آزاد ملک میں بات کہنے کی ضمانت لازم ہے


پاکستان میں انسانی حقوق اور شہری آزادیوں کا سوال بڑا پیچیدہ ہے۔ اس باب میں صرف انسانی حقوق کے علم برداروں اور صحافیوں کو ہی شکایات نہیں، بلکہ بسا اوقات خود وہ لوگ بھی شکوہ کرتے نظر آتے، جو مقبول سیاست دان ہیں، اور ان کا شمار حکمران اشرافیہ میں ہوتا ہے۔ یہ وہ لوگ جب وہ بر سر اقتدار ہوتے ہیں، تو ان کو پاکستان دنیا کا آزاد ترین ملک نظر آتا ہے، جس میں ہر شخص کو اظہار رائے سمیت تمام بنیادی حقوق حاصل ہیں۔

سابقہ حکم رانوں کا تو اپنے دور حکومت میں یہ دعوی رہا ہے کہ پاکستان میں پریس کو یورپ اور امریکہ سے زیادہ آزادی حاصل ہے، اور یہاں کے رہنے والے لوگوں کو مغربی ممالک سے زیادہ انسانی حقوق حاصل ہیں۔ لیکن اقتدار سے فارغ ہونے کے بعد ان کو صورت حال اس کے برعکس دکھائی دینے لگتی ہے۔ اقتدار سے باہر آ کر ان کا خیال یہ ہوتا ہے کہ پاکستان میں انسانی حقوق اور شہری آزادیوں پر سخت قدغن ہے، اکثر صحافی جانب دار یا بکے ہوئیے ہیں، اور حکمران جابر اور ظالم ہیں۔

اور اپنے آئینی حقوق کے تحفظ کے لیے ان کو سپریم کورٹ کے دروازے پر دستک دینی پڑتی ہے۔ اس سلسلے میں حا لیہ لانگ مارچ اور اس دوران رونما ہونے والے واقعات ایک دلچسپ کیس ہے۔ کچھ عرصہ پہلے جب اس پارٹی کی حکومت کے خلاف حزب مخالف جلسے اور دھرنے کر رہی تھی، تو اس وقت ان کا لب و لہجہ مختلف تھا، وہ ان کو اظہار رائے کی حدود و قیود پر لیکچر دیتے تھے۔ اور انسانی حقوق اور اظہار رائے جیسی آزادیوں کے سوال پر ان کے جوابات لگ بھگ وہی تھے، جو آج کی حکومت کے ہیں۔

اقتدار کے ایوانوں سے ہو کر حکمران اشرافیہ کو اپنے سب سیاسی مخالفین شر پسند، غیر محب وطن، غدار اور تخریب کار لگنے لگتے ہیں۔ یہ صورت حال اس بات کی عکاس ہے کہ پاکستان کا آئین تحریری طور پر شہریوں کو اظہار رائے سمیت تمام انسانی حقوق کی ضمانت تو دیتا ہے، لیکن عملی طور پر حکمران طبقات کا طرز عمل بالکل مختلف ہوتا ہے۔ اور سیاسی پارٹیوں اور سیاسی رہنماؤں کے لیے عوامی حمایت اور طاقت حاصل کے باوجود حکومت وقت سے آئین میں دیے گتے حقوق حاصل کرنا مشکل ہوتا ہے۔

اس عمل سے یہ اندازہ لگایا جا سکتا ہے کہ کمزور اور غیر مراعات یافتہ طبقات کو اپنے آئینی حقوق کے حصول کے لیے کس طرح کی مشکلات کا سامنا کرنا پڑتا ہے۔ اظہار رائے کی آزادی کا مسئلہ صرف سیاست کاروں اور پریس والوں کو ہی در پیش نہیں ہے، اس باب میں پاکستان کی ایکڈیمیا کئی زیادہ مشکلات کا شکار ہے، اور پاکستان کا آئین دوسرے شہریوں کی طرح اساتذہ کو بھی اظہار رائے کی برابر ضمانت دیتا ہے، لیکن عملی طور پر اس شعبے میں صورت حال نا گفتہ بہہ ہے۔

کسی چینی نقاد نے کہا تھا، ہم چین میں ہر شخص کو اپنی بات کہنے کی آزادی کی گارنٹی تو دے سکتے ہیں، مگر بات کہنے کے بعد اس کی جان کی حفاظت کی ضمانت نہیں دے سکتے۔ پاکستان کے ماحول میں یہ بات اساتذہ پر صادق آتی ہے۔ اساتذہ کرام اظہار رائے کا اظہار کریں تو ان کی ملازمت کی کوئی ضمانت نہیں رہتی۔ گزشتہ چند برسوں میں چند نامور پروفیسر اس قسم کی صورت حال سے گزر چکے ہیں۔ اس سلسلے میں پاکستان میں جو ماحول ہے، وہ شاید سو سال پہلے مغرب کے کچھ ملکوں میں رائج تھا۔

جہاں ایسے ممبران منتخب ہو کر آتے تھے، جن کی اپنی تعلیم واجبی یا نہ ہونے ہونے کے برابر ہوتی تھی اور وہ اساتذہ کو بتاتے تھے کہ یونیورسٹی اور کالج میں کیا پڑھانا چاہیے اور کیا نہیں، اور اس سلسلے میں قانون سازی کرتے تھے۔ اس قانون سازی کی وجہ سے دلچسپ واقعات پیش آتے تھے، جن کو آج نصاب میں پڑھایا جاتا ہے، اور امریکہ کی نئی نسل ان کو حیرت و افسوس سے پڑھتی ہے۔ اس طرح کا ایک دلچسپ واقعہ جولائی انیس سو پچیس میں رونما ہوا۔

