پنجاب دی سیاسی ونڈ


ن لیگ دی پالیسی وی تے صاف چھپتے بھی نہیں سامنے آتے بھی نہیں والی اے۔ ن لیگ اینٹی تے پرو پنجاب ونڈ دوہنواں دھڑیاں دی حمایت نہیں گواناں چاہندی۔ پئی اے غلط گل اے تے ایس دا سدھا سدھا مطلب اے ہے کہ ن لیگ پنجاب توں ودھ سیاست بچاون دے چکر وچ اے۔ پر ن لیگ نوں جان لینا چاہی دا ک جے پنجاب ای نا رہیا تے ن لیگ کتھے ہوسی۔ لہذا ن لیگ نوں پنجاب دی ونڈ دی کھل کے مخالفت کرنی پینی چاہے پنجاب کارڑ سمجھ کے کرے۔ ایس ویلے اک سچے پنجابی دی روح پنجاب سی ونڈ دا سن کے ای تڑپ رہی اے۔ پئی جے کر پنجاب دی ونڈ سیاسی تے لسانی نہ ہوئے تے اوس توں پہلے کراچی تے حیدر آباد ( جتھے دے حالات نوں ویکھیا جاوے تے واقعی اک وکھرےصوبے دی لوڑ ہے)، بلوچستان( جتھے زیادہ رقبے دے کارن نظم و نسق تے سہولیات دی فراہمی وڈا مسئلہ ہے تے بہتر ہے کہ مکران تے ریاست قلات وغیرہ نوں وی صوبے دے طور تے بحال کیتا جاوے کیونکہ بلوچستان رقبے دے لحاظ نال سب توں وڈا صوبہ) تے فاٹا ( جو کہ ایس وقت مرکز دے انتظام و انصرام چہ ہے تے انتظام و انصرام دی بہتر سہولیات ہالے تیک اوتھے بہم نہیں اپڑ رہیاں ) نوں وی صوبہ قرار دتا جائے تے گل ساڈی سمجھ آندی اے تے جیکر صرف مقصد قومی اسمبلی وچ پنجاب دا زور توڑنا ہے تے فیر پنجابییاں نوں پختون تے سندھی سیاست دا بائیکاٹ کرنا پینا۔

پر جدوں تسی ہک پاسے تے فاٹا نوں خیبر پختون خواہ دا حصہ بنا کے صوبے دا رقبہ تے آبادی ودھاون دے گل کردے اوہ تے سندھ دی ونڈ دی گل تے مرسوں مرسوں سنڈھ نا ڈیسوں دی راٹ لا دیندے اوہ تے بلوچستان دی ونڈ تے ملک توڑن دی گال کر کے چپ کرا دیندے اوہ تے فیر دوجے پاسےجدوں پنجاب دی ونڈ دی گل کردے اوہ تے سیاسی بے ایمان جاپدے اوہ۔ اپر بیان ہوون آلیان تریوے ونڈاں اوہنا علاقیاں چہ امن و امان بحال کرن لئی، تے شدت پسند گروہاں دا زور توڑن لئی، تے اوتھے دے مظلوم عوام نوں سہولیات اوہنا ں دے بوہے تے اپڑاون لئی تے صدیاں توں قائم سرداری نظام دے خاتمے لئی انتہائی ضروری نہیں تے جیکر تہانوں ایہہ تریوے ونڈاں قبول نہی تے فیر پنجاب دی ونڈ دی گل بھل جاؤ کیوں جے پنجابی قوم پنجاب نال ایہہ سیاسی چالاکی تے نسل پرستی تے مبنی بے ایمانی ہوون نہیں دے گی۔ سندھی، پختون تے بلوچ قوم پرست ہو سکدے نیں تے پنجابی کیوں نہیں؟ نواز شریف دی کرپشن اپنی جگہ وکھرا معاملہ ہے جس نوں قانون دے مطابق تے بغیر کسے اچیچے تے وگویں سلوک توں ویکھیا جاوے پر نال باقی کرپٹ لوگ وی پھڑھنے چاہی دے کیوں جے کرپشن دا حقیقی خاتمہ ہوئے۔

