محمد حفیظ نے ٹیسٹ کرکٹ کو خیرباد کہہ دیا


پاکستانی کرکٹ ٹیم کے اوپننگ بیٹسمین محمد حفیظ نے ٹیسٹ کرکٹ سے ریٹائرمنٹ کا اعلان کردیا ہے۔

بی بی سی کے نامہ نگار عبدالرشید شکور کے مطابق 38 سالہ محمد حفیظ کا کہنا ہے کہ وہ محدود اوورز کی کرکٹ پر مکمل توجہ مرکوز کرنا چاہتے ہیں اس لیے انہوں نے ٹیسٹ کرکٹ کو خیرباد کہنے کا فیصلہ کیا ہے اور اپنے اس فیصلے سے سلیکٹرز کو مطلع کردیا ہے۔

محمد حفیظ کے بارے میں مزید پڑھیے

دوسرے دن کا کھیل ختم، پاکستان 135 رنز کے خسارے میں

’مشکوک بولنگ ایکشن قانون پر طاقت اور تعلقات اثرانداز‘

’اب 25 فیصد بھی بولر نہیں رہا‘

محمد حفیظ نیوزی لینڈ کے خلاف ابوظہبی میں کھیلے جانے والے تیسرے اور آخری ٹیسٹ میچ میں پاکستانی ٹیم کا حصہ ہیں تاہم آسٹریلیا کے خلاف پہلے ٹیسٹ کی پہلی اننگز میں سنچری بنانے کے بعد سے ٹیسٹ میچوں میں ان کی کارکردگی انتہائی مایوس کن رہی ہے اور وہ اب تک سات اننگز میں صرف 66 رنز بنانے میں کامیاب ہوسکے ہیں۔

نیوزی لینڈ کے خلاف ابوظہبی ٹیسٹ کی پہلی اننگز میں محمد حفیظ بغیر کوئی رن بنائے آؤٹ ہو گئے تھے۔

پاکستان

نیوزی لینڈ کے خلاف جاری تیسرے ٹیسٹ میچ کی پہلی اننگز میں محمد حفیظ صفر پر آؤٹ ہو گئے

محمد حفیظ نے اپنے پندرہ سالہ کیریئر میں 55 ٹیسٹ میچز کھیلے جن میں وہ اب تک 37.95 کی اوسط سے 3644 رنز بنانے میں کامیاب رہے۔

انھوں نے ٹیسٹ کرکٹ میں 10 سنچریاں اور 20 نصف سنچریاں بھی سکور کی ہیں اور اپنی آف سپن بولنگ سے 53 وکٹیں بھی حاصل کیں۔

محمد حفیظ ٹیسٹ کرکٹ کے مقابلے میں محدود اوورز میں نسبتاً زیادہ کامیاب رہے ہیں۔

203 ون ڈے انٹرنیشنل میچوں میں انہوں نے 11 سنچریوں اور 34 نصف سنچریوں کی مدد سے 6153 رنز سکور کیے اور 137 وکٹیں بھی حاصل کیں۔

ٹی ٹوئنٹی انٹرنیشنل میں بھی ان کا ریکارڈ متاثر کن رہا ہے اور وہ 89 ٹی ٹوئنٹی انٹرنیشنلز میں دس نصف سنچریوں کی مدد سے 1908 رنز بنانے میں کامیاب ہوئے ہیں۔

محمد حفیظ کی آف سپن بولنگ ایک طویل عرصے سے پاکستانی ٹیم کے لیے بہت مؤثر اور کارآمد رہی لیکن بولنگ ایکشن رپورٹ ہونے اور اس پر بار بار کام ہونے کے سبب ان کی بولنگ اتنی مؤثر نہیں رہی۔

کرکٹ

محمد حفیظ کا ٹیسٹ کیریر 55 میچوں پر محیط تھا

یہی وجہ ہے کہ پاکستانی کرکٹ ٹیم کے ہیڈ کوچ مکی آرتھر انہیں اس سال زمبابوے کے دورے کے بعد پاکستانی ٹیم میں شامل کیے جانے کے حق میں نہیں تھے۔

