ملحد یہودی تنظیم ایلومیناٹی کی مسلم دشمنی اور دیگر سازشیں – ۲

پہلا حصہ

امریکی صدر کینیڈی کا قتل

امریکی صدر جان ایف کینیڈی، امریکی اقلیتی مذہبی گروہ یعنی رومن کیتھولک فرقے سے تعلق رکھتے تھے۔ ملحد یہودی تنظیم ایلومیناٹی کے سان گمان میں بھی نہیں تھا کہ ایک اقلیتی فرد بھی شدید مذہب پرست امریکہ کا صدر بن سکتا ہے۔ لیکن امریکی ووٹر تین صدیوں سے بڈھے کھوسٹ صدر دیکھ دیکھ کر تنگ آ چکے تھے۔ اب تک ان کے ذہن پر ہالی ووڈ کی فلموں کا اثر بھی ہو چکا تھا۔ تو انہوں نے جب ایک ہیرو جیسے شخص کو صدارتی امیدوار دیکھا تو دین دھرم سب بھول کر اسے ووٹ دیے اور کینیڈی کو امریکہ کا صدر بنا دیا۔

کینیڈی ایک دلیر اور روایت شکن صدر تھا۔ اس نے ایک طرف تو روسیوں کو چیلنج کیا کہ تم نے کیوبا پر میزائل لگائے تو ایٹمی حملہ کر دوں گا، اور دوسری طرف اسرائیل کے توسیع پسندانہ عزائم کی توثیق کرنے سے انکار کر دیا۔

ملحد یہودی تنظیم ایلومیناٹی نے تنگ آ کر صدر کینیڈی کے قتل کی سازش تیار کی۔ کینیڈی کے امریکی صدارت سے ہٹنے کے محض تین برس بعد سنہ 1967 میں اسرائیل نے عرب ممالک پر اچانک حملہ کیا اور ایک طرف اردن سے بیت المقدس، شام سے گولان کی پہاڑیاں اور مصر سے صحرائے سینا تک چھین لیا اور اپنی حدود میں تین گنا اضافہ کر لیا۔

ایرانی انقلاب اور ایران عراق جنگ

مشرق وسطی میں اسرائیل کا واحد مقابل ایران ہی تھا جو کہ نہ صرف ڈھائی ہزار سال سے جنگوں میں اپنا لوہا منواتا رہا تھا، بلکہ اس کے پاس اتنا ہی جدید امریکی جنگی اسلحہ تھا جتنا اسرائیل کے پاس تھا۔ ملحد یہودی تنظیم ایلومیناٹی نے پہلے تو شاہ ایران کے خلاف انقلاب کی راہ ہموار کر کے ایران میں خانہ جنگی کی کوشش کی، مگر انقلاب کی کامیابی کے بعد اس نے عراق کے صدام حسین کے ذریعے ایران پر حملہ کروا دیا اور یوں دس برس کی اس جنگ میں بے عربوں سے پیسے لے لے کر عراق کو خوب اسلحہ بیچا اور لمبے نوٹ کمائے۔

جنرل ضیا الحق کا قتل

پاکستان کے عظیم مجاہد حکمران نہ صرف ایک عظیم ترین ملٹری لیڈر تھے بلکہ ان کے زمانے میں پاکستانی خفیہ ایجنسیاں بیک وقت کے جی بی، سی آئی اے، را اور موساد کو مسلسل شکست دیتی رہی تھیں۔ انہوں نے سوویت یونین کے افغانستان پر حملے کے بعد سوویت یونین کو اپنی فوجی اور جاسوسی حکمت عملی سے شکست فاش دی۔ وہ ملحد یہودی تنظیم ایلومیناٹی کے ہتھکنڈے بھی خوب سمجھتے تھے اور افغانستان سے سوویت یونین کے نکل جانے کے بعد ان کا ارادہ بنا کہ اب سوویت یونین سے مل کر امریکہ اور ملحد یہودی تنظیم ایلومیناٹی کو شکست دی جائے۔

جنرل ضیا کے آخری چند ماہ کے بیانات دیکھے جائیں تو ان کا سوویت یونین کی طرف جھکاؤ واضح دکھائی دیتا ہے۔ اس پر ملحد یہودی تنظیم ایلومیناٹی اور امریکہ لرز کر رہ گئے اور ان کو جنرل ضیا کے ہاتھوں اپنا خاتمہ سامنے ہی دکھائی دینے لگا۔ جنرل ضیا کو کل عالم اسلام بھی اپنا راہنما تسلیم کر چکا تھا اور ان کو اپنی فوجوں اور تیل کا کنٹرول دینے پر تیار تھا اور جیسے ہی جنرل صاحب ان مسلم ممالک کو رسمی سا حکم دیتے تو یہ سب ان کے قدموں میں ڈھیر کر دیا جاتا۔ تاریخ کے اس نازک موڑ پر ملحد یہودی تنظیم ایلومیناٹی نے اپنا مذموم کھیل کھیلا۔