اک بندے دی کرپشن نوں پھڑن دا کیہہ فائدہ۔ تے ن لیگ نوں سیاسی پریشر چہ الجھا کے سندھی تے پختون سیاست نوں جنوبی پنجاب چہ بلوچ/سرائیکی اور پٹھان کارڈ کھیڈ کے پنجاب دی ونڈ دا بھرپور تے بلا حیل تے حجت موقع دین دا مطلب پنجاب تے پنجابی دشمنی ہے جہیدا سدھا تے ستھرا اکو ای مطلب بندا اے کہ پئی تسی نسلی تعصب دا شکار ہو کے سب توں آبادی نوں اوہدے آئینی تے قانونی حق توں چالاکی نال محروم رکھنا چاہندی او۔ حالانکہ پنجاب تے پنجابیاں نے کدے وی غیر پنجابی تے پنجابی پارٹی دا فرق نہیں کیتا تاریخ پٹ کے ویکھ لوو جماعت اسلامی پیپلز پارٹی تے خان دی تحریک انصاف نوں حقیقی قوت پنجابیاں نے دتی فیر اے غیر پنجابی پارٹیاں پنجابیاں نال اے کچجا سلوک کاہدے لئی کر رہیاں نیں۔ ایس سیاسی تے نسلی بےایمانی لئی پنجابی قوم ایہناں پارٹیاں نوں کدے معاف نہیں کرن لگی۔

تے اک بڑا وڈا بھلیکھا کہ پنجاب دی دھرتی اک نسل دے ناں تے قائم ہے۔ جیہڑا کہ سیاسی شعبدے بازاں نے سدھے تے بھولے عوام چہ پھیلا رکھیا اے میں اوہ وی کڈ دیواں۔ پنجابی قوم اوہ واحد قوم ہے جیہڑی کہ کسے قسم دی نسل تے انسان پرستی پرستی توں ودھ کے اک خطے دے ناں تے بنی ہے۔ اوہ خطہ جیہڑا صدیاں توں اپنے اندر اک وکھرے، وگویں سوہنے تے سنکھے ریتی رواج تہذیب دی بنیاد تے قائم اے پیار محبت تے امن پسندی دا ایشیا پہلی چون رہی اے۔ پنجاب دھرتی دھرتی اے پنج دریاواں دی (پنج آب مطلب پنج پانی) تے ہر اوہ بندا جہیڑا ایس دھرتی دا واسی اے اوہ پنجابی اے۔ ایہی کارن اے کہ پنجاب دھرتی تے ایہدے عظیم واسیاں نے ایتھے آون آلیاں نوں سینہ کھول کی نا صرف جی آیاں نوں آکھیا بلکہ اوہناں نوں ایس دھرتی تے ہر اوہ حق دتا جیہڑا کہ ایتھے دے قدیم تے اصلی وارثاں کول ہے سی ہن چاہے اوہ چودہویں صدی چہ وارد ہوون والے بلوچ ہان یا پختون۔ تے چاہے اوہ بلوچستان دےسیاسی باغی چاکر اعظم رند جیہے لوگ جیہدا مزار ہجے تیک پنجاب دے شہر اوکاڑہ وچ موجود اے تے پنجابی اوہدا عرس پوری شان و شوکت نال مناوندے نیں۔

