سعودی ولی عہد محمد بن سلمان کا دورہ: سعودی عرب کو پاکستان کی ضرورت کیوں؟
’پاکستان اور سعودی عرب کے تعلقات تاریخ، مذہب اور ثقافت کے انتہائی گہرے رشتوں میں بندھے ہوئے ہیں‘ یہ وہ الفاظ ہیں جو دہائیوں سے دونوں ممالک کے سربراہان متعدد بار دہرا چکے ہیں۔
اور شاید یہ ہی وجہ ہے کہ جب بھی پاکستان کو اندرونی معاشی یا سیاسی عدم استحکام کا سامنا ہوا تو اس نے سب سے پہلے سعودی عرب سے مدد طلب کی۔
چاہے وہ جنرل ضیاالحق کے دور آمریت میں ذوالفقار علی بھٹو کی پھانسی کا معاملہ ہو یا نوے کی دہائی میں ایٹمی دھماکوں کے بعد پاکستان کو درپیش معاشی بحران یا پھر جنرل مشرف کی ڈکٹیٹرشپ کے دور میں اس وقت کے وزیر اعظم نواز شریف کو سعودی عرب کی مداخلت کے بعد رہائی کا پروانہ ملنا ہو۔ سعودی عرب نے ہمیشہ سیاسی و معاشی بحران میں مبتلا پاکستان کی مدد کرنے کی کوشش کی۔
سات دہائیوں سے قائم یہ دو طرفہ تعلقات میں پاکستان کے لیے سعودی عرب کی اہمیت کی متعدد وجوہات سامنے آئیں ہیں جن میں سب سے پہلی اور اہم مذہبی طور پر سرزمین حجاز سے عقیدت و محبت اور بیت اللہ کا ہونا ہے۔ جبکہ دیگر میں پاکستان کو سستا تیل مہیا کرنا، مالی معاونت کرنا، اندرونی سیاسی بحران میں ثالثی کا کردار ادا کرنے کے ساتھ متعدد معاملات پر بین الاقوامی سطح پر پاکستان کا ساتھ دینا۔
مگر پاکستان جس کے پاس نہ تو تیل ہے اور نہ ہی مضبوط معیشت تو ایسے میں سعودی عرب کے لیے پاکستان کیوں اہم ہے؟
اس سوال کا جواب ڈھونڈنے نکلیں تو بہت سے دلچسپ حقائق سامنے آتے ہیں۔
دفاعی اور عسکری معاونت
جب کبھی بھی سعودی عرب کو دفاعی، داخلی و خارجی سلامتی یا بین الاقوامی سیاسی میدان میں مشکل پیش آئی تو پاکستان فوراً مدد کو پہنچا ہے یہ کہنا ہے سابق وزیر خارجہ خورشید محمود قصوری کا جنھوں نے بی بی سی سے بات کرتے ہوئے کہا کہ اس خطے کی چار بڑی ریاستیں پاکستان، ایران، ترکی اور سعودی عرب مذہبی، تاریخی اور تمدنی بنیادوں پر بہت قریب ہیں اور وقت گزرنے کے ساتھ ساتھ ترکی، ایران اور سعودی عرب کے درمیان بڑھتی خلیج نے سعودی عرب کے لیے پاکستان کی اہمیت اور بھی زیادہ کر دی ہے۔
یہ بھی پڑھیے!
