سانحہ ماڈل ٹاؤن: سپریم کورٹ کا لارجر بینچ تشکیل دے دیا گیا
پاکستان کے چیف جسٹس میاں ثاقب نثار نے سانحہ ماڈل ٹاؤن کیس میں نئی مشترکہ تحقیقاتی ٹیم کے قیام کے لیے سپریم کورٹ کا لارجر بینچ تشکیل دے دیا ہے۔
سپریم کورٹ کے لارجر بینچ میں چیف جسٹس میاں ثاقب نثار، جسٹس آصف سعید کھوسہ سمیت پانچ ججز شامل ہوں گے۔
سپریم کورٹ لاہور رجسٹری میں چیف جسٹس میاں ثاقب نثار کی سربراہی میں بینچ نے نئی جے آئی ٹی کا قیام سانحہ ماڈل ٹاؤن کی متاثرہ لڑکی بسمہ امجد کی درخواست پر سماعت کے دوران کی۔
اسی بارے میں مزید پڑھیے
رانا ثنا اللہ: ماڈل ٹاؤن رپورٹ نقائص سے بھرپور
طاہرالقادری کی واپسی، ماڈل ٹاؤن کیس میں انصاف کا مطالبہ
’ماڈل ٹاؤن انکوائری کا پتہ ہاتھ لگ گیا‘
دوران سماعت پاکستان عوامی تحریک (پی اے ٹی) کے سربراہ طاہر القادری عدالت میں پیش ہوئے اور موقف اپنایا کہ سابق انسپکٹر جنرل (آئی جی) مشتاق سکھیرا پر فرد جرم عائد ہونے کے بعد ہمارا کیس زیرو پر آگیا ہے۔
اس موقع پر کیس کے فریقین سابق وزیر اعلیٰ پنجاب شہباز شریف اور دیگر کے وکیل اعظم نذیر تارڑ نے کہا کہ انھیں کیس کی تیاری کے لیے وقت چاہیے۔
جس کے بعد چیف جسٹس نے نئی جے آئی ٹی کے قیام کے لیے سپریم کورٹ کا لارجر بینچ تشکیل دے دیا۔
چیف جسٹس نے ریمارکس دیے کہ بینچ میں دیگر صوبوں کی نمائندگی بھی ہوگی اور لارجر بینچ پانچ دسمبر کو کیس کی سماعت کرے گا۔
بی بی سی نے قارئین کے لیے چار سال قبل ہونے والے واقعہ کے حوالے سے اٹھائے گئے چند اہم سوالات کے جوابات دیے ہیں۔
واقعہ تھا کیا اور اس کا پس منظر کیا تھا؟
جون کی 16 تاریخ کو پاکستان عوامی تحریک کے سربراہ علامہ طاہر القادری نے کینیڈا سے اپنے خطاب میں حکومت کو تنبیہ کی کہ اگر انھوں نے 23 جون ان کی آمد پر کسی قسم کی رکاوٹ ڈالی اور انھیں کچھ ہوا تو اس کے بہت سنگین نتائج ہوں گے۔
علامہ طاہر القادری 2014 میں کچھ عرصے سے محمد نواز شریف کی حکومت کے خلاف حزب اختلاف کا اتحاد قائم کرنے کی کوشش کر رہے تھے اور انھیں اس وقت تک پاکستان مسلم لیگ ق اور عوامی مسلم لیگ کے قائد شیخ رشید کی جانب سے حمایت کے پیغام مل گئے تھے۔
اگلے روز پنجاب پولیس نے ماڈل ٹاؤن لاہور میں علامہ طاہر القادری کے ادارے منہاج القرآن کے دفاتر کے باہر لگی ہوئی رکاوٹوں کو ہٹانے کے لیے آپریشن شروع کر دیا۔ پولیس نے منہاج القرآن کے ممبران سے کہا کہ وہ ان رکاوٹوں کو ختم کریں جن کے بارے میں پولیس کا دعویٰ تھا کے وہ غیر قانونی ہیں۔
