پی ایس فائنل کی سکیورٹی پر مکمل تعاون کریں گے: آرمی چیف


وزیراعلیٰ پنجاب شہباز شریف نے آرمی چیف جنرل قمر جاوید باجوہ کو ٹیلی فون کیا ، ٹیلی فونک گفتگو کے دوران پاکستان سپر لیگ فائنل کی سیکیورٹی سے متعلق امور پر تبادلہ خیال کیا گیا، اس موقع پر آرمی چیف نے کہا کہ پی ایس ایل کی سیکیورٹی کےلیےفوج بھرپور تعاون کرے گی ، میگا ایونٹ میں سیکیورٹی کے لیے جو بھی چیزیں درکار ہوں ہمیں بتائی جائیں۔

اس سے قبل شہباز شریف کی سربراہی میں صوبائی کابینہ کمیٹی برائے امن وامان کا خصوصی اجلاس ہوا جس میں متعلقہ وزارتوں اور محکموں کے اعلیٰ  افسران کے علاوہ پاک فوج کے نمایندے بھی شریک ہوئے، اجلاس میں شائقین کواسٹیڈیم تک لے جانے کے لیے خصوصی بس شٹل سروس چلانے کا فیصلہ کیا گیا۔

اس موقع پر وزیراعلیٰ پنجاب نے کہا کہ ملک میں خوف و ہراس کی فضا ختم کرنا ہماری اولین ترجیح ہے، ہنگامی حالات میں ہمیشہ غیر معمولی اقدامات کرنے پڑتے ہیں، کابینہ کمیٹی امن وامان باقاعدگی سے تمام انتظامات کا جائزہ لے، متعلقہ ادارے اور محکمے آپس میں قریبی رابطہ رکھتے ہوئے فرائض سرانجام دیں، پی ایس ایل کے فائنل کا لاہور میں انعقاد پوری قوم کی خواہش ہے اور اس میں وزیراعظم اور آرمی چیف کی مشاورت اور معاونت بھی حاصل ہے۔ انہوں نے کہا کہ یہ پاکستان کی عزت کا معاملہ ہے اس پر حرف نہیں آنے دیں گے، لاہور میں پی ایس ایل فائنل کا انعقاد پورے ملک کے لئے باعث اعزازہے،اجتماعی کاوشوں سے میچ انتظامات کوخوب سےخوب تر بنانا ہے۔

وزیر اعلیٰ پنجاب نے ہدایت کی کہ اسٹیڈیم کے اندر اور باہر صفائی کے بہترین انتظامات ہونے چاہئیں، پورے لاہور کو برقی قمقموں سے روشن کیا جائے اور دوران میچ داخلی وخارجی راستوں پر بلاتعطل بجلی کی فراہمی یقینی بنائی جائے، شٹل سروس کے ذریعے شائقین کو اسٹیڈیم تک رسائی مفت حاصل ہوگی، ٹریفک کے متبادل انتظامات کرکے عوام کو آگاہ کیاجائے۔


Comments

'ہم سب' کا کمنٹس سے متفق ہونا ضروری نہیں ہے۔ کمنٹ کرنے والا فرد اپنے الفاظ کا مکمل طور پر ذمہ دار ہے اور اس کے کمنٹس کا 'ہم سب' کی انتظامیہ سے کوئی تعلق نہیں ہے۔