اداکار حبیب کے دماغ کی شریان پھٹ گئی : حالت تشویشناک


\"habib\"پاکستان فلم انڈسٹری اور ٹی وی کے معروف اداکار حبیب الرحمان کو گزشتہ رات دماغ کی شریان پھٹنے پر مقامی ہسپتال منتقل کیا گیا تھا جہاں ان کا علاج جاری ہے تاہم کئی گھنٹے بعد بھی ان کی حالت انتہائی تشویش ناک ہے۔
ایک نجی ٹی وی چینل کے مطابق گزشتہ رات 77 سالہ اداکار حبیب کو دماغ کی شریان پھٹنے کے باعث انتہائی تشویشناک حالت میں اتفاق ہسپتال لایا گیا تھا جہاں ان کا علاج جاری ہے۔ ڈاکٹروں کا کہنا ہے کہ اداکار کو شوگر اور بلڈ پریشر کے امراض بھی لاحق ہیں، برین ہیمرج کی وجہ یہ دونوں امراض ہوسکتے ہیں، اس وقت انہیں انتہائی نگہداشت کے وارڈ میں رکھا گیا ہے، کئی گھنٹوں سے مصنوعی تنفس دیئے جانے کے باوجود ان کی حالت بدستور خراب ہے۔
1956 میں فلم لخت جگر سے اپنے کیرئر کا آغاز کرنے والے حبیب کی مشہور فلموں میں شہرت ، معصوم ، زہر عشق ، ہتھکڑی شامل ہیں جبکہ اداکار نے ٹی وی ڈراموں میں بھی اپنی صلاحتیوں کے جوہر دکھائے ان کا شمار ماضی کے نامور اور رومانٹک ہیروز میں ہوتا ہے، انہوں نے دو فلموں کی ہدایت کاری بھی دی۔ حکومت پاکستان کی جانب سے ان کی فنی خدمات کے اعتراف میں صدارتی تمغہ حسن کارکردگی سے بھی نوازا جاچکا ہے۔
واضح رہے کہ گزشتہ ہفتے ٹی وی کی اداکارہ کنول کی دماغ کی شریان بھی پھٹ گئی تھی اور وہ اب بھی لاہور ہی کے ایک ہسپتال میں زیر علاج ہیں۔


Comments

'ہم سب' کا کمنٹس سے متفق ہونا ضرور نہیں ہے۔ کمنٹ کرنے والا فرد اپنے الفاظ کا مکمل طور پر ذمہ دار ہے اور اس کے کمنٹس کا 'ہم سب' کی انتظامیہ سے کوئی تعلق نہیں ہے۔