نواز شریف کی طبی بنیادوں پر ضمانت: ’عدالت مفروضوں پر کیسے کوئی حکم نامہ جاری کر دے؟‘
پاکستان کے سابق وزیراعظم نواز شریف کی طبی بنیادوں پرضمانت کی درخواست کی سماعت کرنے والے اسلام آباد ہائی کورٹ کے بینچ نے نواز شریف کے وکیل سے کہا ہے کہ عدالت کیسے مروجہ طریقۂ کار کو نظر انداز کرکے طبی بنیادوں پر ان کے موکل کو ضمانت دے سکتی ہے۔
جسٹس عامر فاروق کی سربراہی میں اسلام آباد ہائی کورٹ کے دو رکنی بینچ نے منگل کو نواز شریف کی طبی بنیادوں پر ضمانت کی درخواست کی سماعت شروع کی تو نواز شریف کے وکیل خواجہ حارث نے اس درخواست کے حق میں دلائل دیتے ہوئے کہا کہ ان کے موکل کی صحت کے بارے میں تین میڈیکل بورڈز تشکیل دیے گئے ہیں۔
انھوں نے کہا کہ ان میڈیکل بورڈز کے چند سینئیر ڈاکٹروں نے اپنی رپورٹ میں سابق وزیر اعظم کو دل کے علاوہ ذیابیطس اور گردوں کا مرض لاحق ہونے کی تصدیق کی ہے۔
اس بارے میں مزید پڑھیے
’نواز شریف کےحوصلے بلند مگر صحت ساتھ نہیں دے رہی‘
’ابھی نواز شریف کی اینجیو گرافی کا فیصلہ نہیں ہوا‘
’نواز شریف کے دل کی حالت تسلی بخش نہیں ہے‘
نواز شریف کی طبیعت ناساز، جیل سے پیغام جاری
’جیل تو جانا ہے دعا کرو پیروں پر چل کر جائیں‘
خواجہ حارث نے عدالت کو بتایا کہ میڈیکل بورڈ نے ان بیماریوں کی مزید تشخیص اور علاج کی سفارش کی ہے۔
نامہ نگار شہزاد ملک کے مطابق کمرۂ عدالت میں موجود ڈاکٹروں کے بورڈ میں شامل ایک ڈاکٹر نے اس رپورٹ کی تصدیق کی۔
خواجہ حارث کا کہنا تھا کہ نواز شریف کو لاہور کے سروسز ہسپتال میں لے جایا گیا جہاں دل کے مرض کے علاج کے لیے نہ تو کوئی وارڈ ہے اور نہ ہی کوئی ڈاکٹر موجود ہے۔
نواز شریف کے وکیل کا کہنا تھا کہ ان کے موکل کو چند روز سروسز ہسپتال میں رکھ کر دوبارہ جیل منتقل کر دیا گیا ہے۔
خواجہ حارث نے دلائل دیتے ہوئے کہا کہ اگر کوئی مجرم ایسی بیماری میں مبتلا ہو جو کہ جان لیوا ہو تو اس کو طبی بنیادوں پر ضمانت دی جا سکتی ہے۔
انھوں نے کہا کہ اگر کسی مجرم کی اپیل کافی عرصے تک سماعت کے لیے مقرر نہ کی جائے تو ضمانت حاصل کرنا اس مجرم کا حق ہوتا ہے جس پر بینچ کے سربراہ جسٹس عامر فاروق نے ریمارکس دیتے ہوئے کہا کہ جہاں عدالت اس تاخیر کو مدنظر رکھے گی وہیں ضمانت لینے کے میرٹ کو بھی دیکھنا ہو گا۔
بینچ کے سربراہ کا کہنا تھا کہ سپریم کورٹ نے اپنے فیصلے میں اس بات کی جانب اشارہ کیا ہے کہ پارلیمان بھی ایسے مجرموں کو، جو ایسے حالات سے گزر رہے ہوں کی جلد ضمانت دینے سے متعلق قانون سازی کر سکتی ہے۔
اس سے پہلے خواجہ حارث نے پہلے سے دائر کی گئی ضمانت کی درخواست واپس لے لی اور موقف اختیار کیا کہ جب انھوں نے پہلی درخواست دائر کی تھی اس وقت نواز شریف کی صحت خراب نہیں ہوئی تھی۔
نیب کے پراسیکوٹر نے یہ درخواست واپس لینے کی مخالفت کرتے ہوئے کہا کہ اگر انھیں عدالت سے طبی بنیادوں پر دائر کی جانے والی درخواست پر ریلیف نہ ملا تو نواز شریف کے وکیل دوبارہ درخواست دائر کردیں گے۔
انھوں نے کہا کہ عدالت اس بارے میں آبزرویشن دے جس پر جسٹس عامر فاروق نے ریمارکس دیتے ہوئے کہا کہ ابھی کوئی نئی درخواست سامنے آئی ہی نہیں تو عدالت مفروضوں پر کیسے کوئی حکم نامہ جاری کر دے۔
عدالت نے درخواست کی مزید سماعت 18 فروری تک ملتوی کر دی۔
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
- یوکرین جنگ میں 50 ہزار روسی فوجیوں کی ہلاکت: وہ محاذِ جنگ جہاں روسی فوجی اوسطاً دو ماہ بھی زندہ نہیں رہ پا رہے - 18/04/2024
- دنیا کے دوسرے مصروف ترین دبئی ایئرپورٹ کی کہانی: ’یہاں حالات بدترین نہیں بلکہ خطرناک ہیں، ہمیں جانوروں کی طرح رکھا گیا ہے‘ - 18/04/2024
Facebook Comments - Accept Cookies to Enable FB Comments (See Footer).