پاکستان کے خلاف ایلومیناٹی کی بھیانک عالمی سازش کا انکشاف


پاکستانی قوم کو دھرنے پر لگایا گیا ہے۔ امریکی قوم ہفتے دس دن بعد ہونے والے صدارتی الیکشن میں کھوئی ہوئی ہے۔ اور ایک بھیانک عالمی سازش وقوع پذیر ہو رہی ہے جس کی طرف کوئی توجہ نہیں دے رہا ہے۔

کچھ عرصے پہلے ہم نے نہایت دلچسپی سے دیکھا کہ سدا کے سنجیدہ مصباح نے سینچری وغیرہ بنانے کے بعد سیلوٹ کرنا شروع کر دیا ہے۔ پھر دوسرے کھلاڑیوں نے بھی یہی روش اپنائی۔ اس کے بعد بات سیلوٹ تک ہی محدود نہیں رہی بلکہ کھلاڑیوں نے وہیں میدان میں ہی ڈنڈ پیلنے شروع کر دیے۔

اس پر ہمارا ماتھا ٹھنکا۔ پاکستان کی عام روش کے برخلاف مصباح الحق ایک نہایت سنجیدہ، متین اور رنجیدہ طبیعت کا کپتان دکھائی دیتا ہے۔ نہ تو اس نے کبھِی میدان کھلا پا کر شعیب اختر کی طرح جہاز بننے کی کوشش کی ہے، اور نہ ہی وہ کبھی شاہد آفریدی کی مانند گیند کو سیب کی مانند کچر کچر چبانے کی کوشش کرتا پایا گیا ہے۔ حتی کہ وہ دھرنا بھی نہیں دیتا ہے۔

ہم ابھی یہ بات سوچ ہی رہے تھے کہ قوم کی توجہ اس اہم معاملے کی طرف مبذول کرائی جائے کہ ہم سے پہلے ہی ہماری باخبر اور چوکنی قومی اسمبلی جاگ گئی۔ قومی اسمبلی کی قائمہ کمیٹی برائے بین الصوبائی رابطہ کے حکومتی رکن رانا محمد افضل نے چیئرمین پی سی بھی نجم سیٹھی کو پیش ہونے کا حکم دیا۔

وہ پہنچے تو ان سے جواب طلب کر لیا گیا کہ کھلاڑی جیت کر تو پش اپس لگاتے ہیں لیکن ہارنے پر خاموشی کیوں اختیار کرتے ہیں اور جشن کیوں نہیں مناتے؟ آخر یہ کھلاڑی پش اپس لگا کر دنیا کو کیا پیغام دینا چاہتے ہیں؟ جب کہ چوہدری نذیر نے رائے دی کہ کھلاڑی جیت کر شکرانے کے نوافل ادا کرتے تو زیادہ بہتر ہوتا۔ رانا صاحب نے اتفاق کیا کہ ویسے تو جسمانی حرکات صحت کے لئے مفید ہوتی ہیں، مگر نفل ادا کیے جاتے تو زیادہ اچھا ہوتا۔

نجم سیٹھی سے کوئی معقول جواب نہ بن پایا۔ کہنے لگے کہ ٹیم محض مصباح کی نقل کر رہی ہے جو کہ بیالیس سال کا ہونے پر ڈنڈ پیل کر اپنی جوانی ثابت کرنا چاہتا ہے، لیکن اب بورڈ کی جانب سے ٹیم کو مزید جوانی دکھانے سے منع کر دیا گیا ہے۔ بعد میں باہر نکل کر نجم سیٹھی نے ٹویٹ داغ دی کہ یہ تو کھلاڑی کی اپنی مرضی ہے کہ سجدہ کر کے خدا کا شکر ادا کرے یا ڈنڈ پیل کر طاقت دکھائے، کسی کو اس سے کیا۔

رانا افضل صاحب کی بات تو معقول ہے۔ ہم نے بھی کئی مرتبہ نوٹ کیا ہے کہ کھلاڑی جیتنے کے بعد خوشی سے اچھلتے کودتے ہیں اور کئی تو قلانچیں بھرتے بھی دکھائی دیتے ہیں، مگر ہار کر یہ جشن کیوں نہیں مناتے؟ اس وقت ان کی نانی کیوں مر جاتی ہے؟ ظاہر ہے کہ یہ کوئی سازش ہی ہے کہ کھلاڑی صرف جیت کر ہی خوشی مناتے ہیں۔