پولیس کی کاروائی کے جواب میں پاکستان عوامی تحریک کے کارکنان نے کہا کہ یہ رکاوٹیں چار سال قبل قانونی طور پر لگائی گئی ہیں جب ان کے سربراہ نے ماضی میں طالبان کے خلاف بیانات دیے تھے۔
اس کے باوجود پولیس نے بلڈوزروں کی مدد سے کاروائی شروع کر دی اور جس کے بعد فریقین میں جھڑپوں کا آغاز ہو گیا۔
ملزم کون ہیں، الزامات کیا ہیں اور ملزمان کا مؤقف کیا ہے؟
لاہور میں انسداد دہشت گردی کی خصوصی عدالت نے سانحہ ماڈل ٹاؤن استغاثہ کیس میں 115 ملزمان پر فرد جرم عائد کردی۔
انسداد دہشت گردی کی خصوصی عدالت میں جج اعجاز حسن اعوان نے سانحہ ماڈل ٹاون استغاثہ کیس کی سماعت کی، اس دوران عدالت نے ڈی آئی جی رانا عبدالجبار سمیت 115 ملزمان پر فرد جرم عائد کی، تاہم تمام ملزمان نے صحت جرم سے انکار کردیا۔
دوران سماعت عدالت نے ڈی آئی جی رانا عبدالجبار کے عدالت میں پیش نہ ہونے پر ان کے وکیل کو ہدایت کی کہ وہ آئندہ سماعت پر انھیں پیش کریں۔
اس موقع پر عدالت نے غیر حاضر تمام ملزمان کو آئندہ سماعت پر عدالت میں پیش ہونے کا حکم دیا، تاکہ ملزمان پر فرد جرم عائد کرنے کا عمل مکمل ہو سکے۔
عدالت کی جانب سے جن ملزمان پر فرد جرم عائد کی گئی ان میں ڈی آئی جی رانا عبدالجبار، ایس پی عبدالرحیم شیرازی، ایس پی عمر ورک، ایس پی معروف صفدر، ایس پی عمر ریاض، ڈی اسی پی آفتار احمد، رانا محمد اسلام، ڈی ایس پی محمود الحسن اور دیگر شامل ہیں۔
خیال رہے کہ استغاثہ کیس پاکستان عوامی تحریک کی جانب سے دائر کیا گیا تھا، جس میں سابق وزیر اعظم نواز شریف، وزیر اعلیٰ پنجاب شہباز شریف سمیت 12 سیاسی شخصیات، پولیس افسران، اہلکار اور ضلعی حکومت کے عہدیداروں کو فریق بنایا گیا تھا، تاہم عدالت نے استغاثہ میں سے سیاسی شخصیات کے نام ختم کر دیے تھے۔
جسٹس باقر کی رپورٹ میں کیا تھا؟
گذشتہ سال 21 ستمبر کو لاہور ہائی کورٹ نے سانحہ ماڈل ٹاؤن کے حوالے سے جسٹس باقر نجفی کی رپورٹ کو منظرعام پر لانے کا حکم جاری کیا تھا۔
اس موقعے پر بی بی سی اردو کے نامہ نگار عمر دراز سے بات کرتے ہوئے سانحۂ ماڈل ٹاؤن کے متاثرین کے وکیل اشتیاق چودھری نے بتایا کہ لاہور ہائی کورٹ میں دی جانے والی درخواست میں سانحۂ ماڈل ٹاؤن کے متاثرین نے عدالت سے استدعا کی تھی کہ انھیں بتایا جائے کہ ان کے پیاروں کی موت کے ذمہ داران کون ہیں۔
جسٹس باقر نجفی کی تحریر کردہ رپورٹ کے مطابق سال 2014 میں جون 16 کو پنجاب کے اُس وقت کے وزیر قانون رانا ثنا اللہ کی قیادت میں میٹنگ ہوئی تھی جس میں منہاج القرآن کے باہر لگی رکاوٹیں ہٹانے کا فیصلہ کیا گیا اور پنجاب کے چیف سیکریٹری نے ’وزیر اعلیٰ پنجاب شہباز شریف کی جانب سے اس عمل کی منظوری دی تھی۔‘
