ثقافت کی افیون اور ہماری فلم انڈسٹری
![\"zeffer05\"](\"http://www.humsub.com.pk/wp-content/uploads/2016/02/zeffer05-300x274.jpg\")
پاکستان اور ہندوستان کے بیچ میں فلم کی تجارت پہ پابندی کے کیا فائدے اور کیا نقصانات ہوئے، اس کا جائزہ لینے سے پہلے اُس اعتراض پہ نظر ڈالتے ہیں، جو اٹھایا جاتا ہے۔ کہا جاتا ہے، کہ ہندوستان اور ہماری ثقافت میں فرق ہے، اس لیے اُن کے پروگرام ہماری ثقافت پہ اثر انداز ہوتے ہیں۔ ثقافت کی آج تک کوئی ایسی تعریف نہیں کی جا سکی، جس پہ سبھی متفق ہوں۔ بتایا جاتا ہے، کہ ایک سو ساٹھ سے زیادہ تعریفیں پائی جاتی ہیں؛ بعض تعریفیں عام مفہوم، اور بعض خاص مفہوم کی جانب اشارہ کرتی ہیں۔ E.b Taylor کے مطابق، \’علم، دانش، ہنر، افکار، عقائد، قوانین، مقررات، آداب، رسوم اور دستُورات کے مجموعہ کا نام ثقافت ہے۔\’
ہم اپنے گھر ہی کو دیکھیں اور پڑوسی کے گھر کی ثقافت کا معائنہ کرنے چلیں تو معلوم ہوگا، کہ اس میں کچھ نہ کچھ فرق ہے؛ اسی طرح باقی اہل محلہ کے گھروں میں مختلف \’ثقافت\’ دکھائی دے گی۔ ان سب کے مجموعے سے محلے کی ثقافت جنم لے گی۔ ایک محلے کی ثقافت دوسرے محلے کی ثقافت سے مماثل بھی ہو سکتی ہے، اور فرق بھی۔ ہر گاؤں، ہر شہر کی اپنی ثقافت ہے، اور ہر ملک، اور ہر خطے، برصغیر، براعظم کی اپنی ثقافت ہے۔ یوں دیکھا جائے تو پاکستان کی ثقافت سے مراد پاکستان کے ہر محلے ہر شہر، گاؤں، صوبے کی مشترکہ رسوم و رواج، علم، دانش، ہنر، افکار، عقائد، قوانین، مقررات، آداب، وغیرہ ہوں گے۔ یہ ایک جیسے بھی ہیں، اور ان میں فرق بھی پایا جاتا ہے۔ سبھی پاکستانی ثقافت کہلائے گی۔
پاکستان میں ہندو بھی بستے ہیں، اور عیسائی بھی؛ ان کی شادی بیاہ، اور دیگر رسومات پاکستانی رسومات پاکستانی ثقافت ہی کہلائیں گی۔ اس لیے جب ہم فلم یا ٹیلی ویژن ڈرامے میں ہندو یا عیسائی کی شادی کا منظر پیش کریں گے؛ تو ویسا ہی دکھائیں گے۔ اس پہ یہ اعتراض بے جا شمار ہوگا، کہ یہ پاکستانی ثقافت نہیں۔ پنجاب کے ہندو اور سندھ کے ہندو کی شادی کی رسومات میں مماثلت کے باوجود کہیں نہ کہیں اختلاف پایا جاتا ہوگا؛ جیسا کہ سندھ کے مسلمان اور پنجاب کے مسلمان کی غمی خوشی کی رسومات میں کچھ مماثلت اور کچھ فرق پایا جاتا ہے۔ ایسا ہی احوال پورے برصغیر کا ہے۔ جب ہم کہتے ہیں کہ ہندوستان کی ثقافت اور پاکستان کی ثقافت میں فرق ہے، تو یہ ایسا ہی فرق ہے، جیسا سندھ، پنجاب، کشمیر، گلگت، بلوچستان کی ثقافت کا فرق۔ جیسے سندھ کی ثقافت پنجاب کی ثقافت کے لیے خطرہ نہیں بنی، ویسے ہی ہندوستان کی ثقافت پاکستان کی ثقافت کے لیے خطرہ نہیں۔ کل مشرقی پاکستان اور مغربی پاکستان کی ثقافت کو \’پاکستانی ثقافت\’ کہا جاتا تھا، آج بنگلہ دیش اور پاکستان کی الگ ثقافت کہلاتی ہے۔ یہ پہچان کے لیے ہے، ورنہ مشرقی پاکستان کی ثقافت کل بھی وہی تھی، جو آج بنگلہ دیش کی ثقافت ہے۔ ایسے ہی جیسے 1947 سے پہلے برصغیر کی ثقافت ایک تھی۔ بالفرض کوئی کہتا ہے، یہ ایک نہیں تھی، تو آج پاکستان کی ثقافت بھی ایک نہیں ہے۔
فلم کی بات آتے ہی ہندوستانی ثقافتی یلغار کا غلغلہ بلند کرنے والوں نے انگریزی فلموں کی ریلیز پہ پابندی کا مطالبہ کبھی نہیں کیا۔ کیا امریکا، یا ہالی وُڈ کی ثقافت ہماری ثقافت کے لیے خطرہ نہ ہوئی؟ کیا ہندوستانی ثقافت اتنی مضبوط ہے، اور پاکستانی ثقافت اتنی کم زور کہ اُسے اپنی سے مضبوط ثقافت نگلنے جا رہی ہے؟
یہ بھی دیکھیے کہ 1965 کی جنگ سے پہلے اس نعرے کی گونج کہیں نہیں سنائی دیتی کہ پاکستانی اور ہندوستانی ثقافت الگ الگ ہیں۔ اس جنگ کے بعد دونوں ملکوں نے دوسری اشیا کے ساتھ فلموں کی تجارت کا سلسہ بند کر دیا، اور پھر جب کبھی کہا گیا کہ اس سلسلے کو بحال کیا جائے، تو یہ اعتراض پیش کر دیا جاتا کہ \’ہماری ثقافت کو خطرہ ہے۔\’۔ یہ آوازیں بظاہر ایک چھوٹے سے \’حلقے\’ کے حلق سے برآمد ہوتی ہیں، لیکن یہ چھوٹا سا \’حلقہ\’ دراصل انتہائی طاقت ور حلقہ ہے۔ جب ہندوستان سے آزادانہ تجارت کی بات چل نکلے تو یہ طاقتور حلقہ مذہب، ثقافت، ہندو مکاری کے نعرے لیے سامنے آ جاتا ہے۔ معصوم عوام ان کے دیئے نعروں کی جگالی کرنے لگتے ہیں۔ ہم سبھی جانتے ہیں، کہ پاکستانی بازاروں میں ہندی فلمیں کھُلے عام دستیاب ہیں؛ عوام بے جھجھک دیکھتے ہیں۔ اسی طرح ہندوستانی بازاروں میں پاکستانی ڈراموں کا کاروبار ہوتا ہے۔ دونوں ممالک کے بیچ میں ہُنڈی کے کاروبار کا وسیع نیٹ ورک ہے، لیکن ریاست، ریاست سے تجارت کی بات کرے، تو \’ثقافت\’ خطرے میں پڑ جاتی ہے؟ کیا دو ریاستوں کے قریب آنے سے ایک ریاست کی ثقافت خطرے میں پڑ جاتی ہے؟
