معاشی دیوالیہ سے بچے تو سیاسی دیوالیہ
آئی ایم ایف نے بھی بہت دیر کردی آتے آتے۔ چلئے معاشی دیوالیہ کا خطرہ تو ٹلا بھلے 9 ماہ کے لئے ہی سہی! اسحاق ڈار ایک عرصہ سے میثاق معیشت کی دہائی دیتے چلے آئے تھے، ان کی خواہش بھی آئی ایم ایف کے ایک وفد نے پی ٹی آئی، پی پی پی اور پی ڈی ایم کی قیادتوں سے ملاقاتیں کر کے اسٹینڈ بائی معاہدے پہ اتفاق رائے سے ایک حد تک پوری کردی ہے۔ گویا سبھی بڑی جماعتوں نے آئی ایم ایف کے نیو لبرل ایجنڈے اور آزاد منڈی کی مارا ماری پر بیعت کرلی ہے۔
اس سے پہلے قومی اسمبلی نے پیش کردہ بجٹ سے ہٹ کر عالمی مالیاتی ادارے کی ڈکٹیشن کو من و عن بلا جانچے آمنا و صدقنا کہہ کر پاس کر دیا تھا اور یوں اپنی خود مختاری کو بھی آئی ایم ایف کے پاس رہن رکھ دیا۔ سنا ہے کہ 9 ماہ کے عبوری عرصہ کے لئے بھی عالمی ادارے کو سیاسی استحکام کی یقین دہانیاں چاہئیں۔ شاید آٹھ ہفتوں کی حکومت اور اس میں شامل جماعتوں کو اچھے چلن کی ضمانت دینی پڑے اور تحریک انصاف بھی اپنی پھوٹی قسمت پہ کسی اشک شوئی کی متمنی ہو۔
جب بھی سیاستدان مکالمہ کرلیتے تھے تو بڑے معرکے اور اہداف حاصل کر لیا کرتے تھے۔ جیسے 1973 کا آئین پیپلز پارٹی، نیشنل عوامی پارٹی اور جمعیت علمائے اسلام کے سہ فریقی معاہدے کی دین تھا۔ محترمہ بے نظیر بھٹو اور محترم نواز شریف کے مابین میثاق جمہوریت نے جمہوریت کی بحالی کی راہ نکالی اور ایک پندرہ سالہ جیسے کیسے جمہوری عمل کو جاری رکھنے کی سبیل پیدا کی۔ اس دوران جمہوریت کی گاڑی کو پٹڑی سے اتارنے اور سیاستدانوں کو باری باری خوار کرنے کی بہت کوششیں ہوئیں اور حکومتیں بنتی، بدلتی رہیں، لیکن گاڑی ہچکولے کھاتی ہوئی پٹڑی پہ ہی رہی۔
گو کہ گزشتہ تینوں اور خاص طور پر آخری عام انتخابات کا چلن مشکوک رہا اور تین وزرائے اعظم کو قبل از وقت اپنی حکومتوں سے جانا پڑا پھر بھی گاڑی چلتی رہی۔ اس اثنا میں جو دو بڑے فیکٹرز جمہوریت کے سفر کو خراب کرتے رہے، ان میں سیاستدانوں کی باہم ناچاقیاں اور مقتدرہ کی چالبازیاں سیاسی شکست و ریخت کی باعث بنی رہیں، لیکن پارلیمانی تسلسل برقرار رہا۔ نواز لیگ کو نواز شریف کی غیر منصفانہ تاحیات نا اہلی اور بعد ازاں عمران حکومت میں دونوں بڑی جماعتوں نواز لیگ اور پیپلز پارٹی پہ زمین تنگ تو کی گئی، لیکن وہ زخم خوردہ ہو کر بھی میدان میں رہیں۔
لیکن اب صورت مختلف ہے اور مخدوش تر ہوتی چلی جا رہی ہے۔ اس میں عمران حکومت کی عدم برداشت اور سیاسی انتقام اور حکومت سے نکلنے پر عمران خان کی نراجی سیاست اور مہم جوئی نے پورے سیاسی نظام کی چولیں ہلا کر رکھ دی ہیں۔ حکومت سے نکلنے پر عمران خان نے نہ صرف قومی اسمبلی سے استعفیٰ دے کر اور اپنی دو صوبائی حکومتوں کو تڑوا کر جو سیاسی بحران پیدا کیا تھا، اس سے سیاسی نظام سنبھل تو گیا لیکن انتخابات کے سوال پر دو طرفہ مذاکرات انتخابات کی تاریخ پہ فروعی اختلاف کی ہٹ دھرمی کی نذر ہو گئے۔ سیاسی مکالمہ ناکام ہو گیا۔ سیاسی شہادت کے جوش میں 9 مئی کو جو کچھ ہوا وہ تحریک انصاف کے گلے پڑ گیا ہے۔ فوج کی پھر سے آشیر باد حاصل کرنے کی لاحاصل کوششوں کی ناکامی سے مایوس ہو کر فوج سے ٹکر لے لی گئی۔ جس کا تحریک انصاف خمیازہ بھگتنے جا رہی ہے۔ اگر انتخابات پر دو طرفہ بات چیت کو کامیاب ہونے دیا جاتا تو سیاسی گرد و غبار چھٹ جاتا اور پارٹیاں انتخابی عمل میں کود چکی ہوتیں۔ فوج بھی سیاست سے کنارہ کشی کرتی دکھائی دی لیکن بلاوجہ کی اشتعال انگیزی سے کنارہ کش ہوتے شیر کو بھڑکا دیا گیا ہے۔