رپورٹ میں بتایا گیا کہ پولیس نے ماڈل ٹاؤن میں جمع ہونے والے ہجوم پر براہ راست فائرنگ کی جس کے نتیجے میں دو خواتین شازیہ اور تنزیلہ ہلاک ہو گئیں۔ تنزیلہ پر فائرنگ کا واقعہ ویڈیو پر ریکارڈ بھی ہوا تھا۔
دوسری جانب اس بات کے کوئی ثبوت نہیں ملے کے پاکستان عوامی تحریک کے کارکنان کی جانب سے اسلحہ استعمال کیا گیا ہو۔
جسٹس باقر نجفی کی رپورٹ میں اہم ترین نکتہ یہ تھا کہ پولیس نے یہ بات واضح نہی کی کہ انھوں نے فائرنگ کس عہدے دار کے کہنے پر شروع کی۔
واقعہ کے بعد پنجاب پولیس کے آئی جی اور ڈی سی او لاہور کو تبدیل کر دیا گیا تھا جبکہ شہباز شریف کی جانب سے دیا گیا بیان کے انھوں نے فائرنگ روکنے کا حکم دیا تھا، کسی شواہد کے بغیر تھا۔
جسٹس باقر نے اس پر رپورٹ میں تحریر کیا: ’یہ بات بالکل واضح طور پر سامنے آتی ہے کہ فائرنگ روکنے کا حکم ایک بار بھی نہیں دیا گیا تھا۔‘
رپورٹ کے اختتام میں وہ لکھتے ہیں کہ وزیر قانون کی سربراہی میں تیار کیا گیا آپریشن ذرا سی احتیاط برتنے پر نہیں ہوتا۔ لیکن اس میں نتیجہ اخذ کرتے ہوئے انھوں نے لکھا کہ رپورٹ پڑھنے والا کوئی بھی قاری بہت آرام سے سمجھ سکتا ہے کہ واقعے کی ذمہ داری کس پر عائد ہوتی ہے۔
لاہورہائی کورٹ کی جانب سے ماڈل ٹاؤن رپورٹ منظر عام پر لانے کے حکم کے بعد لاہور میں پریس کانفرنس کرتے ہوئے رانا ثنا اللہ نے کہا تھا کہ ’پچھلے ڈھائی تین سال سے یہ پروپیگنڈا کیا جاتا رہا کہ اس رپورٹ میں ایسے ثبوت ہیں کہ اس سے نجانے کیا ہو جائے گا۔ یہ سب سیاسی انتقام اور پروپیگنڈا تھا۔‘
نئی جے آئی ٹی کا مطالبہ کیوں کیا جا رہا ہے؟
پاکستان عوامی تحریک نے ماڈل ٹاؤن میں پولیس فائرنگ سے ہونے والی ہلاکتوں کی تحقیقات کے لیے جوائنٹ انویسٹی گیشن ٹیم (جے آئی ٹی) کی رپورٹ کو مسترد کرتے ہوئے احتجاج کرنے کا اعلان کیا ہے۔
ادھر پنجاب اسمبلی کے اجلاس میں سانحہ ماڈل ٹاؤن پر جے آئی ٹی کی رپورٹ پر ہنگامہ آرائی ہوئی اور حزب اختلاف نے رپورٹ کو مسترد کرتے ہوئے ایوان سے واک آؤٹ کیا۔
پنجاب حکومت نے ماڈل ٹاؤن میں پولیس کی فائرنگ سے عوامی تحریک کے کارکنوں کی ہلاکت کی تحقیقات کے لیے پانچ رکنی جوائنٹ انویسٹی گیشن ٹیم تشکیل دی تھی اور اس کی رپورٹ بدھ کے روز سامنے آئی۔
جے آئی ٹی نے اپنی رپورٹ میں وزیراعلیٰ شہباز شریف اور سابق وزیر قانون پنجاب رانا ثناءاللہ خان کو بے گناہ قرار دے دیا اور کہا کہ چھان بین کے دوران یہ ثابت نہیں ہوا کہ وزیر اعلیٰ اور سابق صوبائی وزیر قانون فائرنگ کا حکم دینے والوں میں شامل ہیں۔
