نایاب معدنیات تجارتی جنگ میں چین کا ٹرمپ کارڈ؟
چین ایسے اشارے دے رہا ہے کہ اگر امریکہ کے ساتھ تجارتی جنگ شدت پکڑتی ہے تو وہ امریکہ کی ان نایاب معدنیات تک رسائی کو ختم یا محدود کر سکتا ہے جس سےامریکہ کی کئی صنعتوں کو نقصان ہو سکتا ہے۔
نایاب معدنیات جنھیں ’ریئر ارتھ‘ کے طور پر جانا جاتا ہے، ان کی نوے فیصد سے زیادہ مقدار صرف چین میں پائی جاتی ہے۔ یہ معدنیات بجلی سے چلنے والی کاروں، موبائل فون جیسی مصنوعات کی تیاری میں انتہائی اہمیت رکھتی ہیں۔
گذشتہ برس امریکہ کے جیالوجیکل سروے نے ان معدنیات کو ملکی دفاع اور ملکی معیشت کے لیےانتہائی ضروری قرار دیا تھا۔
چین کے سرکاری اخبار گلوبل ٹائمز نے ایک ٹوئٹ میں کہا ہے کہ چین نایاب معدنیات کی امریکہ برآمد کو روکنے پر سنجیدگی سے غور کر رہا ہے۔
نایاب معدنیات کیا ہیں؟
ریر ارتھ سترہ مختلف معدنیات کا ایک گروپ ہے جو مختلف صنعتی شعبوں میں استعمال ہوتی ہیں جن میں دوبارہ قابل استعمال ہونے والی ٹیکنالوجی، آئل ریفائنری، الیکٹرانکس اور شیشے کی صنعت شامل ہیں۔
کہنے کو تو انھیں نایاب کہا جاتا ہے لیکن امریکہ جیالوجیکل سروے کے مطابق یہ زمین کی پرت میں وافر مقدار میں پائی جاتی ہیں لیکن دنیا میں صرف چند جگہیں ہیں جہاں انھیں نکالا جاتا ہے۔
یہ بھی پڑھییے
امریکہ، چین کی شدت اختیار کرتی تجارتی جنگ
تجارتی جنگ پر چین کی امریکہ کو سخت تنبیہ
چین اور امریکہ کی تجارتی جنگ، چین کا جوابی اقدام
ان معدنیات کو نہ صرف نکالنا مشکل ہے بلکہ وہ ماحول کی خرابی کا بھی سبب بنتی ہیں۔
ان نایاب معدنیات کی 70 فیصد مقدار صرف چین میں پائی جاتی ہے۔ چین کے علاوہ میانمار، آسٹریلیا، امریکہ کے علاوہ چند اور ممالک صرف تھوڑی سی مقدار نکالتے ہیں۔
ان معدنیات کو صاف کرنے کے حوالے سے چین کا غلبہ اور زیادہ ہے اور دنیا بھر میں قابل استمعال اوکسائیڈ کا نوے فیصد چین میں پایا جاتا ہے۔
چین کے علاوہ صرف ایک آسٹریلین کمپنی ملائیشیا میں یہ معدنیات نکالتی ہے۔
چین کے سرکاری اعداد و شمار کے مطابق پچھلے پانچ برسوں میں نایاب معدنیات کی برآمد میں دوگنا اضافہ ہوا ہے۔
امریکہ کا چین پر کتنا بھروسہ ہے؟
امریکہ نایاب معدنیات کا ستر فیصد چین سے درآمد کرتا ہے۔
امریکہ فرانس، ایسٹونیا اور جاپان سے بھی تیار شدہ نایاب معدنیات درآمد کرتا ہے لیکن یہ تمام ممالک بھی خام مال چین سے ہی درآمد کرتے ہیں۔
امریکہ میں ایک کان نایاب معدنیات کو نکال کر اسے پراسیسنگ کے لیے چین بھیجتی ہے اور تجارتی جنگ ہونے کے بعد اس پر 25 فیصد درآمدی ڈیوٹی عائد کی جا چکی ہے۔
امریکہ کے پاس ایک راستہ ہے کہ وہ ان نایاب معدنیات کو ملائیشیا سے درآمد کرے لیکن اس کی مقدار امریکی طلب سے کہیں کم ہے۔
ملائیشیا کی حکومت ماحولیاتی خدشات کی وجہ سے ان نایاب معدنیات کی پیداوار کو روکنے کی دھمکی دی چکی ہے۔
کیا امریکہ نایاب معدنیات کی صنعت کو ترقی دے سکتا ہے؟
یہ ممکن ہے لیکن اس کے لیے وقت اور سرمایہ کی ضرورت ہو گی۔ درحقیقت امریکہ 1980 تک یہ نایاب معدنیات سب سے زیادہ پیدا کرتا تھا۔
چین ماضی میں بھی نایاب معدنیات کی برآمد کو محدود کر چکا ہے۔ 2010 میں جاپان کے ساتھ کچھ جزیروں کی ملکیت کے تنازعہ کی وجہ سے چین نے ان نایاب معدنیات کی جاپان برآمد کو محدود کر دیا تھا۔
اگر چین نے ان معدنیات کی امریکہ کو برآمد روک دی یا محدو د کر دیا اس سے امریکہ کی کھربوں ڈالر مالیت کی کئی صنعتوں پر منفی اثر پڑے گا۔
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
- یوکرین جنگ میں 50 ہزار روسی فوجیوں کی ہلاکت: وہ محاذِ جنگ جہاں روسی فوجی اوسطاً دو ماہ بھی زندہ نہیں رہ پا رہے - 18/04/2024
- دنیا کے دوسرے مصروف ترین دبئی ایئرپورٹ کی کہانی: ’یہاں حالات بدترین نہیں بلکہ خطرناک ہیں، ہمیں جانوروں کی طرح رکھا گیا ہے‘ - 18/04/2024
Facebook Comments - Accept Cookies to Enable FB Comments (See Footer).