کے لیے کراچی کے نیشنل سٹیڈیم اور ساؤتھ اینڈ گراؤنڈ ڈی ایچ اے کا انتخاب کیا گیا ہے۔

چھ دسمبر کو پاکستان کا مقابلہ ہانگ کانگ سے ہو گا اسی روز بنگلہ دیش اور متحدہ عرب امارات کی ٹیمیں مدمقابل ہونگی۔

سات دسمبر کو پاکستان کا دوسرا میچ متحدہ عرب امارات سے ہو گا جبکہ بنگلہ دیشی ٹیم ہانگ کانگ کا سامنا کرے گی۔

نو دسمبر کو گروپ بی کے آخری دن پاکستانی ٹیم بنگلہ دیش کا سامنا کرے گی جبکہ ہانگ کانگ اور متحدہ عرب امارات کی ٹیمیں آمنے سامنے ہونگی۔

image_pdfimage_print
Comments - User is solely responsible for his/her words


اگر آپ یہ سمجھتے ہیں کہ ”ہم سب“ ایک مثبت سوچ کو فروغ دے کر ایک بہتر پاکستان کی تشکیل میں مدد دے رہا ہے تو ہمارا ساتھ دیں۔ سپورٹ کے لئے اس لنک پر کلک کریں

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 6316 posts and counting.See all posts by british-broadcasting-corp