پومپیو کا دورہ افغانستان: ’امریکہ افواج نکالنے کے لیے تیار ہے، وقت کا تعین نہیں کیا‘


مائیک پومپیو

مائیک پومپیو منگل کو افغانستان کے غیر اعلانیہ دورے پر کابل پہنچے جہاں انھوں نے افغان صدر اشرف غنی اور چیف ایگزیکٹو عبداللہ عبداللہ سے ملاقات کی

امریکی وزیر خارجہ مائیک پومپیو نے کہا ہے کہ امریکہ افغانستان سے اپنی افواج نکالنے کے لیے تیار ہے، ’لیکن واشنگٹن نے طالبان کو فوج کے انخلا کی کوئی ٹائم لائن نہیں دی ہے۔

پومپیو منگل کو افغانستان کے غیر اعلانیہ دورے پر کابل پہنچے جہاں انھوں نے افغان صدر اشرف غنی اور چیف ایگزیکٹو عبداللہ عبداللہ کے ساتھ ملاقاتیں کیں۔ تینوں رہنماؤں نے اس بات سے اتفاق کیا ہے کہ افغانستان میں امن قائم کرنا ان کی اولین ترجیح ہے۔

مائیک پومپیو کا یہ بھی کہنا تھا کہ امریکہ افغانستان امن معاہدے کے حوالے سے پاکستان کی جانب سے عملی اقدامات کی توقع رکھتا ہے۔

امریکی وزیر خارجہ کا دورہ امریکی حکام اور طالبان کے درمیان امن مذاکرات کے ساتویں مرحلے کے آغاز سے قبل سامنے آیا۔

امریکہ اور افغان طالبان کے درمیان ہونے والے مذاکرات کے بارے میں مزید پڑھیے

’مذاکرات میں پیشرفت، کچھ معاملات اب بھی حل طلب ہیں‘

’پاکستان کا طالبان پر پہلے جیسا اثر و رسوخ نہیں رہا‘

طالبان کے ساتھ امن معاہدے کے مسودے پر ’اتفاق‘

افغان مذاکرات: دباؤ، حربے اور مفادات

مائیک پومپیو

مائیک پومپیو کو امید ہے کہ افغانستان میں 28 ستمبر کو ہونے والے صدارتی انتخابات سے قبل طالبان کے ساتھ امن معاہدہ ہو جائے گا

انھوں نے کہا ہے کہ انھیں امید ہے کہ افغانستان میں رواں برس 28 ستمبر کو ہونے والے افغان صدارتی انتخابات سے قبل افغانستان میں امن معاہدہ ہو جائے گا۔

افغان چینل تولو نیوز کے مطابق مائیک پومپیو کا کہنا تھا ’مجھے امید ہے کہ یکم ستمبر سے قبل امن معاہدہ ہو جائے گا اور یہی ہمارا مشن ہے۔‘

امریکا اور طالبان کے درمیان مذاکرات میں افغانستان سے امریکی فوج کے انخلا کے وقت پر غور کیا جائے گا، جبکہ طالبان سے یہ ضمانت لی جائے گی کہ افغان سرزمین سے مستقبل میں کوئی حملہ نہیں ہو گا۔

مائیک پومپیو

پومپیو کا کہنا تھا کہ امریکہ افغان امن معاہدے کے حوالے سے پاکستان کی جانب سے عملی اقدامات کی توقع رکھتا ہے

واضح رہے کہ افغان فوج کی تربیت، معاونت اور مدد کے لیے امریکا کی سربراہی میں نیٹو مشن کے 20 ہزار غیر ملکی فوجی اہلکار افغانستان میں تعینات ہیں جن میں سے زیادہ تر امریکی ہیں۔

امریکا نے غیر ملکی افواج کے انخلا کے بدلے میں طالبان سے اس بات کی ضمانت کا مطالبہ کیا تھا کہ دہشت گرد حملوں کے لیے افغانستان کی سرزمین کو استعمال نہیں کیا جائے گا۔

افغان طالبان اور امریکہ کے درمیان مذاکرات رواں برس جنوری میں دوحا میں شروع ہوئے تھے۔

دوحا مزاکرات میں امریکہ کی نمائندگی امریکہ کے خصوصی ایلچی زلمے خلیل زاد کر رہے تھے۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32296 posts and counting.See all posts by british-broadcasting-corp