لہور وچ چاکر اعظم رند انڈر پاس پنجابیاں دے وڈے دل دی نشانی ہے۔ پر ایس سب دے باوجود جے باہروں آون والیاں قوماں پنجابی توں ہٹ کے اپنی وکھری شناخت دا دعوی کردیاں ہویاں اپنے لئی وکھرے صوبے دا مطالبہ کردیاں نے تے فیر ایس مقصد لئی پنجاب دی ونڈ دے بجائے اوہناں نوں پنجاب دی دتی شناخت واپس کر کے اے خواب اپنے اصلی تے حقے سچے وطن چہ پورا کرنا چاہی دا کیونکہ اگ لین آون والی ناں تے چلہے دی مالکن ہندی اے تے نآں اوہنوں کسے انج کرن دیوناں۔ تے رہی گل صوبہ بہاولپور بحالی تحریک دی تے گل ایہہ ہے کہ پئی تاریخ پھرول کے ویکھ لوو ایہہ علاقہ پنجاب دا حصہ سی بعد چہ ایس نوں اک مخصوص دور چہ ریاست بنایا گیا تے پاکستان نال اتحاد کرن توں بعد وی ایہہ اک مکمل صوبے دا درجہ نی سی رکھدا۔ تے نالے اپنے فطری تے حقیقی وسیب پنجاب ایچ ایس دا ضم ہونا کوئی مشروط نہیں سی کہ بعد چہ بحال کیتا جاوے تے جے بحالی لئی ایہہ دلیل من لئی جاوے تے فیر گل فیر سندھ تے بلوچستان چہ ضم ہوون والیاں ریاستاں تے علاقیاں تے آجاندی اے کہ۔ اہناں لئی وی ایہو مطالبہ کرنا نا جائز نہیں بلکہ قرین انصاف تے انتظام انصرام دی بہتری تے عوامی فلاح لئی ویلے دی لوڑ اے۔ تے پئی جے ایہہ فارمولہ پورے پاکستان لئی من لیا جاندا اے تے فیر غیر لسانی، غیر سیاسی تے غیر نسلی صوبے بنن تے ساہنوں کوئی اعتراض نہیں ہونا چاہیدا۔

پر افسوس نال کہنا پے رہیا کہ کج غیر پنجابی پارٹیاں جنہاں نوں پنج پانیاں دی ایس دھرتی نے ہمیشہ جی آیاں نوں کیہا ہن جدوں پنجاب چہ اوہناں دیاں اپنیاں کرتوتاں کارن اوہنا دا جتنا محال ہویا پیا تے اوہ پنجاب دے ہی ٹوٹے کرن لئی کلہاڑیاں تیز کر ریاں نیں۔ سیاسی نمک حرامی تے بے وفائی دی ایس توں بھرویں مثال میں نہیں دیکھی۔ تے ہک گل مینوں ہور دسو خیبر دی پٹی دا دیرنہ مطالبہ ایہناں نوں نظر کیوں نہیں آندا؟ کراچی، اوہدا وگڑیا نقشہ تے گل کرنا، تے مہاجر کمیونٹی دا صوبے دا مطالبہ ایہناں نوں اٹ وانگوں کیوں لگدا اے؟ حالاں کہ سب جاندے نے کہ کراچی دے مسئلے دا حل علہدا صوبہ یا فیر چوکھیاں ضلیاں چہ ایس دی ونڈ اے۔ پر اوتھے اینہاں نوں سندھو دیش یاد آ جاندا۔ تے سب جاندے نے کہ بلوچستان دا علاقہ پہلے ہی بہت وڈا تےچوکھا( پنجاب نالوں بہت وڈا ادھے پاکستان توں وی چوکھا) تے اپروں کلات تے مکران وی ایس چہ شامل کر دتے تیجہ تہاڈے سامنے ہے۔