اگر فلم ٹی وی ہی کُلی ثقافت ہے، تو مان لیجیے عوام نے اپنی ثقافت سے منہ موڑ لیا، لیکن دیکھیے کہ ریاست پاکستان نے اس ثقافت کو بچانے کے لیے کیا کِیا؟ کیا فلم اور کیا ٹیلی ویژن، ریاست ٹیکس تو دونوں سے لیتی ہے، لیکن انڈسٹری کے لیے کوئی موثر پالیسی بنانے میں ناکام رہی ہے۔ ہندوستانی ریاست نے اپنی فلم انڈسٹری کی ترویج کے لیے کیا اقدامات کیے، اس کا بیان الگ مضمون کا متقاضی ہے۔ یہاں یہ بحث نہیں۔ پاکستان میں شوبز سے وابستہ افراد یہ چاہتے ہیں، کہ انھیں وسیع مارکیٹ ملے؛ ایسا تبھی ہوگا، جب ریاستی سطح پہ ہندوستان کی فلم پاکستان میں آئے اور پاکستانی فلم ہندوستان جائے۔ چند شرپسندوں، نفرت کرنے والوں کے دباؤ میں آ کر برصغیر کے لوگوں کو یرغمال بنانا اور ثقافت کی گولی دینا؛ عقل و فہم سے بالاتر ہے۔ اردو یا ہندی کا اسکرپٹ الگ سہی، یہ ایک ہی زبان ہے۔ اس لیے اردو ڈراموں اور فلموں کی مارکیٹ وہی ہے، جہاں جہاں اس زبان کو سمجھنے والے بستے ہیں۔ انگریز، فرانسیسی، عرب، اور دوسرے اس زبان کے پروگرام تبھی دیکھیں گے، جب یہ ان کی زبان میں پیش کیے جائیں، نیز ان کا معیار بین الاقوامی معیار کو چھونے لگے۔ وسائل کیوںکر بہتر ہوں گے؟ تبھی جب کاروبار کو وسعت ملے گی۔ جن وسائل کے ساتھ یہاں کام ہو رہا ہے، ان وسائل کو مدِنظر رکھتے عکس و آہنگ کی پیش کش کو کیوںکر بہتر کیا جا سکتا ہے؛ ممکن ہی نہیں۔ حد تو یہ ہے، کہ پاکستانی فلموں کی Sound ہندوستان کے اسٹوڈیو میں تیار ہونے جا رہی ہے، ہمارے پاس اس سطح کے آلات ہی نہیں کہ ریکارڈ کی گئی آواز، سینما ہال کے \’معیار\’ کو پہنچتی ہو۔
ایسا کیوں ہوا؟ جب ہماری فلموں کی مارکیٹ محدود ہوتی گئی، تو جن نِت نئے آلات کی ضرورت تھی، وہی نہ منگوائے گئے؛ دنیا کہاں سے کہاں پہنچ گئی، اور ہم متروک کیمروں، ساؤنڈ ریکارڈر، ایکسپائر فوٹیج کو لے کر فلمیں بناتے رہے۔ آج ہمیں معیاری پوسٹ پروڈکشن کے لیے بنکاک یا ہندوستان کا رُخ کرنا پڑتا ہے۔ ایسا ایک دن میں تو نہیں ہوا۔ پاکستانی فلم کی مارکیٹ محدود ہونے سے بہت سے دیگر نقصانات کے علاوہ ایک نقصان یہ ہوا کہ جدید مشینیں نہ آئیں، تو ٹیکنیشن بھی نہ پیدا ہوئے۔ بعینہ جو کچھ یہاں ہوا، بالکل اس کے برعکس ہندوستان میں ہوا۔ نتیجہ بتاتا ہے، کہ وہ دُنیا کی نمایاں فلم انڈسٹری میں سے ایک ہے، جس ثقافت سے ہمیں خطرہ محسوس ہوتا ہے، وہ اسی \’ثقافت\’ کو دُنیا بھر میں دکھا رہے ہیں، اور ہماری فلم انڈسٹری ماضی کا مزار بن گئی ہے۔ ہم آج بھی \’ثقافت\’ کی افیون چاٹ رہے ہیں، اور بیچ رہے ہیں۔
- آئی ایم ایف، عید قربان اور قوم کی کھال - 01/07/2023
- فلم اور ٹی وی کے لیے لکھتے ہوئے کیا خیال رکھنا ہے - 20/06/2023
- فلم میکنگ شارٹ کورس - 30/04/2023
Facebook Comments - Accept Cookies to Enable FB Comments (See Footer).