پاکستان، آسٹریلیا سیریز: ’سرفراز کو ٹیم کے ساتھ یو اے ای میں ہونا چاہیے‘

  •  
  •  
  •  
  •  
  •  
  •  
  •  
  •  
  •  
  •  
  •  
  •  

سرفراز احمد

AFP

پاکستانی کرکٹ ٹیم کے کپتان سرفراز احمد کو آسٹریلیا کے خلاف ون ڈے سیریز میں آرام دینے کے فیصلے پر شروع ہونے والی بحث میں شدت آتی جارہی ہے۔

سرفراز احمد کی ٹیم کوئٹہ گلیڈی ایٹرز کے ہیڈ کوچ معین خان نے کہا ہے کہ سرفراز احمد کو آرام دینے کی صورت میں بھی انہیں ٹیم کے ساتھ متحدہ عرب امارات میں ہونا چاہیے۔

یہ بھی پڑھیے

کیا سرفراز احمد کو آرام دینا بہت ضروری تھا؟

سرفراز کو آرام، شعیب ملک کپتانی کرینگے

’زیادہ کرکٹ سے کہیں کھلاڑی ان فٹ نہ ہو جائیں‘

آسٹریلیا کے خلاف ایک روزہ میچوں کی سیریز رواں ماہ متحدہ عرب امارات میں ہونے جا رہی ہے۔

نامہ نگار عبدالرشید شکور کے مطابق معین خان کا کہنا ہے کہ سرفراز احمد کو آرام کی یقیناً ضرورت تھی کیونکہ وہ پچھلے چند ماہ سے مسلسل کھیلتے آ رہے ہیں اور یہ بھی سمجھتے ہیں کہ سلیکٹرز نے یہ اہم فیصلہ ان سے مشاورت کر کے ہی کیا ہو گا۔

ہمیں اس فیصلے کا احترام کرنا چاہیے کہ اس کا تعلق کسی بھی کرکٹر کی انفرادی حیثیت سے ہوتا ہے کہ وہ کتنا کھیلنا چاہتا ہے اور اسے آرام کی کتنی ضرورت ہے۔

معین خان کا یہ بھی کہنا ہے کہ اگر سرفراز احمد کو آرام دینا ضروری بھی تھا تب بھی انہیں ٹیم کے ساتھ ہونا چاہیے کیونکہ وہ ورلڈ کپ کے لیے پاکستانی کرکٹ ٹیم کے کپتان بنائے گئے ہیں اور بہتر ہوتا کہ وہ ٹیم کے ساتھ رہ کر اس کی حکمتِ عملی اور کارکردگی پر نظر رکھتے کیونکہ ان کا ہر فیصلے میں شامل ہونا بہت ضروری ہے۔

معین خان سے جب پوچھا گیا کہ کیا سرفراز احمد کو پاکستان سپر لیگ کے آخری لیگ میچ میں بھی آرام دیا جا سکتا ہے تو انہوں نے کہا کہ اس کی کوئی ضرورت نہیں ہے۔ سرفراز کی کوئٹہ گلیڈی ایٹرز میں موجودگی بہت ضروری ہے۔

یاد رہے کہ کوئٹہ گلیڈی ایٹرز کی ٹیم نو میچز میں چودہ پوائنٹس کے ساتھ سرِفہرست ہے اور وہ پلے آف میں اپنی جگہ بنا چکی ہے۔

وہ اپنا آخری لیگ میچ اتوار کے روز کراچی کنگز کے خلاف کھیلے گی۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 10742 posts and counting.See all posts by british-broadcasting-corp