سہولیات دی فراہمی عوامی فلاح تے بھلائی دے منصوبے ہر علاقے تیک پہنچانا مشکل ہویا پیا تے ایسے گل توں فائدہ چک کے شدت پسند اپنا منجن ویچ رہے۔ پر ایہہ سب ایہناں نوں نظر نہیں آندا صرف پنجاب دی ونڈ نظر آ دی۔ غیر پنجابی قوتاں( بھٹوسندھی اور ایوب خان )نے ہی سندھ طاس تے دستخط کر کے جنوبی پنجاب دے تن دریا بھارت نو ں دیندیاں ہویاں پنجاب دھرتی نوں پانی دی کمی دا شکار کیتا تے پنجاب دی اوس پٹی چہ ہزاراں ایکڑ زمین بنجر کیتی تے اج اوہ ہی قوتاں ایس خطے چہ گھٹ ترقی دا مکر کر رہیاں۔ مووازنہ کر کے ویکھ لوو کیہہ اندرون سندھ بلوچستان تے فاٹا نالوں وی بھیڑا حال اے ساڈا؟ تے اک ہور گل فنڈز تے ترقی دا رونا رون والیاں تو پچھو کہ یوسف رضا گیلانی نے اپنی وزارت عظمی تے شاہ محمود قریشی نے اوسے ویلے چہ اپنی وزارت خارجہ تے ونڈ دھڑے دے سندھی امام آصف علی زرداری (جو کہ پورے سندھی وی نہیں بلکہ بلوچ ہن ) نے اپنی صدارت دے دوران جنوبی پنجاب لئی کیہہ کیتا؟ فاروق لغاری وی ایسے خطے توں صدر رہیا اے تےمولانا فضل الر حمان وی ایسے خطے دی طاقت ہن تے ایس توں علاوہ ہور بڑے وڈے تے اچیرے سیاسی ناں ایسے علاقے دے ہن اوہناں نے لہور تے اسلام آباد یاترا توں ہٹ کے اپنے خطے تے کیہہ دھیان دتا؟ تے اج اوہ کیہڑے موہنہہ نال پنجاب دی اک ہور ونڈ دی گل کر رہے نیں؟

گل ایہہ اصل چہ ہے نہیں۔ بلکہ گل ایہہ ہے کہ ایہناں مزاریاں، مخدوماں، لغاریاں، جاماں، نیازیاں تے سرداراں تے ایہناں جے باقی لیڈراں نے وارو واری حکومتاں تے اسمبلیاں دے مزے لین دے باوجود اپنے علاقیاں لئی کجھ نہیں کیتا تے ہن جدوں ایس کارن ایہناں دی اوتھوں جت مشکل ہوئی پئی تے ایہناں نے پنجاب دی ونڈ کارڈ کھیڈیاں ہویاں اپنی سیاسی زندگی ودھاون کاروں کجھ غیر پنجابی قوتاں جیہڑیاں کہ صرف اور صرف مرکز تے اپنا کنٹرول چاہندیاں نیں اوہناں نال رل کے سادہ لوح پنجابیاں نوں اک نویں پٹی پڑھانا شروع کر دتا۔ جہیدا سدھا سدھا مطلب ملک چہ خانہ جنگی نوں ہوا دینا اے کیوں جے اکلے پنجاب دی ونڈ دا مطلب پنجاب دشمنی تے ایہدا مرکز چہ زور توڑنا اے جہیدا اک پکا ثبوت حالیہ مردم شماری چہ پنجاب دی آبادی گھٹ دکھا کہ پنجاب دیاں نوں سیٹاں کھوہ کہ پختون خواہ، بلوچستان تے مرکز نوں دتا جانا اے۔ پئی تسی مینوں اک گل دسو کیہہ پنجاب چہ ماواں نے بچے جمنا بند کر دتا ہے یا سارے پنجابی مر گئے۔ فرض کرو جے واقع ای پنجاب چوں ودھاویں تعداد چہ لوکاں ہجرت کیتی پر کی اوہ ہجرت اینی وڈی سی کہ اکٹھیاں نوں سیٹاں گھٹ گیاں مرکز چہ؟ ساڈا باقی صوبیاں دیاں سیٹاں ودھاون تے کوئی رولا نہیں پر پنجاب دیاں سیٹاں ودھان دے بجائے گھٹاون تے رولا ضرور ہے۔ پنجابی کدے وی تعصب دی حد تیک نسل پرست یا قوم پرست نہیں رہیا جہیدا فائدہ چکدیاں ہویاں ساڈی ماں بولی ساڈی ثقافت تے ساڈے تعلیمی اداریاں وچ ساڈے تے شب خون مارا گیا۔ عدالتاں، سرکاری اداریاں تے ہر۔ تھاں تےساہنوں نیشنل ازم دا جھنڈا چکا کے ساہڈی کنڈ پچھے اپنی اپنی قوم پرستی دیاں نیہاں تگڑیاں کیتیاں گیاں۔