جنرل صاحب سفر کے لئے سی ون تھرٹی نامی جہاز استعمال کرتے تھے جو کہ امریکی ملٹری انڈسٹریل کمپلیکس بناتا تھا اور اس کے پرزے وغیرہ بھی وہی سپلائی کرتا تھا۔ ہم جانتے ہیں کہ امریکی ملٹری انڈسٹریل کمپلیکس کی اصل مالک ملحد یہودی تنظیم ایلومیناٹی ہے۔ ملحد یہودی تنظیم ایلومیناٹی نے جنرل صاحب کے سی ون تھرٹی جہاز کے موبل آئل کے ڈبے تبدیل کر دیے اور ان میں اصلی امریکی موبل آئل کی بجائے پاکستانی مارکیٹ سے لے کر ملاوٹ شدہ کھلا موبل آئل ڈال دیا۔ دوران پرواز جنرل صاحب کے جہاز کا انجن اس ناقص موبل آئل کی وجہ سے سیز ہو گیا اور وہ گر کر تباہ ہو گیا اور یوں ملحد یہودی تنظیم ایلومیناٹی اور امریکہ کو کھل کھیلنے کا موقع مل گیا۔

نائن الیون

سنہ 1990 میں ملحد یہودی تنظیم ایلومیناٹی نے عراقی صدر صدام حسین کو ویسا ہی جھانسا دیا جیسا ہٹلر کو دیا تھا۔ اس نے صدر صدام کو یقین دلایا کہ اگر تم کویت پر قبضہ کر لو تو ہم کویت کے عراق میں ادغام کو امریکہ کی مکمل حمایت دلوائیں گے۔ صدام نے ان کی باتوں میں آ کر کویت پر قبضہ کر دیا۔ جواب میں ملحد یہودی تنظیم ایلومیناٹی نے تین درجن ممالک کی فوج کے ساتھ مشرق وسطی پر حملہ کیا اور وہاں مستقل فوجی اڈے قائم کر دیے اور اس جنگ کا خرچہ عرب ممالک سے وصول کیا۔

مگر ابھی ملحد یہودی تنظیم ایلومیناٹی کے غلام امریکہ کو وہ اندھی طاقت حاصل نہیں ہوئی تھی جو کہ دنیا پر مکمل قبضے کے لئے درکار تھی۔ اس لئے ملحد یہودی تنظیم ایلومیناٹی نے چند مسافر بردار جہاز کرائے پر لئے اور ان کو ریموٹ کنٹرول کے ذریعے امریکہ میں مختلف اہداف پر حملہ کرنے بھیجا۔ دو جہاز نیویارک کے ورلڈ ٹریڈ سینٹر سے ٹکرا گئے۔ ایک پینٹاگون کے خالی کمروں والے حصے سے ٹکرایا۔ وہائٹ ہاؤس کی طرف بھی دکھاوے کو ایک جہاز بھیجا گیا مگر اسے راستے میں تباہ کر دیا گیا۔

سوچنے کی کئی باتیں ہیں۔ ایک تو یہ کہ دجالی میڈیا ہمیں بتاتا ہے کہ جہازوں کی ٹکر سے لگنے والی آگ ایسی شدید تھی کہ فولاد تک پگھل گیا اور ورلڈ ٹریڈ سینٹر کے ٹوین ٹاور کے علاوہ چھوٹا ٹاور بھی تباہ ہو گیا، مگر دوسری طرف انہیں جہازوں کے ملبے سے ان ڈیڑھ درجن عرب ہائی جیکروں کے کاغذ اور پلاسٹک کے بنے ہوئے پاسپورٹ محفوظ رہے جن پر جہاز ٹکرانے کا الزام لگایا گیا تھا۔ مزید یہ کہ ورلڈ ٹریڈ سینٹر میں کام کرنے والے تین ہزار یہودی کیوں اس دن چھٹی پر تھے۔

