چلغوزے کی ہوشربا قیمت کی وجہ کیا ہے؟

محمد کاظم - بی بی سی اردو ڈاٹ کام، کوئٹہ

  •  
  •  
  •  
  •  
  •  
  •  
  •  
  •  
  •  
  •  
  •  
  •  

چلغوزے

BBC

ایک وقت تھا جب پاکستان کے صوبہ بلوچستان کے دارالحکومت کوئٹہ میں چلغوزے اتنی بڑی مقدار میں دستیاب ہوتے تھے کہ عام ریڑھیوں پر اس کے ڈھیر لگے نظر آتے تھے لیکن اب تو یہ دکانوں میں بھی کھلے پڑے نظر نہیں آتے، جبکہ مہنگے اتنے کہ کوئی غریب اس کو خریدنے کا سوچ بھی نہیں سکتا ہے۔

آخر یہ متوسط اور غریب طبقات سے روٹھ کیوں گیا؟ شاید اس کی بہت ساری وجوہات ہوں گی لیکن اس کی تجارت سے وابستہ افراد دو باتوں پر متفق ہیں۔ ان میں سے ایک یہ کہ چلغوزے زیادہ تر باہر ایکسپورٹ ہو رہے ہیں جبکہ دوسری اس کی پیداوار کا خشک سالی سے متاثر ہونا ہے۔

ایران اور افغانستان سے سرحد لگنے کے باعث کوئٹہ کی خشک فروٹ مارکیٹ کا شمار پاکستان کی سب سے بڑی مارکیٹوں میں ہوتا ہے۔

یہ بھی پڑھیے

سردیوں کی خاص سوغات

جنگلات کی کٹائی سے کیا نقصان ہوتا ہے؟

’دادا ابو کیا آپ کے دادا قبضہ گیر تھے‘

اس مارکیٹ میں واقع دبئی ڈرائی فروٹ کے مالک اور 20 سال سے خشک فروٹ کے کاروبار سے وابستہ حاجی روزی خان اچکزئی نے اس کی سب سے بڑی وجہ ایکسپورٹ بتاتے ہوئے کہا کہ یہ زیادہ تر چین جاتے ہیں۔

تاہم ان کا کہنا تھا کہ انھیں یہ نہیں معلوم کہ یہ چین کیوں زیادہ جا رہا ہے آیا وہ اس کو کھاتے ہیں یا کوئی دوائی وغیرہ بناتے ہیں۔

انھوں نے بتایا کہ چلغوزے کے درخت بلوچستان کے ضلع ژوب کے پہاڑوں میں ہوتے ہیں جبکہ ژوب کا یہ پہاڑی سلسلہ آگے افغانستان تک جاتا ہے۔ اس لیے اس پار افغانستان میں بھی اس کے درخت ہیں۔

ان کا کہنا تھا کہ ان وجوہات کے باعث گذشتہ چند سالوں کے دوران اس کی قیمت 1،200 روپے سے بڑھ کر 6،000 روپے تک پہنچ گئی ہے۔ تاہم بغیر پالش شدہ یا اس سے کم کوالٹی چلغوزہ فی کلو 3،500 سے 4،000 روپے میں بھی ملتا ہے۔

چلغوزے

BBC

انھوں نے بتایا کہ مہنگائی کے باعث اب بہت کم ایسے لوگ رہ گئے ہیں جو ایک کلو چلغوزہ خریدتے ہوں بلکہ اب ان کی دکان میں چلغوزہ خریدنے والوں میں سے زیادہ تر ایک چھٹانک تو کوئی آدھا پاؤ خریدتا ہے۔

خشک فروٹ مارکیٹ میں واقع ایک بڑی دکان النصیب ڈرائی فروٹ میں مردان سے تعلق رکھنے والے ایک سرکاری افسر محمد عامر خان موجود تھے۔

انھوں نے خشک فروٹ کی خریداری کرتے ہوئے ایک کلو چلغوزہ بھی خریدا۔ ان کا کہنا تھا کہ مہنگائی کی وجہ سے سارے خشک فروٹس کی قیمتوں میں اضافہ ہوا ہے لیکن چلغوزے کی خریداری تو اب لوگوں کے بس سے باہر ہو گئی ہے۔

اس دکان کے مالک عبد المجید نے بتایا کہ سنہ 1996 میں ایک کلو چلغوزہ 120 روپے میں دستیاب ہوتا تھا۔

چلغوزے

BBC

ان کا کہنا تھا کہ سنہ 1998 تک چلغوزے سڑکوں پر ریڑھیوں میں فروخت ہوتے تھے۔

عبد المجید کے مطابق سنہ 2001 کے بعد اس کی قیمت میں اچانک اضافہ ہوا اور اس کے فی کلو قیمت 1،000 روپے سے بھی زیادہ ہو گئی۔

انھوں نے بتایا کہ اس وقت چلغوزے کے جو بڑے تاجر تھے وہ یہ کہا کرتے تھے کہ افغانستان میں تورا بورا کے پہاڑی علاقے میں امریکیوں یا دیگر ممالک نے جو بمباری کی اس کے باعث چلغوزے کے درخت جل گئے۔

چلغوزے

BBC

عبد المجید کا کہنا تھا کہ جہاں اس کی ایک وجہ یہ بتائی جا رہی ہے وہاں خشک سالی سے بھی اس پر اثر پڑا ہے۔

’سنہ 2001 کی دہائی کے وسط کے بعد بظاہر اس کی پیداوار 30 فیصد رہ گئی۔ اب اس 30 فیصد کا ایک بڑا حصہ چین جا رہا ہے۔ جس طرح پشتون گوشت کو زیادہ پسند کرتے ہیں، اسی طرح چینیوں کے کھانے پینے میں جو سب سے پسندیدہ اور مرغوب اشیا ہوتی ہیں ان میں چلغوزہ شامل ہے۔‘

چلغوزے

BBC

عبد المجید نے بتایا کہ چین جانے کے ساتھ ساتھ یہ عرب ممالک بھی جا رہا ہے جس سے اس کی قیمتوں میں اضافہ ہو رہا ہے۔

ان کا کہنا تھا کہ عرب ممالک میں چھلکے کے ساتھ نہیں بلکہ صرف اس کا مغز جاتا ہے۔ جب اس کا چھلکا اتار دیا جاتا ہے تو اس کی قیمت اور بڑھ جاتی ہے۔

انھوں نے بتایا کہ عرب کھڈی کباب کے ساتھ جو چاول پکاتے ہیں وہ اس میں چلغوزہ ملا کر کھاتے ہیں اور یہی وجہ ہے کہ سنہ 1990 کی دہائی کے وسط تک 200 روپے فی کلو بکنے والے چلغوزے کی قیمت اب 6،000 روپے تک پہنچ گئی ہے۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 9931 posts and counting.See all posts by british-broadcasting-corp