عورت کا تحفظ اور ملاؤں کی پریشانی


omaid پنجاب حکومت نے عورتوں پر تشدد کے خلاف جو قانون پاس کیا ہے اس کا رد عمل جن حلقوں کی جانب سے آرہا ہے اس پر کوئی تعجب نہیں ہوتا، اگر یوں کہئے کہ لگ بھگ تمام مردوں کی جانب سے آرہا ہے تو غلط نہ ہوگا۔ یہ قانون گزشتہ چند دنوں سے مسلسل بحث کا مرکز بنا ہوا ہے اور روز شام کو ٹی وی کی عدالتیں لگتی ہیں اور روز اس کے خلاف فیصلے دیے جاتے ہیں۔ ایک ٹی وی اینکر کا تو بس نہیں چلتا کہ کسی طرح اس قانون کے خلاف محاذ کھڑا کیا جائے۔ موصوف پہلے دن تو پینل میں دو عورتوں کو لے آئے اور اس بل کے خلاف قرآن سے دلائل دینے لگے، برا ہو جماعت اسلامی کے خورشید شاہ کا جو عام طور پر تو کوئی عقل کی بات نہیں کرتے مگر اس دن شاید مودودی صاحب کی کوئی کتاب پڑھ کر نہیں آئے تھے جو عقل سے کام لیتے ہوئے ان کی ہاں میں ہاں نہیں ملائی نیز بیبیوں نے بھی قرآن پڑھا ہوا تھا سو یہ بات تو چل نہیں سکی۔ اب اس دن کے بعد سے موصوف روز آدھا درجن مردوں کو بٹھا کر روز  اس بل کے خلاف عدالت لگاتے ہیں اور صاف پتہ چلتا ہے کہ کسی نے بھی بل نہیں پڑھا ہوا۔ یہی حال دوسرے پروگراموں میں ہی نظر آتا ہے۔

 یہ بھی یاد رکھنا چاہیے کہ جس دن بل اسمبلی میں پیش ہوا ایک سو پجھتر مرد ارکان اسمبلی میں موجود نہیں تھے۔ یہ بات کافی گھمبیر ہے کہ ایسی سوچ ہمارے حکمران طبقے میں پائی جاتی ہے۔ وہ تو بھلا ہو مشرف کا کہ اس نے اسمبلیوں میں عورتوں کی سیٹیں مختص کردیں جس سے عورتوں سے متعلق قوانین میں اضافہ دیکھنے میں آیا۔ یہ درست ہے کہ اکثر عورتیں اشرافیہ ہی سے آئی ہیں مگر عورتیں ہوں گی تو عورتوں کے بارے میں سوچیں گی۔ ڈکٹیٹر کے کسی بھی کام کی تعریف کرتے ہی میں اس کے باقی اقدامات، جن میں اقتدار پر شب خون مارنا شامل ہے، سے بری الذمہ ہونا ضروری سمجھتا ہوں۔

325496_73624133یہ سوچ کہ عورتوں پر ہاتھ اٹھانا مرد کا استحقاق ہے دراصل اس خیال سے جنم لیتی ہے کہ عورت ناقص العقل ہے اور مرد ذہنی طور پر عورت سے بلند ہے۔ اس سوچ کی نفی کرنی بھی ضروری ہے، قوانین خیالات سے نہیں لڑا کرتے بلکہ ان خیالات کے نتائج سے لڑا کرتے ہیں۔ ان قوانین کو جنہوں نے نافذ کرنا ہے وہ چاہے کوئی مرد ہو یا پھر کوئی عورت جب تک وہ مرد کی حاکمیت کے تصور اور اس سے پیدا ہونے والے خیالات سے متاثر ہے اس قانون کا وہی نتیجہ ہوگا جو منٹو کے افسانے میں نئے قانون کا بنا تھا، ڈھاک کے تین پات۔ اس سوچ کے خلاف ہمیں جنگ کی شروعات  ماؤں سے، استادوں سے اور بچوں سے کرنی پڑے گی۔ یہ جنگ اس کے بعد معاشرے کی ہر سطح پر لے جانی ہوگی وہ چاہے سیاستدان ہو، جج ہو، پولیس ہو یا مذہبی جبہ پوش۔