محمد بن سلمان کے دورہ پاکستان میں ایک دن کی تاخیر
سعودی ولی عہد کی آمد پر چار سطحوں کا سکیورٹی پلان ترتیب
’اب پیسے دیں تو بھی لوگ سعودی عرب نہیں جانا چاہتے‘
’سعودی عرب نے خاشقجی قتل کی تحقیقات میں رکاوٹیں ڈالیں‘
سعودی حکمرانوں کا پاکستان پر اعتماد ہے، پاکستان نے گذشتہ ساٹھ برسوں میں متعدد بار سعودی عرب کی سلامتی اور دفاع کےلیے مدد فراہم کی ہے۔ پاکستان نے نہ صرف سعودی عرب کی فوج کی تربیت سازی میں اہم کردار ادا کیا بلکہ سعودی سلطنت کے استحکام پر بھی تعاون فراہم کیا ہے۔
سعودی عرب میں تعینات پاکستان کے سابق سفیر اور ڈی جی آئی ایس آئی جنرل اسد درانی نے اس پر رائے دیتے ہوئے کہا کہ عسکری و دفاعی تعاون کے ساتھ ساتھ سعودی عرب پاکستان کو قابل اعتماد دوست ملک تصور کرتا ہے جو اس کو ہر مشکل کے وقت ایک بہتر مشورہ دے سکتا ہے۔
دفاعی تجزیہ کار جنرل ریٹائرڈ امجد شعیب کا کہنا تھا کہ سعودی عرب کے ساتھ سنہ 1983میں کیے جانے والا دفاعی معاہدہ جس پر پاکستان آج بھی قائم ہے اور جس کے نتیجہ میں پاکستان نے اس وقت بہت سے فوجی دستے سعودی عرب کی سرزمین کے دفاع کے لیے فراہم کیے تھے اس کی اہمیت کو اجاگر کردیتا ہے۔
انھوں نے مزید کہا کہ اب اس وقت وہاں پاکستانی فوجیوں کی دس ہزار سے بھی کم تعداد موجود ہے لیکن سعودی عرب کو یقین ہے کسی بھی ہنگامی صورتحال میں پاکستان اس کی سالمیت کا دفاع ضرور کرے گا۔
پاکستان کی ایٹمی صلاحیت
اس ضمن میں پاکستان کا واحد اسلامی ایٹمی قوت ہونا بھی اس کو سعودی عرب کے لیے اہم بناتا ہے کیونکہ وہ سمجھتے ہیں کہ اسرائیل کے خلاف پاکستان بطور ایٹمی ریاست ان کی ڈھال ہے۔ حالانکہ سعودی عرب کا امریکہ سے دفاعی، معاشی اور تجارتی تعلق بہت مضبوط ہے لیکن ان کو اپنی داخلی اور خارجی سلامتی کے حوالے سے اس پر اعتبار نہیں ہے۔
سفارتی سطح پر پاکستان کی ضرورت
سابق وزیر خارجہ خورشید قصوری نے اس بارے میں بات کرتے ہوئے کہا کہ پاکستان اور سعودی عرب کی درمیان عسکری تعلقات، سفارتی تعلقات سے زیادہ گہرے اور مضبوط ہونے کے باوجود سعودی عرب کو مسلم دنیا سمیت بین الاقوامی سطح پر پاکستان کی سفارتی حمایت کی بھی ضرورت ہے جس کی مثال ہمیں صحافی خاشقجی کے قتل کے معاملےمیں ملتی ہے۔
جنرل ریٹائرڈ اسد درانی کا کہنا تھا کہ سفارتی سطح پر سعودی عرب کے ایران اور ترکی سے بڑھتے اختلافات بھی پاکستان کو ان کی نظر میں اہم بناتی ہے۔ لیکن سعودی عرب پر یہ حقیقت بھی آشکار ہے کہ پاکستان ان ممالک کی ساتھ اس کی وجہ سے اپنے تعلقات خراب نہیں کرے گا۔
جنرل ریٹائرڈ امجد شعیب نے اس بارے میں رائے دیتے ہوئے کہا کہ اس وقت سعودی عرب کو اسلامی دنیا کے اندر سے چیلجنز کا سامنا ہے مثلاً ترکی اور قطر سے معاملات خراب ہیں، یمن سے بھی جنگ لڑ رہا ہے اور ایران پہلے اس کے خلاف ہے ایسے میں اگر وہ پاکستان کو بھی نظر انداز کردے گا تو اسلامی دنیا میں سعودی عرب کے ہاتھ میں رہ کیا جائے گا۔
