نیب سرمایہ کاروں کو تنگ کر رہی ہے: رانا ثناءاللہ
پنجاب کے وزیر قانون رانا ثنا اللہ کا کہنا ہے کہ نیب سرمایہ کاروں کو تنگ کررہی ہے اور اگر سرمایہ کار چلے گئے تو پھر یہاں ہم اور سکیورٹی گارڈز ہی رہ جائیں گے۔
پنجاب اسمبلی کے باہر میڈیا سے بات کرتے ہوئے رانا ثنا اللہ نے کہا کہ ہم نیب سے کسی سیاست دان کی انکوائری کا نہیں کہتے، نیب کا موثر کردار کرپشن کے خاتمے اور شفافیت کے لئے انتہائی ضروری ہے، نیب پر کوئی دباو¿ نہیں ہے، وزیر اعظم چاہتے ہیں کہ نیب مزید ذمہ داری سے کام کرے، اسی لئے انہوں نے نیب کو ذمہ داری سے کام کرنے کی ہدایت کی ہے، نیب کی جانب سے سرمایہ کاروں کو ہراساں کیا جا رہا ہے، اگر سرمایہ کار چلے گئے تو پھر ملک میں ہم اور سکیورٹی گارڈز ہی رہ جائیں گے۔
رانا ثنا اللہ نے کہا کہ میاں منشا کو بلاوجہ 2،2 گھنٹے نیب آفس میں بٹھایا جاتا ہے، 25 سال پہلے ٹرانزیکشن پرمیاں منشا کے خلاف کارروائیاں اچھی بات نہیں، وہ سمجھتے ہیں کہ ماضی کے کیسز کھولنے کے بجائے نئے کیسز کی تحقیقات ہونی چاہیے، ہماری حکومت کے وقت سے احتساب شروع کریں اور جھگڑا ختم کریں۔
صوبائی وزیر کا کہنا تھا کہ لاہور میں پہلے ہر دس پندرہ دن میں حملے ہوا کرتے تھے جب کہ کراچی میں پہلے کئی کئی لاشیں ملتی تھیں، سکیورٹی فورسز نے آپریشن ضرب عضب میں بڑی کامیابی حاصل کی ہے، جس کی وجہ سے حالات پہلے سے بہت بہتر ہیں،کئی دہشت گردوں کو کارروائیوں سے پہلے پکڑا ہے، پنجاب کے دیہی اور شہری علاقے محفوظ ہیں، کراچی کے حالات بھی بہتر ہوگئے ہیں دہشت گردی کے مکمل خاتمے تک اکا دکا واقعات ہوتے رہیں گے۔
Facebook Comments - Accept Cookies to Enable FB Comments (See Footer).