سعودی عرب: ابہا کے ہوائی اڈے پر ’حوثی باغیوں کے میزائل حملے‘ میں 26 زخمی
سعودی عرب کے سرکاری ذرائع ابلاغ کا کہنا ہے کہ ملک کے جنوب مغربی علاقے میں واقع شہر ابہا کے ہوائی اڈے پر حوثی باغیوں کے میزائل حملے میں متعدد شہری زخمی ہو گئے ہیں۔
یمن میں جاری لڑائی میں شریک سعودی اتحاد کی قیادت نے کہا ہے کہ حوثیوں کی جانب سے ابہا ایئرپورٹ پر ایک میزائل فائر کیا گیا جس کے گرنے سے 26 افراد زخمی ہوئے ہیں۔
سعودی فوجی ترجمان کے حوالے سے بتایا گیا ہے کہ زخمی ہونے والوں میں تین بچے اور دو عورتیں بھی شامل ہیں۔
خیال رہے کہ بدھ کی صبح حوثیوں نے کروز میزائل کے ذریعے ایئرپورٹ کو نشانہ بنانے کا دعویٰ کیا تھا۔ حوثی باغیوں کا دعویٰ ہے کہ میزائل حملے کے بعد ابہا ایئرپورٹ پر فضائی آپریشن معطل کر دیا گیا تھا۔
یہ گزشتہ چند ہفتوں کے دوران حوثیوں کا سعودی عرب میں کسی ہوائی اڈے پر دوسرا حملہ ہے۔
اس سے قبل مئی کے تیسرے ہفتے میں حوثیوں نے جنوبی سعودی صوبے نجران میں ایئرپورٹ پر اسلحے کے ایک ڈپو کو نشانہ بنایا تھا۔
حوثیوں کے المصیرہ ٹی وی کی ویب سائٹ پر شائع ہونے والی رپورٹ کے مطابق اِس حملے میں ’کے ٹو قصیف ڈرون’ کا استعمال کیا گیا ہے۔ حوثیوں کے مطابق اِس حملے کے بعد وہاں آگ بھڑک اٹھی۔
سعودی عرب کی سرکاری خبررساں ایجنسی کے مطابق اِس حملے کی تصدیق کرتے ہوئے یمن میں سعودی اتحاد کے ترجمان نے کہا ہے کہ دھماکہ خیز مواد سے لیس ایک ڈرون کے ذریعے اہم تنصیبات کو نشانہ بنایا گیا جو عام لوگوں کے زیرِ استعمال تھیں۔
اس سے قبل سعودی ٹی وی العربیہ کی ویب سائٹ نے عینی شاہدین کے حوالے سے خبر دی تھی کہ ‘مکہ کو میزائل سے نشانہ بنانے کی حوثی باغیوں کی کوشش کو ناکام بنایا گیا ہے۔’
جبکہ حوثی باغیوں نے ان خبروں کی سختی سے تردید کی تھی کہ انھوں نے مسلمانوں کے مقدس ترین شہر مکہ کو میزائل سے نشانہ بنانے کی کوشش کی ہے۔
ایران اور سعودی عرب کے درمیان کشمکش کے باعث یہ خطہ اِس وقت کشیدگی کا شکار ہے۔
- انڈیا میں الیکشن کے پہلے مرحلے کا آغاز جہاں کروڑپتی امیدوار ووٹ کے لیے پیسے کے علاوہ سونا اور چاندی بھی استعمال کرتے رہے - 19/04/2024
- سڈنی شاپنگ مال حملہ: آسٹریلیا میں ’بہادری کا مظاہرہ‘ کرنے والے زخمی پاکستانی سکیورٹی گارڈ کو شہریت دینے پر غور - 19/04/2024
- مرنے سے قبل چند افراد کو اپنے وہ پیارے کیوں دکھائی دیتے ہیں جو پہلے ہی مر چکے ہوتے ہیں؟ قریب المرگ افراد کے تجربات - 18/04/2024
Facebook Comments - Accept Cookies to Enable FB Comments (See Footer).