ورلڈ کپ میں آخر بیلز کیوں نہیں گر رہی ہیں؟


سٹمپس اور زنگس گلیاں

سٹمپس پر رکھی زنگس بیلز

انڈیا بمقابلہ آسٹریلیا: عالمی کپ 2019

آسٹریلوی اننگز کا دوسرا اوور تھا اور گیند انڈین بولر جسپریت بمراہ کے ہاتھوں میں تھی۔

آسٹریلیا کے بیٹسمین ڈیوڈ وارنر کے بیٹ سے گیند لگی اور سٹمپس سے ٹکرائی۔ بمراہ خوشی میں اچھل پڑے لیکن یہ کیا! بیلز ایک بار پھر سے نہیں گریں۔

ان دنوں ورلڈ کپ 2019 میں بیلز کے سٹمپس سے نہ گرنے پر بحث جاری ہے کیونکہ اصول کے مطابق بغیر بیلز گرے بیٹسمین کو آؤٹ قرار نہیں دیا جا سکتا خواہ گیند سٹمس کو ہی کیوں نہ لگی ہو۔

رواں ورلڈ کپ میں اب تک پانچ بار ایسا واقعہ رونما ہوا جب گیندیں سٹمپس کو چھو کر گزریں لیکن بیلز نہیں گریں۔

سٹمپس آسٹرلیا بمقابلہ ویسٹ انڈیز

آخر ایسا کیوں ہو رہا ہے؟

اس کی وجہ رواں ورلڈ میں استعمال کی جانے والی مخصوص ‘زنگ بیلز’ ہیں جن میں فلیش لائٹس لگی ہوئی ہیں۔ کہا جا رہا ہے کہ ان کی وجہ سے ان گلیوں کا وزن زیادہ ہو گيا ہے۔

آسٹریلوی کپتان ایرون فنچ نے اس بارے میں کہا: ‘میرے خیال سے نئے لائٹس والے سٹمپس کے ساتھ بیلز کچھ وزنی ہو گئی ہیں جس کی وجہ سے انھیں گرانے میں کچھ زیادہ ہی زور کی ضرورت ہے۔’

جبکہ بعض لوگوں کا خیال ہے کہ سٹمپس پر بیلز کو رکھنے کے لیے جو گڑھے بنائے جاتے ہیں وہ اس بار ذرا زیادہ گہرے ہیں اس لیے بیلز جھٹکے کے بعد بھی ان میں پھنس کر رہ جاتی ہیں۔

تاہم انٹرنیشنل کرکٹ کونسل نے بیلز کے نہ گرنے کی اس وجہ کو تسلیم نہیں کیا ہے۔ ان کا کہنا ہے کہ ان بیلز کا وزن عام بیلز اور تیز ہوا کے دوران وزنی بیلز کے درمیان کا ہے۔

لیکن چونکہ ورلڈ کپ کے 14 میچز میں پانچ بار ایسا ہوا کہ سٹمپس سے گیند کے چھو جانے کے باوجود بیلز نہیں گریں اس لیے ان کے متعلق سوال اٹھائے جا رہے ہیں۔

رواں ورلڈ کپ میں کب کب بیلز نہیں گریں ان پر ایک نظر ڈالتے ہیں:

کرکٹ

انگلینڈ بمقابلہ جنوبی افریقہ

جنوبی افریقہ کی اننگز کا 11واں اوور

انگلینڈ کے لیگ سپنر عادل رشید نے جنوبی افریقہ کے اوپنر کوینٹن ڈی کاک کو بولنگ کی۔

ڈیکاک لیگ سٹمپ پر گرنے والی گیند کو ریورس سویپ کرنے کی کوشش کی لیکن بال بیٹ سے لگ کر آف سٹمپس لگتی ہوئی وکٹ کیپر کے پیچھے نکل گئی۔ لیکن نہ جانے کیا ہوا کہ بیلز نہیں گری۔

انگلینڈ کے کھلاڑیوں نے سمجھا کہ ڈی کاک بولڈ ہو گئے ہیں لیکن بیلز نہیں گریں اور ڈی کاک کو چار رنز مل گئے۔

سری لنکا بمقابلہ نیوزی لینڈ

نیوزی لینڈ بمقابلہ سری لنکا

سری لنکا کی اننگز کا چھٹا اوور

نیوزی لینڈ کے فاسٹ بولر ٹرینٹ بولٹ نے سری لنکا کے بیٹسمین کرونارتنے کو بالنگ کی۔ کرونارتنے نے اگیسٹ دی سوئنگ کٹ کرنے کی کوشش کی۔ گیند بلے کا اندرونی کنارہ لے کر سٹمپس کو چھوتی ہوئی نکل گئی۔ ری پلے میں نظر آیا کہ بیلز قدرے ہلیں لیکن گرنے کے بجائے پھر اپنی جگہ پر واپس بیٹھ گئیں۔

نیوزی لینڈ کے کھلاڑیوں کو مایوسی ہوئی اور کرونا رتنے خوش قسمت قرار پائے۔

گیل

گیل نے فورا ریویو لے لیا

آسٹریلیا بمقابلہ ویسٹ انڈیز

ویسٹ انڈیز کی اننگز کا تیسرا اوور

آسٹریلوی فاسٹ بولر مچل سٹارک نے ویسٹ انڈیز کے اوپنر کرس گیل کو گیند کی اور وکٹ کیپر کے ہاتھوں کیچ ہونے کی اپیل کی۔ امپائر نے کھٹ کی کوئی آواز سنی تھی اس لیے انھوں نے کرس گیل کو آؤٹ قرار دیا۔ کرس گیل کو پتا تھا کہ گیند ان کے بیٹ کو نہیں لگی ہے اس لیے انھوں نے فوراً ڈی آر ایس کا استعمال کیا۔

ری پلے اور جائزے سے پتا چلا کہ گیند کرس گیل کے بیٹ کو نہیں بلکہ سٹمپس کو چھو کر وکٹ کیپر کے ہاتھوں میں گئی تھی۔ کرس گیل کے چہرے پر مسکراہٹ تھی، ایرون فنچ نے سر پر اپنا ہاتھ رکھا ہوا تھا اور امپائر کو اپنا فیصلہ بدلنا پڑا۔

انگلینڈ بمقابلہ بنگلہ دیش

انگلینڈ بمقابلہ بنگلہ دیش

بنگلہ دیش کی اننگز کا 46 واں اوور

انگلینڈ کے بولر بین سٹوکس نے شارٹ پچ گیند پھینکی۔ سیف الدین شاٹ لگانے کے لیے اکراس دی لائن چلے گئے۔ گیند ان کے جسم سے ٹکرا کر سٹمپ کے ساتھ ٹکرانے کے بعد واپس آ گئی۔ لیکن پھر بھی بیلز نہیں گریں۔

22 سالہ آل راؤنڈر سیف الدین بھی خوش قسمت نکلے اور انگلینڈ کے کھلاڑیوں کے چہرے پر حیرت اور پھیکی مسکراہٹ تھی۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32296 posts and counting.See all posts by british-broadcasting-corp