سخن کے شوق میں توہین حرف کی نہیں کی (عرفان ستار)۔
سخن کے شوق میں توہین حرف کی نہیں کی
کہ ہم نے داد کی خواہش میں شاعری نہیں کی
جو خود پسند تھے ان سے سخن کیا کم کم
جو کج کلاہ تھے اُن سے تو بات بھی نہیں کی
کیھی بھی ہم نے نہ کی کوئی بات مصلحتاً
منافقت کی حمایت، نہیں، کبھی نہیں کی
دکھائی دیتا کہاں پھر الگ سے اپنا وجود
سو ہم نے ذات کی تفہیمِ آخری نہیں کی
اُسے بتایا نہیں ہے کہ میں بدن میں نہیں
جو بات سب سے ضروری ہے وہ ابھی نہیں کی
بنام ِ خوش نفسی ہم تو آہ بھرتے رہے
کہ صرف رنج کیا ہم نے، زندگی نہیں کی
ہمیشہ دل کو میّسر رہی ہے دولتِ ہجر
جنوں کے رزق میں اُس نے کبھی کمی نہیں کی
بصد خلوص اٹھاتا رہا سبھی کے یہ ناز
ہمارے دل نے ہماری ہی دل بری نہیں کی
جسے وتیرہ بنائے رہی وہ چشمِ غزال
وہ بے رخی کی سہولت ہمیں بھی تھی، نہیں کی
ہے ایک عمر سے معمول روز کا عرفان
دعائے رد ِ انا ہم نے آج ہی نہیں کی
Latest posts by ادب جدید (see all)
- قدیم دور کی جدید محبت کی کہانی - 01/04/2017
- عید گاہ: معصوم پوتے اور بوڑھی دادی کی پریم چند کہانی - 06/03/2017
- میرے گھر کا پتا (عزیز فیصل)۔ - 02/03/2017
Facebook Comments - Accept Cookies to Enable FB Comments (See Footer).