سندھ چہ سندھی کے پی کے چہ پشتو تے بلوچستان چہ بلوچی لازم ہے فیر پنجاب چہ پنجابی دا گل کیوں وڈھیا گیا۔ پنجابی دے ہی اک لہجے( سرائیکی ) نوں اک علہدہ قومی شناخت دکھا کے اک سیاسی مکر رچایا گیا تے اوہدے اتے سندھی اجرک تے ٹوپی دا رنگ نیلا کر کے ڈھک دتا گیا۔ پر پنجابی قوم اپنے نال ایہہ ڈرامے بازی ہوون نہیں دے گی۔ پنجاب چہ رہن آلا ہر بندا پنجابی اے تے ہور اوہدی کوئی شناخت نہیں۔ لہذا پنجاب دی سیاسی ونڈ دا مکر رچاون والیاں سیاسی پارٹیاں اپنے اتے پنجاب دے احسان یاد رکھدیاں ہویاں اپنے سیاسی اقتدار دی بھینٹ پنجاب نوں چڑھاون دے بجائے اپنی سیاسی کارکردگی تے دھیان دیون تے ایس ملک دے تمام واسیاں نوں صوبے تے نسل دیاں حداں چوں نکل کے پاکستانی دی حیثیت نال ویکھن تے الیکشن جتن تے حکومت دے حصول لئی اے دو نمبر چالاں تے خانہ جنگی نوں ہوا دیون والے حربے بند کرن۔

تے رہی گل ن لیگ دی تے ایہہ گول مول پالیسی ہن نہیں چلنی تہاڈے سیاسی جھیڑے اپنی جگہ پر پنجاب دے معاملے تے جو غیر پنجابی پارٹیاں سیاست کرن لگیاں نے تے فیر ن لیگ نوں وی کھل کے اپنا موقف دینا پینا تاں جے پنجابیاں نوں مزید فیصلہ کرن چہ آسانی ہو جائے تے گل فیر اوہ ہے جے پنجاب ای نہیں تے فیر کسے کول کجھ روے ناں روے پنجابیاں نوں فرق نہیں پیناں۔ تے آخری گل پنجاب پہلی ونڈ دے خونی منظر ہجے تیک بھلا نہیں سکیا اہدے اثرات تے خونی دھبے اجے پنجاب دے سینے توں مٹے نہیں تے اک ہور ونڈ کر کے ساہنوں سیاسی تے قومی یتیم ہون دےدکھ چہ مبتلا نا کیتا جاوے۔ باقی صوبیاں نوں فنڈ دیو ترقی دیو سیٹاں ودھاوو پر پنجاب دے مونہہ چو کھوہ کے یا پنجاب دا سینہ چیر کے نہیں۔ تے کجھ لوکاں دی دشمنی تے شد دی بھینٹ پورا پنجاب کیوں چڑھے۔ ذمے واراں نوں پھٹے تے لیاون دا عمل بغیر کسے وگویں سلوک توں سب تے لاگو کرو۔ تاں جے ایس ملک چہ حقیقی پاکستانی قوم تے قومییت نوں مضبوط کیتا جاوے ناں کے صوبہ پرستی نوں ہوا دتی جاوے۔ کیونکہ بندیاں دیاں غلط کاریاں دی سزا بندے ای بھوگدے چنگے لگدے نا کہ اوہنا دے وطن تے علاقے۔


Facebook Comments - Accept Cookies to Enable FB Comments (See Footer).