مریم نواز کی لاٹری کھل گئی

ملک کی ایک بہت بڑی جماعت میں اس طرح ایک دم سے ابھر آنا اور  چھا جانا ایک بہت بڑی لاٹری ہی تو ہے۔

مگر لاٹری نکلنے کے لیئے پہلے لاٹری خریدنی پڑتی ہے  اور یہ لاٹری خریدنے میں تحریک انصاف نے مریم کی مدد کی۔

ملک میں مسلم لیگ کے لیئے ایسے حالات پیدا ہوئے ہیں کہ  مریم نواز کو ان  کرائیسز میں ابھر کے آنے کا موقعہ ملا اور ایک زیرک سیاسی ورکر کی طرح انھوں نے موقعے سے بھرپور فائدہ  یوں اٹھایا کہ بڑے بڑے سینئر لیڈر ان کو اپنی راہنما ماننے پر مجبور ہو گئے ہیں۔

پیپلز پارٹی کے رہنما اعتزاز احسن  نے بلکل صحیح کہا ہے کہ ،  مریم مسلم لیگ کو کونے سے باہر لیکر آئی ہے۔

سیاست میں خاموش رہنے سے بہتر ہے فیصلے کرنا  اور مریم  نے کافی فیصلے کیئے ہیں ۔

ہاں غلط یا صحیح یہ جدا بحث ہے۔  فیصلے غلط بھی ہو جاتے ہیں ، پھر ان کو ٹھیک کرنا بھی لیڈر کی ذمے داری ہوتی ہے۔

بحرحال مسلم لیگ نواز اور خاص طور پہ میاں فیملی کے سامنے درپیش  مشکل حالات  نے مریم نواز کو سیاست میں ایک  ایسی لیڈر کی  طرح ابھارا ہے کہ مسلم لیگ کے بڑے بڑے لیڈر ان کے  پیچھے کھڑے ہوتے ہوئے کمتر محسوس نہیں کرتے۔

سیاست میں کسی نئے لیڈر کی لانچنگ اگر مشکل حالات، مقدمات ، جیل اور تکلیف والے وقت میں ہو اور وہ اس  مشکل وقت پر ثابت قدم رہے تو کامیابی ان کے قدم چومتی ہے۔

بی نظیر بھٹو صاحبہ کے ساتھ ایسا ہی ہوا تھا۔ ورنہ  بھٹو صاحب کے بیٹے تو مرتضٰی اور شاھنواز تھے۔

ملکی سیاست میں ماضی قریب میں دو بڑے سیاسی خاندانوں نے اپنے اپنے جانشین متعارف کروائے ہیں۔

مگر بلاول بھٹو کی لانچنگ  اور مریم نواز کی لانچنگ میں حالات کا کافی فرق ہے۔

 بلاول بھٹو کو تقریر  لکھ کر دی جاتی ہے۔ جب  کبھی ان کو  بنا لکھے مائیک پر  بولنا ہوتا ہے تو یہ ان کے مشیر کے  لیئے پریشان کن  وقت ہوتا ہے  کہ کہیں کوئی غلط جملہ نہ بول دیں۔  ہاں اتنا ضرور ہے بلاول جب لکھ کردی گئی  تقریر کے بغیر بولتے ہیں تو ان کا لہجہ انتہائی عاجزانہ، دوستانہ  اور مٹھاس والا ہوتا ہے۔

بلاول کے بر عکس مریم مائیک پر خود بولتی ہیں، تھوڑا بولتی ہیں ،اعتماد کے ساتھ بولتی ہیں،  مضبوط بولتی ہیں اور بہادری سے بولتی ہیں۔

مریم نواز اور بلاول بھٹو یا ان کی پارٹیوں پر الزامات میں بھی تھوڑا فرق ہے۔  مریم نواز اور ان کے خاندان پر اوپر لیول کی کرپشن، منی لانڈرنگ کے الزامات ہیں ، ساتھ ہی پنجاب میں کافی کچھ   ڈلیور کرنے کا کریڈٹ ان کے کھاتے میں ہے۔