اس بل کے خلاف ملاؤں نے بھی محاذ کھڑا کر لیا ہے،  مولانا فضل الرحمن روز کہیں نا کہیں جا کر بیان داغ دیتے ہیں اور ٹانگ یہیں ٹوٹتی ہے کہ ملک کو لبرل نہیں بنانے دیں گے۔ ملاؤں کا مسئلہ صرف  اس خواتین پر بنائے گئے قانون کا نہیں ہے بلکہ یہ اس سمت کا مسئلہ ہے جس کی طرف پاکستان چل پڑا ہے۔  آخر ایک بل کے لانے پر نظریہ پاکستان کی بحث کیوں چھیڑی جا رہی ہے، آخر یہ کیا وجہ ہے کہ بڑے بڑے مولوی اس imagesصوبائی قسم کے بل پر برافروختہ نظر آتے ہیں، اصل کہانی کچھ اور ہی لگتی ہے۔ وزیراعظم کا ملک کو  لبرل جمہوریت بنانے کا بیان، اقلیتوں کے ساتھ دیوالی منانے کا
بیان، یہ ضرب عضب اور دیگر کارروائیاں، یہ نیپ اور مذہبی دہشت گردی کی بنیاد بنا کر ترامیم۔ ویسے یہ ایسا متضاد آئین ہے جس میں مذہب کا ہی تڑکہ ہے اور جو راہیں متعین کی گئیں ان کے نتائج یعنی مذہبی انتہاپسندی کی بدولت کی گئی دہشت گردی کا بھی ذکر اسی آئین میں آگیا ہے۔

اور اس سب سے بڑھ کر ممتاز قادری کی پھانسی! ممتاز قادری وہ دکھتی رگ تھی کہ جب بھی حکومت انتہا پسندی کے خلاف اقدامات کا ذکر کرتی تو اہل فکر اس کا ذکر چھیڑ دیتے کہ اگر واقعی آپ سنجیدہ ہیں تو یہ بھی کر کے دکھائیے۔  سو حکومت نے یہ قدم بھی اٹھا لیا اور اپنی طے کردہ سمت کی جانب بڑھنے کی سنجیدگی بھی ظاہر کر دی۔

یہ خیال کہ اس میں سنجیدگی کیسی تو جناب پچھلے ایک سال میں حکومت نے جن تین سو کے لگ بھگ لوگوں کو سولی چڑھایا ہے وہ سب پبلک ڈیمانڈ پر تھا۔ اس کی مثال ایسے ہی ہے کہ جیسے پرانے زمانے میں عوام کے مجمع میں مجرموں یا بادشاہوں کے مغضوبین کو  عوام کے شور و غوغا میں سولی چڑھایا جاتا تھا یا کوئی اور دردناک سزا دی جاتی تھی جس سے عوام کو ‘تفریح’ ملتی تھی مگر ممتاز قادری کی باری ایسا ہوا کہ عوام کے پر زور احتجاج کے دوران یہ عمل کیا گیا، ایسے کہ sirajul-haq-slams-women-protection-bill-1456677312-7595پاکستان کی اکثر پبلک کی ڈیمانڈ اس کے برعکس تھی۔ سو یہ کافی سنجیدہ معاملہ ہے اور ان جبہ پوشوں کے لیے تو بالکل جن کے کاروبار پچھلی کئی دہائیوں سے ریاست کی نظریہ مارکہ منڈی کے زیر اثر چل رہے تھے۔

عورتوں کے خلاف قانون کو اسی تناظر میں استعمال کیا جا رہا ہے اور وہ سارا غصہ اور سارا غم اور ساری فکر عوام الناس کو اس بل کے خلاف بھڑکا کر اپنا الو سیدھا کرنے کی کوشش کی جا رہی ہے۔ آپ دیکھئے کہ یہ سارے عوامل پیٹ کے ہاتھوں مجبور قوم کو جگانے کے لیے کافی نہیں تھے ہاں اگر یہ کہا جائے کہ اٹھو جاگو تمہارا گھر لٹا جاتا ہے تو شاید یہ وار کارگر ہوجائے۔ اسی لیے پچھلے کئی روز سے یہ ملّا  اور  ٹی وی شوز میں ان کے قرابت دار سوتے مسلسل شور و غوغا مچا رہے ہیں کہ اس سے ہمارا فیملی کا نظام درہم برہم ہوجائے گا، ہائے ہائے کیا اب مرد بھی کڑے پہنیں گے اور ایسے تمام نعرے جو جھوٹی مردانہ غیرت کو جگا سکیں، وہی غیرت جو عورتوں کو غلام بنانے کے لیے کام میں آتی ہے۔ اس ساری بات میں یہ بل کہاں جاتا ہے یہ دیکھنے کی بات ہے۔


Comments

FB Login Required - comments