ہاٹ کراس بنز: گذ فرائیڈے پر مسکیٹا بیکری کی خاص سوغات
پاکستان کے شہر کراچی کے علاقے صدر میں واقع کئی دہائیوں پرانی مسکیٹا بیکری پر معمول سے زیادہ ہی رش ہے۔ دیکھنے میں تو یہ ایک عام سی بیکری ہے جس میں تمام سال کیک، بسکٹس اور بیکری سے متعلق دیگر اشیا فروخت کی جاتی ہیں۔
لیکن مسیحی تہوار گُڈ فرائیڈے پر اس بیکری میں تیار کی گئی اس تہوار کی خاص سوغات ہاٹ کراس بنز اپنے منفرد ذائقے کے لیے دنیا بھر میں مشہور ہیں۔
کاونٹر کے پیچھے خریداروں کو بنز حاصل کرنے کے لیے مخصوص ٹوکن دیتے سید حیدر عباس زیدی اس بیکری کا انتظام چلانے والے خاندان کی تیسری نسل سے ہیں۔
ان کا دعوٰی ہے کہ مسکیٹا بیکری کے ہاٹ کراس بنز کی مقبولیت کا راز ان کی تیاری میں استعمال ہونے والے مصالحوں کا وہ خاص فارمولا ہے جو کئی دہائیوں سے ان کے خاندان کے پاس محفوظ ہے۔
حیدر عباس زیدی کے مطابق بنز کی تیاری کے لیے درکار اجزا کی خریداری ایک ماہ پہلے شروع کی جاتی ہے جبکہ تندور میں بنز تیار کرنے کا مرحلہ گُڈ فرائیڈے سے ایک دن پہلے شروع ہوتا ہے۔
دن گزرنے کے ساتھ ساتھ مسکیٹا بیکری کے سامنے خریداروں کا رش بڑھتا جا رہا ہے۔ سینکڑوں لوگ قطار میں لگے ٹوکن ہاتھ میں لیے اپنی باری کا انتطار کر رہے ہیں جبکہ بیکری کا عملہ کمال پھرتی سے مطلوبہ تعداد میں بنز لفافوں میں ڈال کر خریداروں کے حوالے کر رہا ہے۔
انھی خریداروں میں شامل پادری انیل شاہانی گزشتہ تیس سال سے یہاں کے ہاٹ کراس بنز استعمال کر رہے ہیں اور ان کی اعلیٰ کوالٹی کے معترف ہیں۔
چند قدم دور کھڑے فرانسس الفانسو ان بنز کو مذہب سے زیادہ روایت سے جوڑتے ہیں۔ ان کا کہنا ہے کہ گذشتہ پچاس سال سے ہر گُڈ فرایئڈے پر مسکیٹا بیکری سے یہ بنز خرید کر اپنے دوستوں اور رشتے داروں کے ساتھ شیئر کرنا ان کے خاندان کی پرانی ریت ہے۔
ہاٹ کراس بنز مسیحی برادری کے تہوار گڈ فرائیڈے سے منسلک تو ہیں ہی لیکن مسکیٹا بیکری کے باہر کھڑے خریداروں میں اکثریت دیگر مذاہب سے تعلق رکھتی ہے۔
حیدر عباس زیدی کہتے ہیں کہ ‘عیسائی افراد کے علاوہ مسلمان، پارسی اور ہندو مذہب سے تعلق رکھنے والے افراد بھی ہماری بیکری میں تیار کیے گئے بنز خریدتے ہیں۔’
اپنے لذیذ ہاٹ کراس بنز کی بدولت مسکیٹا بیکری کراچی کے ثقافتی ورثے کا اہم حصہ بن چکی ہے۔ حیدر عباس زیدی کے مطابق ان کی بیکری کے بنز نا صرف پاکستان بلکہ بیرون ملک بھی مقبول ہیں۔
‘سمندر پار پاکستانی جب امریکا، کینیڈا اور آسڑیلیا جاتے ہیں تو بڑی تعداد میں یہ بنز اپنے ساتھ لے جاتے ہیں۔ اکثر تو ان کو فریز کر کے کئی کئی مہینے استعمال کرتے ہیں۔’
ادھر گرماگرم ہاٹ کراس بنز سے بھرے تھیلے اٹھائے بیکری سے نکلتے صدر کے پرانے رہائشی سید جعفری کے چہرے کی مسکراہٹ بتا رہی ہے کہ ان کی محنت وصول ہوئی۔
وہ کہتے ہیں کہ وہ کیا ان کا پورا گھرانہ مسکیٹا بیکری کے بنز کا گرویدہ ہے اور گڈ فرائیڈے اور ایسٹر کا تہوار اپنے عیسائی دوستوں کے ساتھ مل کر مناتا ہے۔ وہ جاتے جاتے رکتے ہیں اور کہتے ہیں ‘خوشیاں تو سب کی سانجھی ہوتی ہیں۔’
.
- مبینہ امریکی دباؤ یا عقلمندانہ فیصلہ: صدر ابراہیم رئیسی کے دورہ پاکستان کے دوران ’ایران، پاکستان گیس پائپ لائن‘ منصوبے کا تذکرہ کیوں نہیں ہوا؟ - 23/04/2024
- گردوں کی آٹھ عام بیماریوں کی علامات کیا ہوتی ہیں؟ - 23/04/2024
- برطانیہ پناہ کے خواہشمند غیر قانونی تارکین وطن کو روانڈا کیوں بھیج رہا ہے؟ - 23/04/2024
Facebook Comments - Accept Cookies to Enable FB Comments (See Footer).