ہمارے جینئیس نوجوانوں کے خلاف ایک بھیانک سازش

عظیم دانشور شیخ ثنا اللہ گوندل لکھتے ہیں کہ

”ہم نے ایسے کئی نوجوان دیکھے ہیں جن سے ایف اے یا بی اے تو پاس نہیں ہوتا۔ لیکن اسلامی انقلاب لانے کی مکمل صلاحیت ہوتی ہے ۔ انڈیا/امریکہ/ اسرائیل کی نہ صرف تمام سازشیں سمجھتے ہیں بلکہ ان کا مکمل توڑ بھی ان کے پاس ہوتا ہے۔ بس امت ان کی صلاحیتوں سے فائدہ نہیں اٹھاتی“۔

ہم اس بھیانک راز کو افشا نہیں کرنا چاہتے تھے کہ ملک کے ذہین ترین نوجوانوں کے ٹیلنٹ کو کس طرح خاک میں ملایا جا رہا ہے اور پس پردہ رہ کر اس کا توڑ کرنے کی سعی کر رہے تھے۔ لیکن اب گوندل صاحب نے بات کھول ہی دی ہے تو ہم پورا ماجرا بتانے پر مجبور ہو گئے ہیں۔

در حقیقت ایف اے بی اے میں فیل کیے جانے کی وجہ ہی ان کی یہ غیر معمولی قابلیت ہے۔ ہم یہ تو جانتے ہی ہیں کہ یہود و ہنود کے ایجنٹ پاکستان کی بیوروکریسی میں چھائے ہوئے ہیں۔حکومت کو بھی وہ امریکہ وغیرہ کی مدد سے اپنے اشاروں پر ناچنے پر مجبور کر دیتے ہیں۔ ان کے ایجنٹ ہر جگہ موجود ہیں۔ حتی کہ ہائی سکول اور کالج میں بھی۔

آپ نے باہر کے ملکوں کے بارے میں سنا ہو گا کہ وہاں ٹیلنٹ ہنٹنگ سکاوٹ ہوتے ہیں جو گلی محلے سکول میں کھیلتے اچھے کھلاڑیوں کو شناخت کرتے ہیں اور اپنی ٹیم میں لے جاتے ہیں۔

ان نابکاروں نے پاکستان میں بھی اپنے ایجنٹوں کی ایسی ہی ٹیمیں چھوڑی ہوئی ہیں۔ وہ جب دیکھتے ہیں کہ کسی نوجوان میں ٹیلنٹ کا ایک ٹھاٹھیں مارتا سمندر موجزن ہے، تو پاکستان اور امت مسلمہ کو نقصان پہنچانے کی خاطر وہ اس کا پرچہ ہی ایسا مشکل سیٹ کروا دیتے ہیں جس کو حل کرنا کسی پی ایچ ڈی کے لئے بھی ناممکن ہو۔

لیکن وہ اس بات سے آگاہ ہیں کہ ہم پاکستانی کسی کے خواب و خیال سے بھی زیادہ ٹیلنٹڈ قوم ہیں۔ اس ناممکن ترین پرچے کے باوجود بھی کچھ جینئیس پاکستانی نوجوان اس پرچے کو حل کر لیتے ہیں تو اس کے توڑ کے لئے ممتحن کے طور پر بھی یہود و ہنود کا ایجنٹ بٹھا دیا جاتا ہے، جو ان کی بہترین کارکردگی کے باوجود ان کو فیل کر دیتا ہے۔

آپ اگر بے تحاشا برین واش کیے گئے طبقے میں سے ہیں تو اس حقیقت کو جھٹلانے کی کوشش کریں گے کہ یہ یہودیوں کی سازش ہے۔ مگر ہمارا آپ سے ایک ہی سوال ہے جس سے آپ ڈھیر ہو جائیں گے۔ آپ خود ہی انصاف سے بتائیں کہ ان سب جینئیس نوجوانوں کی غالب ترین اکثریت، انگریزی کے پرچے میں ہی کیوں فیل کی جاتی ہے؟

وجہ یہ ہے کہ انگریزی لازمی کے یہ پرچے نیویارک میں بنے ایک انتہائی خفیہ سینٹر میں بنائے جاتے ہیں جس میں انگریز، امریکی، یہودی اور بھارتی پروفیسر بیٹھے امت کے نوجوانوں کو فیل کرنے کی دن رات کوشش کر رہے ہیں۔

یہود و ہنود و نصاری کی ان بھیانک سازشوں کو ناکام بنانے کا ایک ہی طریقہ ہے۔ ان تمام جینئیس طلبہ کو ایف اے بی اے کرانے کی بجائے درس نظامی میں بھرتی کرا دینا چاہیے، کیونکہ صرف وہی ایک شعبہ ہے جہاں ان بکے ہوئے مکار ایجنٹوں کی پہنچ نہیں ہے۔ اس بھٹی میں تو لوہا بھی ڈالا جائے تو کندن بن کر باہر نکلتا ہے۔

• About
• Latest Posts

عدنان خان کاکڑ

عدنان خان کاکڑ سنجیدہ طنز لکھنا پسند کرتے ہیں۔ کبھی کبھار مزاح پر بھی ہاتھ صاف کر جاتے ہیں۔ شاذ و نادر کوئی ایسی تحریر بھی لکھ جاتے ہیں جس میں ان کے الفاظ کا وہی مطلب ہوتا ہے جو پہلی نظر میں دکھائی دے رہا ہوتا ہے۔
Telegram: https://t.me/adnanwk2
Twitter:@adnanwk

Latest posts by عدنان خان کاکڑ (see all)

• ولایتی بچے بڑے ہو کر کیا بننے کا خواب دیکھتے ہیں؟ - 26/03/2024
• ہم نے غلط ہیرو تراش رکھے ہیں - 25/03/2024
• قصہ ووٹ ڈالنے اور پولیس کے ہاتھوں ایک ووٹر کی پٹائی کا - 08/02/2024