بلاول کے ساتھ ، ان کی حکومت کی طرف سے اوپر لیول کی کرپشن  کے ساتھ نچلی سطح پر انتہائی کرپشن اور بیڈ گورنس کے الزامات جُڑے ہوئے ہیں۔ جس کا اظہار پیپلز پارٹی کے مرکزی رہنما اعتزاز احسن نے لاھور کے ضمنی الیکشن میں پیپلز پارٹی امیدوار کی ضمانت ضبط ہونے پر کیا تھا کہ پیپلز پارٹی کی سندھ میں کارکردگی دوسرے صوبوں میں ہماری ہر شکست کے ساتھ جڑی ہوئی ہے۔

بہرحال ملک کے سیاسی حالات  آخرکار مقدمات یا جیل کے سفر کے بعد سدھر ہی جائیں گے۔ جس کو کہتے ہیں بُرا وقت گزر ہی جائے گا۔

پاکستان کی سیاست میں مرنے مارنے والے معاملات اب نہیں رہے۔ زیادہ سے زیادہ، جیل، نا اہلی، جائداد کی ضبطی ، وہ بھی تب  جب بات انتہا تک پہنچے ۔  اس کے بعد قیادت اور اقتدار۔

مریم نواز کو اب ایک لیڈر کی طرح سیاست کرنی ہے اور ساتھ  ہی یہ فیصلہ بھی کرنا ہے کہ ان کو پنجاب کی لیڈر بننا ہے یا پاکستان کی۔

مسلم لیگ کو سندھ میں کافی پذیرائی ملی تھی۔ نواز شریف پہلے پنجابی لیڈر تھے جن کو سندھ میں پذیرائی ملی تھی۔

مگر اقتدار میں آنے کے بعد جس طرح انہوں نے سندھ مسلم لیگ کو بے یارو مددگار چھوڑا اس نے سندھ میں مسلم لیگ کی جڑیں اکھاڑ دیں۔

قومی اسمبلی کے سابق اسپیکر الہی بخش سومرو، چار سابق وزرائے اعلیٰ  لیاقت جتوئی، غوث علی شاہ ، ممتاز بھٹو، ڈاکٹر ارباب رحیم  ، مورو کے جتوئی، ٹھٹہ کے سید، پیرصاحب پگارا سے اتحاد، جلال محمود شاہ کے ساتھ معاہدہ سب نواز شریف کے ساتھ تھے۔ مگر اقتدار میں آنے کے بعد  میاں صاحب نے  ان کی طرف نظر موڑ کر بھی نھیں دیکھا۔

بظاہر اس کی یہ وجہ بتائی جاتی ہے کہ یہ سب لوگ الیکشن ہار گئے تھے۔ یہ بات صحیح ہے کہ یہ لوگ الیکشن ہار گئے تھے مگر انہوں نے مقابلہ خوب کیا تھا۔ الیکشن پیپلز پارٹی کی حامی نگراں حکومت میں ہونے کے باوجود ان سب نے لاکھوں ووٹ لیئے تھے۔

مگر سندھ کے ان لیڈروں کا کہنا ہے کہ میاں  صاحب نے زرداری سے کیئے گئے معاہدے کے تحت کہ پیپلز پارٹی پنجاب میں سرگرم نہ ہو ہم سندھ میں کچھ نھیں کریں گے کے لیئے ان سب کا سیاسی مستقبل تاریک کردیا۔

بحرحال اب مریم نواز کو نئی صف بندی کرنا ہو گی اور ملکی لیول کی سیاست کرنی ہے تو پیپلز پارٹی کے سیاسی جوڑ توڑ والے ہتھکنڈوں  کے ساتھ کوئی  لین دین رکھنے کے بجائے صاف اور اپنے ساتھ کھڑے ہونے والے ساتھیوں کو لیکر چلنے کی سیاست کرنی ہوگی۔