واشنگٹن ڈی سی میں سنٹر فار گلوبل پالیسی کی سنیر رکن اور انٹرنیشنل جیو پولیٹکس کے ماہر ڈاکٹر کامران بخاری نے بی بی سی سے بات کرتے ہوئے کہا سعودی عرب کی دنیا بھر کو خام تیل کی برآمد کے باوجود وہ اب تک سیاسی اور عسکری طور پر ایک کمزور ریاست ہے۔ وہ سمجھتے ہیں کہ سعودی عرب گذشتہ سات آٹھ برسوں سے عالمی سطح پر مختلف شعبوں میں خودمختاری حاصل کرنے کی کوشش کر رہا ہے جس میں وہ پاکستان کو اپنے لیے اہم معاون سمجھتا ہے۔
یمن جنگ اور پاکستان
سابق وزیر خارجہ خورشید قصوری کا کہنا ہے کہ ان دو طرفہ تعلقات کو ایک بڑا دھچکا یمن کی جنگ کے دوران لگا جب سعودی عرب نے پاکستان سے عسکری مدد طلب کی لیکن پاکستان نے یمن میں فوج نہ بھیجنے اور اس جنگ میں فریق نہ بننے کا درست فیصلہ کیا تھا۔
تاہم اس معاملے کو اس وقت کی حکومت نے سفارتی سطح پر اچھی طرح ہینڈل نہیں کر سکی۔ جس کے سبب پاک سعودی تعلقات میں کچھ سرد مہری بھی آئی۔ جس کے بعد سعودی عرب نے انڈین وزیر اعظم نریندر مودی کو دورے پر نہ صرف خوش آمدید کہا بلکہ ان کو سعودی عرب کا سب سے بڑا قومی ایوارڈ بھی دیا گیا جو اس وقت پاکستان سے ناراضی کا ایک اظہار بھی تھا۔
جبکہ پاکستان انسٹی ٹیوٹ آف پیس سٹڈیز کے سربراہ اور دفاعی تجزیہ کارعامر رانا کا کہنا ہے کہ یمن کے معاملے پر پاکستان اور سعودی عرب کی درمیان دہائیوں سے قائم دو طرفہ تعلقات میں اعتماد کی فضا کو ٹھیس نہیں پہنچی۔
سعودی معیشت میں پاکستان کا کردار
جنرل ریٹائرڈ امجد شعیب نے تبصرہ کرتے ہوئے بتایا کہ پاکستان کی ضرورت یا اہمیت کی ایک اور بڑی وجہ سعودی حکومت کا صنعتی پیداوار بڑھانے اور اس کے ذریعےمعیشت کی بہتری کا پلان ہے۔ جس کے تحت سعودی عرب اپنے مالی مفادات کو مدنظر رکھتے ہوئے گوادر کی بندرگاہ میں سرمایہ کاری کررہا ہے۔
ان کا کہنا تھا کہ سعودی عرب مستقبل میں اپنی معیشت کا ڈھانچہ تبدیل کرنا چاہتا ہے اور اپنا انحصار تیل کی آمدن پر کم کرکے معیشت کا رخ موڑنا چاہتا ہے۔ جس کے لیے اس کو مختلف منڈیوں کی تلاش ہے اور پاکستان 20 کروڑ کی آبادی کے ساتھ ایک ممکنہ بزنس مارکیٹ کے طور پر موجود ہے۔
کچھ ایسے ہی خیالات کا اظہار ڈاکٹر کامران بخاری نے بھی کیا کہ سعودی عرب اب تیل سے ہٹ کر دیگر ذرائع آمدن کے مواقع پیدا کرنا چاہتا ہے۔ جب ایران انڈیا کے تعاون سے چاہ بہار بندرگاہ پر کام کر رہا ہے جس کا اثر خلیج فارس کی دیگر بندرگاہوں پربھی مرتب ہونے کا امکان ہے ایسے میں پاکستان کی نئی بندرگاہ گوادر میں سرمایہ کاری کرنا سعودی عرب کے اپنے مفاد میں ہے۔
