امریکہ اور برطانیہ کے تعلقات ’انتہائی خصوصی‘ ہیں: ٹرمپ
امریکی صدر ڈونلڈ ٹرمپ نے برطانوی وزیرِ اعظم ٹریزا مے کے بریگزٹ منصوبے پر تنقید کے چند ہی گھنٹے بعد کہا ہے کہ امریکہ اور برطانیہ کے تعلقات ‘انتہائی خصوصی’ ہیں۔
ٹریزا مے کے ساتھ ملاقات کے بعد ٹرمپ نے ایک پریس کانفرنس میں کہا کہ بریگزٹ برطانیہ کے لیے ‘بہت زبردست موقع’ ہے اور برطانیہ جو بھی کرے، وہ میرے لیے ٹھیک ہے۔
وزیراعظم مے نے کہا کہ انھوں نے ٹرمپ کے ساتھ ایک ‘پرعزم’ منصوبے پر بات کی ہے۔
اس بارے میں مزید جانیے
’یورپ مکمل طور پر امریکہ، برطانیہ پر انحصار نہیں کر سکتا‘
صدر ٹرمپ کو کس نے اور کیسے ’بیوقوف‘ بنایا؟
بریگزٹ: برطانیہ، یورپی اتحاد کسی معاہدے پر پہنچنے میں ناکام
ٹرمپ کی لندن آمد کے موقع پر بڑے پیمانے پر احتجاج ہو رہا ہے۔ اسی دوران مظاہرین نے لندن میں ایک بہت بڑا غبارہ اڑا رہے ہیں جس میں صدر ٹرمپ کو ایک بچے کی شکل میں دکھایا گیا ہے۔
صدر ٹرمپ کے خلاف پارلیمنٹ سکوئر کے علاوہ لندن کے کئی دوسرے مقامات پر احتجاجی مظاہرے ہو رہے ہیں۔
نیوز کانفرنس میں ٹرمپ نے کہا: سن اخبار کا انٹرویو ‘عمومی طور پر ٹھیک’ تھا لیکن اس میں انھوں نے مے کے بارے میں جو مثبت باتیں کی تھیں وہ نظر انداز کر دی گئیں۔
مے نے کہا کہ انھوں نے ٹرمپ کے ساتھ خارجہ پالیسی، ممکنہ تجارتی معاہدے اور دفاع کے علاوہ ‘خصوصی تعلقات’ پر بات کی ہے۔
صدر ٹرمپ نے کہا کہ انھوں نے ‘دہشت گردی کی کچھ ناقابلِ یقین باتوں’ پر تبادلۂ خیال کیا ہے اور انھوں نے گذشتہ رات کو بھی ڈیڑھ گھنٹے تک وزیرِ اعظم مے سے بات چیت کی تھی۔
صدر ٹرمپ ہیلی کاپٹر کے ذریعے چیکرز کے علاقے میں ٹریزا مے سے ملاقات کے لیے پہنچے۔ جس کے بعد مشترکہ پریس کانفرنس سے بھی خطاب کیا۔
اس سے قبل صدر ٹرمپ کے برطانوی اخبار ‘سن’ کو انٹرویو دینے کی خبر سامنے آئی تھی۔
اس انٹرویو میں ٹرمپ نے کہا تھا کہ انھوں نے مے کو بریگزٹ کے بارے میں مشورے دیے تھے مگر ٹریزا مے نے ان کے مشورے نظر انداز کر دیے، اور کہا کہ ‘اگر میں یہ کرتا تو بالکل مختلف طریقے سے کرتا۔’
اس کے علاوہ انھوں نے یہ بھی کہا تھا کہ سابق وزیرِ خارجہ بورس جانسن، جنھوں نے بریگزٹ کے معاملے پر مے سے اختلافات کے بعد گذشتہ ہفتے استعفیٰ دے دیا تھا، ‘زبردست وزیرِ اعظم ہوتے۔’
اس کے علاوہ انھوں نے لندن کے میئر صادق خان پر بھی تنقید کی اور کہا کہ انھوں نے انتہائی خراب کارکردگی دکھائی ہے۔
Facebook Comments - Accept Cookies to Enable FB Comments (See Footer).