سابق پاکستانی کرکٹر شاہد آفریدی کے کشمیر کے مسئلے پر بیان پر ایک نیا تنازع کھڑا ہو گیا ہے۔

شاہد آفریدی نے کشمیر کو انڈیا یا پاکستان کا حصہ بنانے کی بجائے انھوں نے تجویز دی کہ کشمیر کو علیحدہ ملک بنا دینا چاہیے۔

گذشتہ روز برطانوی دارالعوام میں طلبا سے گفتگو کے دوران شاہد آفریدی نے کہا: ’میں کہتا ہوں کہ کشمیر پاکستان کو نہیں چاہیے اور نہ ہی انڈیا کو دیں، بلکہ کشمیر کو علیحدہ ملک بنا دیں، کم از کم انسانیت تو زندہ رہے، نہیں چاہیے پاکستان کو، پاکستان سے چار صوبے نہیں سنبھل رہے۔‘

مسئلہ کشمیر پر آفریدی اور گوتم میں لفظی جنگ

شکھر دھون کا آفریدی کو جواب: ’زیادہ دماغ مت لگاؤ‘

’لوگ وہاں مر رہے ہیں، سخت وقت سے گزر رہے ہیں۔ جہاں بھی انسان مارے جاتے ہیں، چاہے کسی بھی مذہب کے ہوں، اس سے تکلیف ہوتی ہے۔‘

ان کے اس بیان کی ویڈیو فوراً ہی سوشل میڈیا پر شیئر کی جانے لگی۔ انڈین میڈیا کے بعض حصوں میں ان کے اس بیان کو اس طرح پیش کیا گیا کہ شاہد آفریدی یہ کہنا چاہ رہے تھے کہ پاکستان کو کشمیر پر حق جتانا چھوڑ دینا چاہیے۔

شاہد آفریدی کی وضاحت

پاکستان کرکٹ ٹیم کے سابق کپتان شاہد آفریدی نے اپنے اس بیان کے بعد ایک ٹویٹ کی جس میں ان کا کہنا تھا کہ انڈین میڈیا نے ان کے بیان کو غلط انداز میں پیش کیا ہے۔

انھوں نے اپنی ٹویٹ میں لکھا: ’میرا ویڈیو کلپ نامکمل ہے اور سیاق و سباق سے الگ ہے کیونکہ اس پہلے جو کچھ میں نے کہا وہ اس میں نہیں ہے۔ کشمیر ایک غیر تصفیہ شدہ تنازع اور ظالمانہ انڈین قبضے میں ہے۔ اسے اقوام متحدہ کی قرارداد کے تحت حل کرنا چاہیے۔ میں اور ہر پاکستانی کشمیر کی آزادی کی جدوجہد کی حمایت کرتا ہے۔ کشمیر پاکستان کا ہے۔‘

https://twitter.com/SAfridiOfficial/status/1062703416017854464

اس کے بعد انھوں نے ایک اور ٹویٹ کی اور کہا کہ ’میرے بیان کو انڈین میڈیا نے توڑ مروڑ کر پیش کیا۔ میں اپنے ملک سے بہت پیار کرتا ہوں اور کشمیریوں کی جدوجہد کی بہت قدر کرتا ہوں۔ انسانیت باقی رہنی چاہیے اور انھیں ان کا حق ملنا چاہیے۔‘

https://twitter.com/SAfridiOfficial/status/1062694991850627074

سوشل میڈیا ردعمل

اس سب سے پہلے ہی سوشل میڈیا پر اس حوالے سے ملے جلے ردعمل آنے کا سلسلہ شروع ہو گیا تھا۔

https://twitter.com/sohailcheemamd/status/1062698713804611584

سہیل چیمہ نامی ایک صارف نے ٹوئٹر پر لکھا: ’شاہد آفرید کسی طرح انڈین مارکیٹ میں جگہ حاصل کرنے کے لیے بیتاب ہیں، وہ انڈینز کو اپنی ذاتی وجوہات کے لیے خوش کرنا چاہتے ہیں۔ انھوں نے اپنا پورا کریئر صرف اپنے لیے کھیلا، اب جب کرکٹ کریئر ختم ہو گیا ہے تو وہ انڈینز کو خوش کرنے کے لیے ملک کی ساکھ کو داؤ پر لگانے کی ڈرٹی گیم کھیل رہے۔‘

https://twitter.com/OzairAliSyed/status/1062796820823371776

https://twitter.com/OzairAliSyed/status/1062796820823371776

اسلام آباد سے عزیر علی سید نے لکھا: ’شاہد آفریدی آپ اپنی گفتگو میں نہ تو پراعتماد تھے نہ ہی فلسفیانہ تھے بلکہ ضرورت سے زیادہ خود اعتماد تھے جس کی وجہ سے آپ نے پاکستان کی بے عزتی کرائی اور ہم سب کو پورے انڈیا کے سامنے مذاق بنا دیا۔‘

انڈیا کے زیرانتظام کشمیر کے سابق وزیراعلیٰ عمر عبداللہ نے کہا ہے کہ شاہد آفریدی نے ایسا کچھ نہیں کہا جس سے انڈیا کو خوشی ہو۔

انھوں نے لکھا: ’مجھے سمجھ نہیں آتی کہ انڈین میڈیا کو شاہد آفریدی کے بیان کے کس حصے سے خوشی ہوئی ہے، پاکستان کے چار صوبوں کے بارے میں جو انھوں نے کہا اسے بھول جائیں، جو حصہ میں نے واضح طور پر دیکھا، وہ کشمیر کی آزادی کی حمایت کر رہے تھے اور انسانی حقوق کی خلاف ورزی پر تنقید کر رہے تھے تو یہ انڈیا کی جیت کیسے ہوئی؟‘

https://twitter.com/OmarAbdullah/status/1062728429999677440

پاکستان سے ایک ٹوئٹر صارف فائقہ نے لکھا: ’مجھے شاہد آفریدی کے بیان میں کچھ غلط نہیں لگا۔ ہم واقعی میں اپنے چاروں صوبوں کو نہیں سنبھال پا رہے ہیں، بیڈ گورننس، کرپشن، غربت۔ کون سے جنت کے باغ ہم نے سجائے ہوئے ہیں ان کے لیے؟ ہاں کشمیر کو آزاد ہونے دیں۔‘

https://twitter.com/Crankybelle/status/1062734924460056576

خیال رہے کہ شاہد آفریدی نے اس سے قبل بھی کشمیر کے مسلے پر بات کی تھی۔ جب 2016 میں انڈین شہر موہالی میں ایک کرکٹ میچ کے بعد انھوں نے کہا تھا کہ پاکستانی کرکٹ ٹیم کو کشمیر میں بہت پسند کیا جاتا ہے۔

ان کے اس بیان پر بھی انھیں انڈین میڈیا کے بعض حصوں نے تنقید کا نشانہ بنایا تھا۔

• About
• Latest Posts

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

Latest posts by بی بی سی (see all)

• مسلم ملک اُردن نے اسرائیل پر داغے گئے ڈرون کیوں مار گرائے اور یہ ملک تاریخی اعتبار سے کہاں کھڑا ہے؟ - 16/04/2024
• ’میری آنکھ باہر نکل کر میرے چہرے پر لٹکی ہوئی تھی، میں سوچ رہا تھا کہ میں مر رہا ہوں‘: سلمان رشدی - 16/04/2024
• کھلاڑی کو کوڑے مارنے کے ’ذلت آمیز مناظر‘: سعودی فٹبال فیڈریشن کا شائقین کے لیے قوانین سخت کرنے کا فیصلہ - 15/04/2024