جان ٹی سکوپ ایک امریکی ریاست ٹینیسی میں ہائی سکول ٹیچر تھا۔ سکوپ پر الزام لگایا گیا کہ اس نے سکول کے بچوں کو ارتقا کی تھیوری پڑھائی ہے۔ اس مقدمے کا پس منظر ریاست ٹینیسی کا ایک قانون تھا، جسے بٹلر ایکٹ کہا جاتا تھا۔ یہ قانون سرکاری سکولوں کے اساتذہ کو انسان کے ارتقا کے بارے میں مروجہ بیانیہ سے انکار کرنے سے منع کرتا تھا۔ یہ اس مروجہ کہانی کے مقابلے میں انسانی ارتقا کا کوئی نیا سائنسی یا عقلی نظریہ بھی پڑھانے سے منع کرتا تھا۔

یہ قانون ٹینسی کی مجلس ایوان نمائندگان کے ممبر جان واشنگٹن بٹلر نے پیش کیا تھا، جس کی وجہ سے یہ قانون بٹلر ایکٹ کے نام سے مشہور ہوا۔ اس ایکٹ کی عبارت یہ تھی کہ ریاست کے کسی پبلک سکول یا یونیورسٹی میں جس میں سرکاری فنڈنگ ہوتی ہے کے کسی استاد کے لیے یہ غیر قانونی ہو گا کہ وہ کوئی ایسی تھیوری پڑھائیے جو انسانی تخلیق کے بارے میں بیان کردہ کہانی سے انکار کرتی ہو، یا کوئی ایسا نظریہ پڑھائے جس میں یہ بیان کیا گیا ہو کہ انسان کی موجودہ شکل ارتقائی عمل کا نتیجہ ہے۔

اس قانون میں خاص بات یہ تھی کہ انسان کے علاوہ یہ قانون جانوروں، چرند پرند، کیڑے مکوڑوں اور دوسری مخلوقات میں ارتقا کے نظریے کو پڑھانے سے نہیں روکتا تھا۔ یہاں تک کہ بندروں کے بارے میں ارتقا کی تھیوری پڑھانے پر بھی پابندی نہیں تھی، یعنی آپ ارتقا کا نظریہ تو پڑھا سکتے تھے، مگر اس میں انسان کا ذکر کرنے پر پابندی تھی۔ دلچسپ بات یہ تھی کہ یہ قانون لانے والا ممبر مسٹر بٹلر خود ایک کسان تھا، جو سائنس اور مذہب کے بارے میں واجبی سی معلومات رکھتا تھا۔

ایک رپورٹر کے سوال کے جواب میں اس نے بڑی دیانت داری سے تسلیم کیا کہ جس وقت میں نے یہ بل پیش کیا میں ارتقا کے نظریے کے بارے میں کچھ نہیں جانتا تھا۔ میں نے صرف اخبارات میں پڑھا تھا کہ لڑکے لڑکیاں سکول سے واپس آ کر والدین سے انسانی ارتقا کے بارے میں مروجہ نظریات کے خلاف باتیں کرتے ہیں۔ اس عوامی نمائندے نے اس سلسلے میں ولیم برائن کے لیکچر کی کاپی میں چارلس ڈارون کے نظریہ ارتقا کے بارے میں پڑھ کر یہ فیصلہ کر لیا کہ ارتقا کا نظریہ خطرناک ہے، اور اس کو پھیلنے سے روکنے کے لیے بل پیش کر دیا، جس کے نتیجے میں بٹلر ایکٹ معرض وجود میں آیا، اور بالآخر اس ایکٹ کے تحت سکول ٹیچر کے خلاف مقدمہ قائم کر لیا گیا۔

اس مقدمے میں استغاثہ اور صفائی کے لیے ملک کی مشہور وکلا نے حصہ لیا، اور مشہور شخصیات نے پیش ہوئیں۔ اس مقدمے کو بے پنا شہرت ملی۔ یہ امریکہ کی تاریخ کا پہلا مقدمہ تھا، جو نیشنل ریڈیو پر براہ راست نشر ہوا، اور پوری دنیا میں اسے شہرت حاصل ہوئی۔ لطف کی بات یہ ہے کہ یہ قانون انیس سو ستا سٹھ تک ریاست ٹینیسی کی قانون کی کتابوں میں موجود رہا۔ انیس سو ستا سٹھ میں ایک اور استاد گیری ایل سکاٹ کو ارتقا کا سائنسی نظریہ پڑھانے کے الزام میں معطل کیا گیا۔

سکاٹ نے اظہار آزادی رائے اور امریکی آئین کی پہلی ترمیم کا سہارا لیتے ہوئیے اپنی بحالی کی اپیل کر دی۔ اس اپیل کے فوراً بعد ریاست کی قانون ساز اسمبلی نے اس قانون کو ختم کرنے کا بل پاس کر لیا۔ پاکستان میں بھی امریکہ کی طرح پارلیمان اور عوام میں کئی بٹلرز موجود ہیں، اور ایکڈیمیا سمیت زندگی سے ہر شعبے سے تعلق رکھنے والے لوگوں کو آزادی اظہار رائے اور شہری آزادیوں پر آئینی ضمانت کے باوجود عملی طور پر مسائل کا سامنا کرنا پڑتا ہے، جس کا حل عالمی سطح پر تسلیم شدہ بنیادی حقوق اور شہری آزادیوں کا تحفظ اور احترام ہے۔


Facebook Comments - Accept Cookies to Enable FB Comments (See Footer).

Subscribe
Notify of
guest
0 Comments (Email address is not required)
Inline Feedbacks
View all comments