9 مئی کی مہم جوئی فوج کو پھر سیاست میں گھسیٹ لائی۔ جس سے مکالمے کی بار بار درخواست کی جا رہی تھی، اسے ہی فریق بنا دیا گیا۔ ایک لا اینڈ آرڈر کا مسئلہ امن وامان اور جزا سزا تک ہی محدود رہتا تو مناسب رہتا۔ کوئی بھڑکائے اور اشتعال دلائے تو ادارے اپنے پیشہ ورانہ ضبط سے بہک نہیں جاتے۔ جس تحمل کا مظاہرہ 9 مئی کو کیا گیا تھا، اسے برقرار رکھنے سے صورتحال گمبھیر ہونے سے بچ سکتی ہے۔ دوسری طرف عمران خان اپنی ہی بنائی ہوئی گیم میں پھنس گئے ہیں اور اس سے نکلنے کی کوئی راہ انہیں سجھائی نہیں دیتی۔ ایسے میں سیاسی دیوالیہ پٹنے سے کون بچا سکتا ہے؟
موجودہ اسمبلیوں کی مدت ختم ہونے میں آٹھ ہفتے سے بھی کم وقت رہ گیا ہے۔ نئی مردم شماری مسلسل لیٹ کی جا رہی ہے، اس کا اعلان نہ ہوا اور اس کے مطابق نئی حلقہ بندیاں نہ ہوئیں تو پھر انتخابات وقت پر نہ ہو سکیں گے۔ الیکشن کمیشن کی جانب سے اگلے انتخابات کے شیڈول بارے کوئی خبر نہیں۔ اور جانے چیف جسٹس اپنی آخر سہ ماہی میں کیا ہلچل مچا دیں۔ آزادانہ انتخابات کی جانب بڑھنے میں جہاں کسی سیاسی سمجھوتے کا کوئی امکان نہیں، وہیں عمران خان اور تحریک انصاف پر بڑا سوالیہ نشان چسپاں کر دیا گیا ہے۔
فائنل کریک ڈاؤن کی تیاریاں زوروں پر ہیں۔ بہتر ہو گا کہ آئین و قانون انصاف کے دائروں کو ملحوظ خاطر رکھا جائے۔ شہری و انسانی حقوق کا احترام کیا جائے اور آئندہ انتخابات سے کسی بھی لیڈر اور پارٹی کو زبردستی باہر کرنے سے اجتناب کیا جائے۔ اگر ایسا کیا جاتا ہے تو اگلے انتخابات بھی مشکوک ہوجائیں گے اور سیاسی بحران سنگین تر ہوتا چلا جائے گا۔ ملک کے سیاسی بحران کا واحد حل صاف و شفاف انتخابات ہیں جس میں سوائے دہشت گرد تنظیموں کے سبھی کو مساوی شرکت کا پورا پورا موقع ملنا چاہیے۔
اس دوران اگر کچھ سیاسی کارکنوں پہ مقدمات چلتے ہیں تو ان میں انصاف بھی ہو اور انصاف ہوتا بھی نظر آئے۔ گو کہ موجودہ سیاسی محاذ آرائی میں فوج کو گھسیٹا گیا ہے، لیکن فوج کا آئینی فرض ہے کہ وہ اپنے سیاست سے دوری کے عہد پہ قائم رہے۔ فوج کو ہر طرح کی سیاسی کنٹروورسی سے دور رکھنے کے لئے ضروری ہے کہ فوجی عدالتیں سویلینز کا ٹرائل نہ کریں۔ اس پر عالمی طور پر بھی شور مچے گا اور سول سوسائٹی بھی اسے قبول نہیں کرے گی۔
سیاستدانوں کی باہم مارا ماری کے باعث شہباز حکومت بہت تیزی سے سویلین میدان چھوڑ رہی ہے اور اہم ترین معاشی شعبوں کا کنٹرول غیر پیشہ ورانہ ہاتھوں میں دیے چلی جا رہی ہے۔ لیکن فوج حربی کے علاوہ دیگر سویلین اور معاشی شعبوں میں پاؤں پھیلانے سے اجتناب کرے۔ لگتا ہے کہ سیاسی بگاڑ بڑھتا جائے گا۔ سیاستدانوں کو مخالفین کو سیاسی میدان سے نکالنے کی غیر جمہوری روش سے اجتناب کرنا چاہیے۔ لیکن سیاسی ماحول اتنا تلخ تر ہو گیا ہے کہ مکالمہ کی کوئی امید بر ہوتی نظر نہیں آتی۔ آخر ملک کتنا سیاسی بحران برداشت کرپائے گا۔ ایک ہائبرڈ نظام بحران کا شکار ہو کر ختم ہوا، دوسرے کے تجربے کا نتیجہ مختلف نہیں ہو گا۔ کہیں وہ نہ پھر ہو جائے جو ہوتا رہا ہے۔ بیچاری جمہوریہ کی خیر منائیں!
(بشکریہ: روز نامہ جنگ)
- ایک طوفان کی آمد ہے - 24/12/2023
- معاشی دیوالیہ سے بچے تو سیاسی دیوالیہ - 09/07/2023
- امریکہ بھارت کے تعلقات میں بڑی زقند - 25/06/2023
Facebook Comments - Accept Cookies to Enable FB Comments (See Footer).