تعمیراتی کام سکھا کر یو ٹیوب پر لاکھوں مداح بنانے والی خاتون
چار سال پہلے پلوما سانتوس کا خواب تھا کہ وہ لوگوں کو فیشن یا سفر کرنے پر مشورے دے کر سوشل میڈیا پر مشہوری حاصل کریں گی۔
لیکن مسئلہ یہ تھا کہ انھوں نے کبھی سیتے لاگواس کے شہر سے باہر قدم نہیں رکھا تھا، 237،000 باشندوں کا جنوب مشرقی برازیل میں ایک ایسا شہر جہاں وہ آج بھی رہتی ہیں اور میک اپ لگانا تو ان کو آتا ہی نہیں تھا۔
لیکن اب ان کے یو ٹیوب چینل (پلوما سپریانو) کے 625،000 سبسکرائبرز ہیں۔ ساحلوں اور لپ سٹکوں کے بجائے، یہ 25 سال کی نوجوان خاتون تعمیراتی کام پر بات کرتی ہیں۔
یہ بھی پڑھیے
یو ٹیوب سے 22 ملین ڈالر کمانے والا بچہ
انڈیا کی یو ٹیوب ’سٹار‘ کی ویڈیوز کہاں گئیں؟
یو ٹیوب سے سیکھ کر طیارہ بنانے والا مکینک
یہ برازیل کی واحد خاتون ہیں جن کا اس مخصوص موضوع پر چینل ہے۔
ان کے ابتدائی منصوبے میں بدلاؤ ان کی والدہ ایوون کی وجہ سے آیا۔
ماں بیٹی کی ٹیم
پلوما نے بی بی سی برازیل کو بتایا کہ ’انھوں نے کہا کہ مجھے فرشی ٹائلز لگانے کی ویڈیو بنانی چاہیے۔ مجھے پہلے تو یہ مشورہ کچھ خاص پسند نہیں آیا لیکن میں نے پھر بھی کر لیا۔‘
ان کی اب تک کی 75 لاکھ بار دیکھی جانے والی سب سے مشہور ویڈیو میں وہ دیوار کو پلستر کرنا سکھاتی ہیں۔
ان کے یو ٹیوب پر دیگر تعمیرات کے چینلز سے زیادہ مداح ہیں اور انسٹا گرام پر 45،000 سے زیادہ فالوؤرز بھی۔
ان کی دیگرویڈیوز میں وہ گھر پر خود کرنے والے کام سکھاتی ہیں جیسے کہ فرش پر ٹائلز لگانا، نلکہ لگانا یا دیوار بنانا۔
پلوما کی ویڈیوز میں یہ سب کرنے کے آسان طریقے بتائے جاتے ہیں۔
’میں لوگوں کو دکھاتی ہوں کہ اگر میں کر سکتی ہوں تو سب کر سکتے ہیں۔‘
ضرورت ایجاد کی ماں ہے
پلوما نے تعمیراتی کام مجبوری سے سیکھا جب ایوون اور ان کو مل کر اپنے دو کمرے کے گھر میں کام کروانا تھا لیکن ان کے پاس پیسے نہیں تھے۔
ان کی والدہ کے دوستوں نے اس 25 سالہ لڑکی کو بنیادی ہنر سکھایا اور جلد ہی پلوما کو اس کام سے پیار ہو گیا۔
تعمیراتی کام کی وجہ سے انھوں نے سنہ 2013 میں سول انجنیئرنگ کے لیے یونیورسٹی جانے کا ارادہ کیا۔ لیکن پہلے ہی سیمسٹر میں یو ٹیوب چینل کو زیادہ توجہ دینے کے لیے پڑھائی چھوڑ دی۔
پلوما کا ماننا ہے کہ گھر کا کام خود کرنے سے انھوں نے کم از کم 7،000 ڈالر بچائے ہیں۔
’میں اتنا خرچہ ویسے کبھی بھی خود نہیں اٹھا پاتی۔‘
ایک ایسے شعبے میں کام کرنے کے لیے جہاں مرد حاوی ہیں، پلوما کے لیے سب سے بڑی مثال ایوون ہی تھیں۔ انٹرنیشنل لیبر آرگنائزیشن کے مطابق برازیل کے تعمیراتی سیکٹر میں خواتین کی شرکت صرف 3.2 فیصد ہے۔
پلوما کہتی ہیں ’میری ماں سب کچھ کرتی ہیں۔ جب ہم چھوٹے تھے تو وہ صبح پانچ بجے اٹھ کر پیسے کمانے کے لیے زمینوں پر کام کرتی تھیں۔‘
’ان کے عزم سے مجھے جذبہ ملتا ہے۔‘
تاہم پلوما کے بہن بھائی نے مختلف انداز اپنائے ہیں۔ ان کی دو بہنیں تعمیراتی کام سے دور رہتی ہیں جبکہ ان کا 13 سالہ بھائی پاؤلو ان کی ویڈیوز بنانے میں مدد کرتا ہے۔
’اس نے ابھی تک خود کام کرنا نہیں سیکھا لیکن میں اس کو سکھا رہی ہوں۔‘
تاہم ان کے بہت سے فالوؤرز نے اس بات پر ’حیرانگی‘ ظاہر کی ہے کہ پلوما یہ کام کر رہیں ہیں نہ کہ پاٰؤلو۔
صنفی تعصب
وہ یاد کرتے ہوئے بتاتی ہیں ’پہلے مجھے بڑا دکھ ہوتا تھا جب لوگ کہتے تھے کہ یہ کام میں خود نہیں کر رہی اور ضرور اس کے پیچھے کوئی مرد ہو گا۔‘