مسلم ممالک کی موجودہ جنگیں اور دہشت گردی

بہرحال اس نام نہاد حملے کے بعد امریکہ نے جو جنگ کی آگ بھڑکائی ہے اس کے شعلے ہمیں افغانستان، پاکستان، عراق، لیبیا، یمن، شام اور ترکی میں بھڑکتے دکھائی دے رہے ہیں۔ عالم اسلام میں ایران، عراق، ترکی اور پاکستان کی فوجیں سب سے مضبوط مانی جاتی تھیں۔ ان سب ملکوں کو شدید دہشت گردی اور فوجی حملوں کا شکار کیا گیا۔ پاکستان اور ترکی تو اپنی مضبوط فوج کی وجہ سے مستحکم رہے مگر افغانستان، عراق، شام، لیبیا اور یمن ریت کی دیواروں کی طرح ڈھے گئے ہیں اور ملحد یہودی تنظیم ایلومیناٹی بہت حد تک اپنا عالمی حکمرانی کا ہدف حاصل کرنے میں کامیاب رہی۔

مشہور قوال امجد صابری

اس شدید انتشار کے دور میں پاکستانی قوم کے حوصلے جوان رکھنے میں ہمارے گلوکاروں کا بہت ہاتھ رہا۔ ہم جانتے ہیں کہ 1965 کی جنگ کی فتح میں بھی ملکہ ترنم نور جہاں کے ترانوں نے ایک اہم کردار ادا کیا تھا۔ دہشت گردی کی اس جنگ میں سب سے آگے استاد نصرت فتح علی خان آئے لیکن ان کو ملحد یہودی تنظیم ایلومیناٹی کی بنائی ہوئی گردے صاف کرنے والی ناقص ڈائلیسس مشین کے ذریعے راستے سے ہٹایا گیا۔ اس کے بعد استاد راحت فتح علی خان کو بالی ووڈ کی طرف بھیج دیا گیا۔ لیکن ملحد یہودی تنظیم ایلومیناٹی کی توقع کے برخلاف صوفی موسیقار گھرانے کے امجد صابری نے اپنی قوالیوں کے ذریعے قوم میں وحدت کا وہ جذبہ پیدا کیا جو کسی کی توقع سے بھی بڑھ کر تھا۔ ان کو بھی راستے سے ہٹا دیا گیا۔ کوئی کہتا ہے کہ بھتہ نہ دینے کی وجہ سے مارا گیا تھا، کوئی کہتا ہے کہ فرقہ واریت کے نام پر انہیں قتل کیا گیا، لیکن ہم جانتے ہیں کہ ملحد یہودی تنظیم ایلومیناٹی کی نظر میں ان کا جرم بہت سنگین تھا، وہ جرم تھا پاکستانی قوم کا حوصلہ بلند رکھنے کا، انہیں ملحد یہودی تنظیم ایلومیناٹی نے ہی شہید کیا ہے۔

ڈاکٹر شاہد مسعود کی تحقیق غلط نہیں ہو سکتی
ڈارک ویب کی خوفناک تنظیم اور ڈاکٹر شاہد مسعود کی دلیری
ایلومیناٹی۔ خوفناک سازشی باطنی تنظیم کی کہانی
ایلومیناٹی کے دس نشان
ملحد یہودی تنظیم ایلومیناٹی کی مسلم دشمنی اور دیگر سازشیں – ۱
ملحد یہودی تنظیم ایلومیناٹی کی مسلم دشمنی اور دیگر سازشیں – ۲
ایلومیناٹی۔ خوفناک سازشی باطنی تنظیم کی کہانی
پاکستان کے خلاف ایلومیناٹی کی بھیانک عالمی سازش کا انکشاف
پرویز ہود بھائی کی یونیورسٹی میں روحانی تعلیم کی بے جا مخالفت

• About
• Latest Posts

عدنان خان کاکڑ

عدنان خان کاکڑ سنجیدہ طنز لکھنا پسند کرتے ہیں۔ کبھی کبھار مزاح پر بھی ہاتھ صاف کر جاتے ہیں۔ شاذ و نادر کوئی ایسی تحریر بھی لکھ جاتے ہیں جس میں ان کے الفاظ کا وہی مطلب ہوتا ہے جو پہلی نظر میں دکھائی دے رہا ہوتا ہے۔
Telegram: https://t.me/adnanwk2
Twitter:@adnanwk

Latest posts by عدنان خان کاکڑ (see all)

• ولایتی بچے بڑے ہو کر کیا بننے کا خواب دیکھتے ہیں؟ - 26/03/2024
• ہم نے غلط ہیرو تراش رکھے ہیں - 25/03/2024
• قصہ ووٹ ڈالنے اور پولیس کے ہاتھوں ایک ووٹر کی پٹائی کا - 08/02/2024