متحدہ عرب امارات میں ہونے والے ایشیا کپ میں محمد حفیظ ٹیم میں شامل نہیں تھے لیکن ڈومیسٹک کرکٹ میں شاندار ڈبل سنچری بناکر وہ آسٹریلیا کے خلاف سیریز کے لیے ٹیم میں جگہ بنانے میں کامیاب ہوگئے تھے۔

آسٹریلیا اور نیوزی لینڈ کے خلاف ٹی ٹوئنٹی سیریز میں محمد حفیظ کی کارکردگی اچھی رہی تھی اور دبئی کے پہلے ٹیسٹ میں آسٹریلوی بولنگ کے خلاف تین ہندسوں کی قابل ذکر کارکردگی بھی دکھا گئے لیکن اس کے بعد قسمت ان سے ایسی روٹھی کہ انہیں ابوظہبی ٹیسٹ ختم ہونے کا انتظار کیے بغیر ٹیسٹ کرکٹ کے بارے میں اپنے مستقبل کا فیصلہ کرنا پڑگیا۔

کرکٹ

حفیظ نے ٹیسٹ میچوں میں 53 وکٹیں حاصل کیں

محمد حفیظ کی جانب سے ریٹائرمنٹ کے اعلان کے بعد سوشل میڈیا پر بھی ان کا نام ٹرینڈ ہونے لگا اور شائقین نے ان کے جانے پر اپنے تبصرے کیے جس میں سے ایک بڑی تعداد ان لوگوں کی تھیں جو بظاہر حفیظ کے جانے کو مثبت انداز میں دیکھ رہے ہیں۔

صارف عمر الیاس لکھتے ہیں کہ ’خدا کا شکر ہے کہ حفیظ کو احساس ہو گیا ہے کہ وہ ٹیسٹ کرکٹ کے قابل نہیں ہیں‘۔

https://twitter.com/ilyaskeaadat/status/1069949715708567552

ایک اور صارف حسنین شاہ نے حفیظ کی آخری سات ٹیسٹ اننگز کے اعداد و شمار سامنے رکھے جن کے حساب سے ان کی اوسط صرف 9 رنز فی اننگز بن رہی تھی۔

https://twitter.com/Shahhasnain69/status/1069942798646947842

محمد حفیظ کی جنوبی افریقی فاسٹ بولر ڈیل سٹین کے خلاف انتہائی ناقص کارکردگی کی وجہ سے ان کا کافی مذاق بنایا جاتا ہے اور کیونکہ پاکستان کا اگلا ٹور جنوبی افریقہ کے خلاف ہے جہاں کی پچ فاسٹ بولنگ کے لیے نہایت سازگار ہوتی ہے تو اس مناسبت سے کئی شائقین نے تبصرہ کرتے ہوئے کہا کہ سٹین کو حفیظ کے نہ ہونے سے بہت مایوسی ہوگی ۔

https://twitter.com/adnan_anxari/status/1069970215155437568

محمد حفیظ کی ٹیسٹ کرکٹ کی کارکردگی پر روشنی ڈالتے ہوئے صارف شہزاد ترمزی نے کہا کہ ’پاکستان کی جانب سے ٹیسٹ میچوں میں اوپننگ کرنے والے بلے بازوں میں سب سے زیادہ صفر پر آؤٹ ہونے والے حفیظ ہیں جن کو آٹھ مرتبہ اس ہزیمت کا سامنے کرنا پڑا ہے‘۔

https://twitter.com/shahzadtirmizi/status/1069872196682567682

ایک اور صارف نے اسی بارے میں مزید کہا کہ مختلف فارمیٹ کی کرکٹ میں اب تک حفیظ نے سٹین کا 14 اننگز میں سامنا کیا ہے جن میں سے آٹھ مرتبہ وہ انھی کے ہاتھوں آؤٹ ہوئے ہیں اور صرف 10 کی اوسط سے رنز بنائے ہیں۔

https://twitter.com/khanadanidoctor/status/1069944253961437185


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32292 posts and counting.See all posts by british-broadcasting-corp