ہماری رائے میں چودھری نذیر کی بات بھی درست ہے کہ سینچری وغیرہ بنا کر کھلاڑی کو پش اپس لگانے کی بجائے وہیں پیڈ اتار کر نفل پڑھنے چاہئیں۔ جیسا کہ ایک دانشور، تبلیغی جماعت کے انضمام الحق کے کوچ بننے پر یہ بات پہلے ہی واضح کر چکے ہیں کہ آخرت میں یہ رنز کام نہیں آئیں گے، یہ سینچریاں وہاں بیکار ہوں گی، وہاں نوافل ہی مدد کریں گے۔ نجم سیٹھی کے ذریعے آئی سی سی پر دباؤ ڈالا جانا چاہیے کہ کرکٹ قوانین میں تبدیلی کی جائے اور میچ کے دوران کوئی کھلاڑی جس وقت بھی خوشی منانا چاہے، تو کھیل اس وقت تک روک دیا جائے جب تک کہ وہ شکرانے کے چار نفل ادا نہ کر دے۔

بہرحال تحقیق طلب معاملہ یہ ہے کہ وہ کون ہے جو ہمارے کھلاڑیوں کو بہکا رہا ہے؟ کون ہے جو اس وقت کسی کو کھلاڑیوں کے ذریعے یہ پیغام بھجوا رہا ہے جبکہ سب جانتے ہیں کہ ملک و قوم ایک نازک دور سے گذر رہے ہیں۔ کیا یہ پیغام عمران خان کو دیا جا رہا ہے، جو کہ مسلم لیگ ن کی حکومت کے اہم اراکین کے مطابق جمہوریت کے خلاف سازشیں کرنے کے منتظر ہیں اور کرکٹ کے ایمپائر سے ملے ہوئے ہیں؟

ابھی ہماری یہ سوچ بچار جاری تھی کہ اچانک ہمارے غدار اور دشمن ملک بنگلہ دیش کے کھلاڑی شکیب الحسن بھِی میچ کے دوران سیلوٹ کرتے دکھائی دیے۔ بعض گورے کھلاڑی بھِی ان کی پیروی کرتے رہے۔

اس سے ہمارا ماتھا ٹھنکا کہ یہ مقامی نہیں بلکہ کوئی بین الاقوامی معاملہ لگتا ہے۔ اس خدشے پر مہر تصدیق اس وقت ثبت ہو گئی جب نہ صرف یہ کہ بارک اوباما، بلکہ ان کی اہلیہ مشل اوباما بھی سرعام پش اپس لگاتے دکھائی دیے۔

کینیڈا کے وزیراعظم جسٹن ٹروڈو بھی یہی کرتے دکھائی دیے۔ لیکن سب سے بڑھ کر، نریندر مودی بھی فوجی سیلوٹ کرتے دکھائی دیے۔ کیا آپ نے پہلے کبھی سیاستدانوں کو رنگروٹوں کی طرح یہ سب کچھ کرتے دیکھا ہے؟

اس سازش کے سارے کرداروں پر غور کریں۔ بنگالیوں کے بارے میں مطالعہ پاکستان کی گواہی ریکارڈ پر موجود ہے کہ ان کو غدار پاکستانی ہندو استادوں نے بہکا کر بغاوت کرائی تھی۔ وہ ابھی تک پاکستان سے دشمنی دل میں پالے ہوئے ہیں۔

امریکہ، جس کے اصل حاکم صیہونی ہیں، وہاں کا نہ صرف یہ کہ تمام میڈیا، بلکہ تمام سیاستدان بھی صیہونیوں کے قابو میں ہیں اور ان کے اشاروں پر ناچتے ہیں۔

کینیڈا، جسے امریکہ کا ہی دوسرا نام کہا جائے تو بیجا نہ ہو گا۔

اور پاکستان کے ازلی دشمن بھارت کے نریندر مودی۔

یہ سلسلہ شروع کہاں سے ہوا تھا؟ اس بھیانک سازش کا اصل بانی بدنام زمانہ ملحد یہودی تنظیم ایلومیناٹی کا بانی، بروس لی تھا، جو سرعام ایک انگلی پر ڈنڈ پیلتا تھا۔ غالباً اب آپ کو یہ سمجھ بھی آ گئی ہو گی کہ ایمپائر کی انگلی کا تعلق مارشل لا سے جوڑنے کی وجہ کیا ہے۔