چار سال قبل لاہور کے ماڈل ٹاؤن میں 17 جون کو پولیس اور عوامی تحریک کے کارکنوں کے درمیان تصادم ہوا تھا جس میں عوامی تحریک کے 14 کارکن ہلاک اور سو سے زائد زخمی ہوگئے تھے۔
لارجر بنچ کا مینڈیٹ کیا ہے؟
اگست 2014 میں لاہور ہائی کورٹ نے سانحہ ماڈل ٹاؤن کے ذمے داروں کے تعین کے لیے لارجر بنچ بنانے کا حکم دیا ہے۔
عدالت نے یہ حکم ایڈووکیٹ اظہر صدیق کی درخواست پر دیا ہے جس میں انھوں سانحہ ماڈل ٹاؤن کے جوڈیشل کمیشن کی رپورٹ کو نامکمل قرار دیا تھا اور پنجاب جوڈیشل انکوائری ٹرائبیونل آرڈیننس کے اس کی شق کو چیلنج کیا تھا جس کے تحت حکومت کو اپنی مرضی سے انکوائری ٹرائبیونل بنانے اور ان کے دائرۂ کار کے تعین کا اختیار حاصل ہے۔
درخواست گزار کا کہنا ہے کہ 17 جون کو جب حکومت نے سانحہ ماڈل ٹاؤن کے لیے ایک رکنی جوڈیشل کمیشن بنایا تو اسے صرف ان وجوہات کی نشاندہی کرنے کا اختیار دیا گیا جس کے تحت منہاج القرآن سیکریٹریٹ کے باہر پولیس اور عوامی تحریک کے کارکنوں کے درمیان تصادم ہوا، جس کے دوران فائرنگ ہوئی اور 14 افراد ہلاک ہو گئے۔ کمیشن کو ذمے داروں کے تعین کا اختیار ہی نہیں دیا گیا تھا۔
اظہر صدیق کا کہنا ہے کہ 20 جون کو سانحہ ماڈل ٹاؤن جوڈیشل کمیشن کے رجسڑار نے خط بھی لکھا جس میں اختیارات بڑھانے کی استدعا کی گئی لیکن پنجاب حکومت نے بدنیتی سے ان کے اختیارات نہیں بڑھائے۔
درخواست گزار کا کہنا ہے کہ جوڈیشل انکوائری آرڈیننس کی شق 11 مارشل لا کے دور میں شامل کی گئی تھی لیکن جمہوری حکومتیں اسے اپنے سیاسی فائدے کے لیے وقتاً فوقتاً استعمال کرتی رہی ہیں۔ اسی لیے انھوں نے عدالت سے استدعا کی ہے کہ اس شق میں ترمیم کی جائے۔
لاہور ہائیکورٹ کے جسٹس امیر علی بھٹی نے اس معاملے میں بظاہر واضح قانونی ابہام سے اتفاق کرتے ہوئے معاملہ لارجر بنچ کی تشکیل کے لیے چیف جسٹس لاہور ہائیکورٹ کو بھجوا دیا ہے۔
- دولت کی عظیم منتقلی جو نوجوانوں کو ’کچھ کیے بغیر‘ ارب پتی بنا رہی ہے - 20/04/2024
- کینیڈا میں چار سو کلو خالص سونے اور لاکھوں ڈالر کی چوری کے کیس میں گرفتاریاں: ’منظم گروہ نے یہ سب نیٹ فلکس سیریز سٹائل میں کیا‘ - 20/04/2024
- انڈیا میں سول سروس کے امتحان میں کامیابی پانے والے مسلمان طلبہ: ’سخت محنت کا کوئی نعم البدل نہیں‘ - 20/04/2024
Facebook Comments - Accept Cookies to Enable FB Comments (See Footer).