جلد ہی ان کو صنفی تعصب پر مبنی کلامات سننے کو ملے، خصوصاً تعمیراتی صنعت میں کام کرنے والے مردوں سے۔
’مثلاً جب میں کہتی تھی کہ کوئی چیز ایک طرح سے ہونی چاہیے تو کوئی نہ کوئی مرد مجھ سے اختلاف کر کے کہتا تھا کہ میں غلط ہوں۔‘
https://www.instagram.com/p/BsWIp7igWIn/
’لیکن آخر کار میں صحیح کہہ رہی تھی۔ کچھ لوگوں کو وہاں غلطیاں نکالنے کا شوق ہوتا تھا جہاں کوئی نہیں ہوتیں۔‘
پلوما اب ایسے کمنٹس کو نظر انداز یا ڈیلیٹ کر دیتی ہیں لیکن ان کو اب بھی ایسے لوگوں پر غصہ آتا ہے جو ’مجھے صنفی نظر سے دیکھتے ہیں۔‘
ان کے مداح میں 60 فیصد مرد ہیں لیکن وہ کہتی ہیں ان میں خواتین کی تعداد بڑھتی جا رہی ہے۔ ان خواتین مداح کے تبصرے بھی حوصلہ افزا ہوتے ہیں۔
ایک نے لکھا ’اپنے کام پر بہت مبارک ہوں۔ آپ کی ویڈیوز کی وجہ سے میں گھر پر مزدور کے بغیر کام ختم کر چکی ہوں۔‘
ایک اور خاتون نے لکھا ’میں اپنے شوہر کا انتظار کرتے کرتے تنگ آ گئی تو میں نے خود کام کرنے کی کوشش کی۔‘
اپنا کام خود کریں
پلوما کے پاس اپنا کاروبار بڑھانے کا ایک طریقہ ہے۔ وہ مزید خواتین کو خود اپنا کام کرنے کے قابل بنانا چاہتی ہیں۔
وہ پوچھتی ہیں ’اگر میں سیمنٹ کا ستون کسی انجنئیرنگ کی ڈگری کے بغیر بنا سکتی ہوں تو آپ شاور کیوں نہیں لگا سکتے؟‘
پلوما کا ماننا ہے کہ خواتین یہ کام تب بھی سیکھ سکتی ہیں اگر انھوں نے خود کرنا بھی نہ ہو۔
’سوال یہ نہیں کہ وہ خود کر پائیں گی یا نہیں، بلکہ یہ کہ ان کے پاس اتنی معلومات ہو کہ کوئی ان کا فائدہ نہ اٹھا سکے۔‘
پلوما نے ایک اور یقین کا اظہار بھی کیا۔
’ہمیں مردوں کو یہ دکھانا ہے کہ ہمیں ان کی اتنی ضرورت نہیں جتنی انھیں لگتا ہے۔‘
پیشہ ور یو ٹیوبر
پلوما اس سے پہلے سیلز اور ٹائیپنگ کا کام کر چکی ہیں اور پیسے کمانے کے لیے سڑک پر اشتہار بانٹ چکی ہیں، کہتی ہیں کہ وہ ’خود ان ویڈیوز کو ریکارڈ، ایڈٹ اور پروڈیوس کرتی ہیں۔‘
تمام ویڈیوز ایک ہی کیمرے سے بنائی جاتی ہیں اور تقریباً ایک سے دو دن میں مکمل ہوتی ہیں۔
ان کے موضوعات ایسی ضروریات پر مبنی ہوتے ہیں جن کا پلوما کو گھر پر سامنا کرنا پڑتا ہے۔
وہ کہتی ہیں ’گھر کے سارے کام میں خود کرتی ہوں۔ میں نے دیواروں کو رنگ کیا ہے، الماریاں بنائیں ہیں، یہاں تک کہ سوئمنگ پول بھی تعمیر کیا ہے۔‘
وہ خاتون جو کبھی سفر کرنے کے بارے میں لکھنا چاہتی تھی آج سفر کر کے لوگوں کو تعمیرات پر ٹریننگ بھی دیتی ہیں۔
اس پیسے سے وہ اشتہارات پر ڈگری کر رہی ہیں اور رشتہ داروں کی مدد کر رہی ہیں۔
’میں جانتی ہوں کہ سب خواتین کی زندگیاں ایک جیسی نہیں ہوتیں، لیکن میرے خیال سے سب کو ہر وقت اپنے اوپر شک کرنے اور اتنا سوچنے کے بجائے ایسی چیزوں پر کام شروع کر دینا چاہیے جو وہ چاہتی ہیں۔‘
’جب وہ ہو جائے تو پھر آپ اس پر تجزیہ کر کے اس سے سیکھتے ہیں۔‘
- خاتون فُٹ بال شائق کو گلے لگانے پر ایرانی گول کیپر پر 30 کروڑ تومان جُرمانہ عائد: ’یہ تاریخ میں گلے ملنے کا سب سے مہنگا واقعہ ثابت ہوا‘ - 24/04/2024
- ’مغوی‘ سعودی خاتون کراچی سے بازیاب، لوئر دیر سے تعلق رکھنے والا مبینہ ’اغوا کار‘ بھی زیرِ حراست: اسلام آباد پولیس - 24/04/2024
- جنوبی کوریا کے ’پہلے اور سب سے بڑے‘ سیکس فیسٹیول کی منسوخی: ’یہ میلہ خواتین کے لیے نہیں کیونکہ ٹکٹ خریدنے والے زیادہ تر مرد ہیں‘ - 24/04/2024
Facebook Comments - Accept Cookies to Enable FB Comments (See Footer).