آصف علی زداری سمیت سات افراد کے نام وزارت داخلہ کی ’سٹاپ لسٹ‘ میں شامل


آصف زرداری

وزارت داخلہ نے منی لانڈرنگ کے مقدمے میں پاکستان کے سابق صدر اور پاکستان پیپلز پارٹی کے شریک چیئرمین آصف علی زرداری اور ان کی بہن فریال تالپور سمیت سات افراد کے نام ’سٹاپ لسٹ‘ میں ڈال دیے ہیں۔

ان افراد کے نام چند روز قبل آصف علی زرداری کے قریبی ساتھی حسین لوائی کے خلاف درج ہونے والے منی لانڈرنگ کے مقدمے میں ہونے والی ابتدائی تفتیش کی بنا پر ڈالے گئے ہیں۔

دیگر افراد میں نصیر عبداللہ، آصف علی زرداری کے قریبی ساتھی انور مجید اور مصطفیٰ ذوالقرنین شامل ہیں۔ سابق صدر آصف علی زرداری اور ان کی بہن صوبہ سندھ سے رواں ماہ ہونے والے عام انتخابات میں حصہ لے رہے ہیں۔

جعلی اکاؤنٹس سے اربوں روپے کس کس کو منتقل ہوئے؟

’کیا آصف زرداری اتنے بھولے تھے جو میرے بہکاوے میں آگئے‘

حسین لوائی کے خلاف منی لانڈرنگ کا مقدمہ ایف آئی اے نے درج کیا ہے اور ایف آئی اے کے سربراہ بشیر میمن نے اس مقدمے کی تفتیش میں ہونے والی پیش رفت کے بارے میں پاکستان کے چیف جسٹس میاں ثاقب نثار کی سربراہی میں قائم سپریم کورٹ کے تین رکنی بینچ کو آگاہ کیا تھا۔

سپریم کورٹ نے منی لانڈرنگ سے مستفید ہونے والے افراد کے نام ای سی ایل میں شامل کرنے کے بارے میں ریمارکس تو دیے تھے تاہم اس بارے میں کوئی تحریری احکامات جاری نہیں کیے گئے۔


سٹاپ لسٹ کیا ہے؟

نامہ نگار شہزاد ملک کے مطابق سیکرٹری داخلہ کے پاس یہ صوابدیدی اختیار ہے کہ وہ کسی بھی شخص کا نام ایک ماہ کے لیے سٹاپ لسٹ میں ڈال سکتے ہیں لیکن اس اقدام کی کوئی قانونی حثیت نہیں ہے۔

اس کے علاوہ پاکستان میں پروویژنل آئیڈینٹیفیکیشن لسٹ (عارضی شناختی فہرست) بھی متعارف کروائی گئی ہے جس کے تحت ایف آئی اے کے حکام کے پاس بھی اختیار ہے کہ وہ کسی بھی شخص کا نام اس لسٹ میں شامل کرسکتے ہیں۔

اس اقدام کا مقصد کسی بھی ایسے شخص کو بیرون ملک جانے سے روکنا ہے جو کسی بھی مقدمے میں قانون نافذ کرنے والے اداروں کو مطلوب ہو۔ تاہم اس کا نام ایگزٹ کنٹرول لسٹ میں شامل نہ کیا گیا ہو۔

وزارت داخلہ کے پاس کسی بھی شخص کا نام بلیک لسٹ میں شامل کرنے کا بھی اختیار ہے تاہم اس پر وقت کی حد مقرر نہیں ہے اور کسی بھی شخص کا نام کسی بھی وقت نکالا جاسکتا ہے۔

ٹریفک حادثے میں ملوث امریکی سفارت کار اور عمران خان کے قریبی ساتھی زلفی بخاری کے نام بھی بلیک لسٹ سے نکالنا اس کی واضح مثالیں ہیں۔


پاکستان پیپلز پارٹی نے ایف آئی اے کے سربراہ بشیر میمن کو ان کے عہدے سے ہٹانے کے لیے درخواست بھی دے رکھی ہے جس میں کہا گیا ہے کہ بشیر میمن کے بھائی کراچی کے ایک حلقے سے عام انتخابات میں حصہ لے رہے ہیں اس لیے اُنھیں اس عہدے سے ہٹایا جائے۔

سپریم کورٹ کے چیف جسٹس نے وفاقی حکومت کو واضح ہدایات دی ہیں کہ ڈی جی ایف آئی اے کو عدالت عظمیٰ کو بتائے بغیر اُنھیں کسی دوسری جگہ ٹرانسفر نہ کیا جائے۔

بشیر میمن سپریم کورٹ کے حکم پر سابق وزیر اعظم میاں نواز شریف اور دیگر سیاست دانوں میں فوج کے خفیہ اداروں آئی ایس آئی کی طرف سے رقوم تقسیم کرنے کے بارے میں دائر مقدمے کی تحقیقات کر رہے ہیں۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32291 posts and counting.See all posts by british-broadcasting-corp