57 ممالک پر مشتمل اسلامی دنیا کا مرکز سمجھے جانے والی اس ریاست میں سب سے زیادہ بیرونی افرادی قوت پاکستانیوں کی ہے اور یہ تعداد 22 لاکھ سے زیادہ بتائی جاتی ہے۔
بدلتا افغانستان اور پاکستان کی ضرورت
افغان امن عمل کے تحت امریکہ اور طالبان کے مابین مذاکرات کے نتیجہ میں مستقبل میں بدلتے افغانستان پر سعودی عرب کے کردار پر بات کرتے ہوئے جنرل ریٹائرڈ امجد شعیب کا کہنا تھا کہ پاکستان نے ابتدائی مذاکرات میں سعودی عرب کو بٹھا کرعالمی تنہائی سے نکالا ہے اور خطے میں اس کی حیثیت کو بحال کرنے میں مدد دی ہے۔
جبکہ عامر رانا کا کہنا تھا کہ ماضی میں افغان جہاد میں سعودی عرب کا کردار ضرور رہا ہے مگر وقت کے ساتھ اس نے اس معاملے سے خود کو علیحدہ کیا تھا۔ لیکن اب ہونے والی ایک پیش رفت جس کا تعلق براہ راست مشرق وسطی سے ہے، جب طالبان نے اپنا دفتر قطر میں قائم کیا جس کے بعد خطے میں اپنا کنٹرول برقرار رکھنے کے لیے طالبان اور افغان امن عمل ان کے لیے اہم بن گیا ہے اور یہ سب پاکستان کی براہ راست مدد کی بنا ممکن نہیں ہے۔
ایران اور مذہبی مسلک پر اثر
یمن ہو یا شام، عراق ہو یا بحرین شیعہ سنی کشمکش جہاں جہاں نظر آتی ہے وہاں سعودی عرب اور ایران کے پس پردہ ملوث ہونے کے الزامات کبھی کھلے بندھوں اور کبھی ڈھکے چھپے الفاظ میں لگائے جاتے ہیں۔
پاکستان میں بھی صورت حال مختلف نہیں ہے اور گذشتہ تقریباً دو دہائیوں سے ملک میں فرقہ واریت کے بڑھتے ہوئے مسئلہ کو دبے دبے الفاظ میں ایران اور سعودی عرب کے درمیان ‘پراکسی وار’ یا بالواسط لڑائی کا شاخسانہ قرار دیا جاتا ہے۔
سعودی عرب اور ایران کی طرف سے فرقہ وارانہ تنظیموں کی مالی معاونت کے بارے میں عوامی حلقوں میں پائی جانے والی بے چینی سفارتی مصلحتوں کے باوجود عوام کے لبوں پر بھی آ جاتی ہے۔
اس بارے میں عامر رانا کا کہنا ہے ملک میں موجود اہل تشیعہ آبادی کوئی بہت بڑی وجہ نہیں ہے لیکن ہم اس کو نظر انداز نہیں کرسکتے کیونکہ پاکستان ایران کا نہ صرف ہمسایہ ملک ہے بلکہ پاکستان کے ابتدائی 35-36 برسوں میں ایران کے ساتھ بہت قریبی تعلقات رہے ہیں۔
جبکہ ڈاکٹر کامران بخاری نے بی بی سی سے بات کرتے ہوئے کہا گریٹر مشرق وسطی میں پاکستان کی حمایت حاصل کرنا اور خصوصاً پاکستان کی بڑی تعداد میں شعیہ آبادی اس کو سعودی عرب کے نقطہ نظر سے اہم بناتا ہے۔
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
- یوکرین جنگ میں 50 ہزار روسی فوجیوں کی ہلاکت: وہ محاذِ جنگ جہاں روسی فوجی اوسطاً دو ماہ بھی زندہ نہیں رہ پا رہے - 18/04/2024
- دنیا کے دوسرے مصروف ترین دبئی ایئرپورٹ کی کہانی: ’یہاں حالات بدترین نہیں بلکہ خطرناک ہیں، ہمیں جانوروں کی طرح رکھا گیا ہے‘ - 18/04/2024
Facebook Comments - Accept Cookies to Enable FB Comments (See Footer).