ان تمام شواہد کو دیکھ کر ہمارا یہی تجزیہ ہے کہ بدنام زمانہ ملحد یہودی تنظیم ایلومیناٹی، پاکستان کے خلاف گھیرا تنگ کر رہی ہے۔ ہمارے تجزیے کے مطابق یہ تمام ممالک پاکستان کے خلاف مشترکہ فوجی کارروائی کرنے کا مذموم منصوبہ بنا چکے ہیں۔ پہلا وار انہوں نے ہماری کرکٹ ٹیم پر کیا ہے اور اپنے کسی ایجنٹ کے ذریعے اسے گمراہ کر کے اسے نوافل سے ہٹا کر یہودی فوجی سیلوٹ اور ایلومیناٹی پش اپس پر لگا دیا ہے تاکہ پاکستانی قوم یہ اشارے دیکھ دیکھ کر ان کی عادی ہو جائے اور جب ایلومیناٹی کے پلان کے مطابق ان کی فوجیں یہ سیلوٹ کرتے ہوئے پاکستان میں داخل ہوں تو عوام ان دشمن فوجوں کو اپنی کرکٹ ٹیم سمجھ کر جوابی سیلوٹ کریں اور مزاحمت کرنے کی بجائے ڈنڈ پیلنے کے لئے وہیں لیٹ جائیں۔ انضی بھائی کو چاہیے کہ کرکٹ ٹیم کو ایلومیناٹی کی اس بھیانک سازش سے آگاہ کریں تاکہ وہ دوبارہ ایسی اشارے بازی کر کے قوم کی تباہی کا سامان نہ کرے۔

لیکن پاکستان کے یہ نادان دشمن یہ بات نہیں جانتے ہیں کہ پاکستان ایک ترنوالہ نہیں ہے بلکہ ایک ایٹمی قوت ہے۔ ہمارے میزائل بھارت کو تباہ کر ڈالیں گے اور اس کا نام و نشان مٹ جائے گا۔ اس کے جنگل جل جائیں گے، کھیت سوکھ جائیں گے، کھلیان جل اٹھیں گے، اس کے دریا خشک ہو جائیں گے، اس کے برف پوش ہمالیائی پہاڑ ننگے ہو جائیں گے اور وہاں سے پانی کا ایک قطرہ بھی انڈیا کے کسی دریا کو نہیں ملے گا۔

ہم کسی سے ڈرتے ورتے نہیں ہیں۔ اس لئے پاکستان کے ان سب دشمنوں یعنی اوباما، مودی، ٹروڈو اور ایلومیناٹی کی خیریت اسی میں ہے کہ سیلوٹ کرنے اور ڈنڈ پیلنے چھوڑ دیں اور پاکستان کے خلاف یہ سیلوٹ کرنے اور ڈنڈ پیلنے کی سازشیں بند کر دیں۔ ہم اٹھارہ کروڑ محب وطن عوام مل کر رانا افضل اور چودھری نذیر کو اس سازش کے بروقت پکڑنے پر ان کو سیلوٹ کرتے ہیں۔


ڈاکٹر شاہد مسعود کی تحقیق غلط نہیں ہو سکتی
ڈارک ویب کی خوفناک تنظیم اور ڈاکٹر شاہد مسعود کی دلیری
ایلومیناٹی۔ خوفناک سازشی باطنی تنظیم کی کہانی
ایلومیناٹی کے دس نشان
ملحد یہودی تنظیم ایلومیناٹی کی مسلم دشمنی اور دیگر سازشیں – ۱
ملحد یہودی تنظیم ایلومیناٹی کی مسلم دشمنی اور دیگر سازشیں – ۲
ایلومیناٹی۔ خوفناک سازشی باطنی تنظیم کی کہانی
پاکستان کے خلاف ایلومیناٹی کی بھیانک عالمی سازش کا انکشاف
پرویز ہود بھائی کی یونیورسٹی میں روحانی تعلیم کی بے جا مخالفت

عدنان خان کاکڑ

Facebook Comments - Accept Cookies to Enable FB Comments (See Footer).

عدنان خان کاکڑ

عدنان خان کاکڑ سنجیدہ طنز لکھنا پسند کرتے ہیں۔ کبھی کبھار مزاح پر بھی ہاتھ صاف کر جاتے ہیں۔ شاذ و نادر کوئی ایسی تحریر بھی لکھ جاتے ہیں جس میں ان کے الفاظ کا وہی مطلب ہوتا ہے جو پہلی نظر میں دکھائی دے رہا ہوتا ہے۔ Telegram: https://t.me/adnanwk2 Twitter: @adnanwk

adnan-khan-kakar has 1541 posts and counting.See all posts by adnan-khan-kakar

Subscribe
Notify of
guest
0 Comments (Email address is not required)
Inline Feedbacks
View all comments