نیا عالمی نظام اور اسلامی سوشلزم


پاکستان کا معاشی اور سیاسی بحران ایک مقامی مسئلہ ہے، لیکن یہ مسئلہ عالمی معاشی و سیاسی نظام کے ساتھ بہت مضبوطی سے جڑا ہوا ہے۔ اس مسئلے کو عالمی سرمایہ داری نظام کے بحران اور مسائل سے الگ کر کہ نہیں دیکھا جا سکتا۔ اس وقت نیو ورلڈ آرڈر یا نئے عالمی نظام کے تحت دنیا کے مختلف ممالک کی اکثریت نیو لبرل ازم کے معاشی و جمہوری تصورات کے تابع ہے۔ نوبت یہاں تک پہنچ چکی ہے کہ روس اور چین نے نیو ورلڈ آرڈر کے خلاف فروری میں جو طویل مشترکہ اعلامیہ جاری کیا تھا، اس میں بھی نیو لبرل ازم کے معاشی و جمہوری نظام کو چیلنج کرنے کے بجائے اس کے ساتھ اپنی وابستگی کا اظہار کیا تھا۔

انہوں نے دوسرے الفاظ میں اس نظام کے خاتمے کے بجائے اس کو منصفانہ بنانے اور سب کو شریک کرنے کی بات کی تھی۔ یہ اس بات کا اظہار ہے کہ دنیا میں حکمران اشرافیہ بیشتر مسائل کا حل صرف سرمایہ داری نظام کے تحت ڈھونڈنے کی کوشش کر رہی ہے۔ اس سلسلے میں کئی بھی حکمران اشرافیہ کسی متبادل نظام یا راستے پر غور کرنے کے لیے تیار نہیں ہے۔ دوسری طرف دنیا میں بے شمار دانش وروں اور معاشیات کے ماہرین کا خیال ہے کہ دنیا میں ایک نئے منصفانہ نظام کے قیام اور دولت کی منصفانہ تقسیم کے لیے متبادل نظام پر غور کی ضرورت ہے۔

تاریخ کے ہر دور میں دنیا میں ایک سے زائد معاشی و سیاسی نظام رائج رہے ہیں۔ انسان نے مختلف اوقات میں اپنے اپنے انداز میں ان نظاموں کا تجربہ کیا ہے۔ ان میں سے کئی تجربات اپنے وقت کے حساب سے کامیاب رہے ہیں۔ اس باب میں نے ان ہی سطور میں تاریخی سوشلزم، یوٹوپیائی سوشلزم، تھیوکریٹک سوشلزم، کرسچن سوشلزم، بدھسٹ سوشلزم اور اسلامی سوشلزم کا جائزہ لیا تھا۔ یہ سارے نظریے بنیادی طور پر دنیا میں طبقاتی تقسیم کے خاتمے اور ایک منصفانہ نظام کے قیام کی خواہش پر مبنی تھے۔

گزشتہ کالم میں یہ جائزہ لیا تھا کہ کس طرح دنیا کے مختلف ممالک میں اسلامی سوشلزم کے نام پر سوشلسٹ تحریکیں اٹھتی رہی۔ مصر، ایران، روس، اور دیگر ممالک میں ان تحریکوں نے عوام کی وسیع حمایت حاصل کی۔ اسی طرح بر صغیر پاک و ہند میں بھی اسلامی مساوات اور اسلامی سوشلزم کے نظریات کو کافی مقبولیت حاصل رہی ہے۔ جنوبی ایشیا میں مشہور عالم دین اور ہندوستان کی آزادی کے اہم رہنما عبیداللہ سندھی نے اسلام اور سوشلزم کے درمیان مشترکات کا پرچار کیا۔

عبید اللہ سندھی نے انیس سو دس کی دہائی میں افغانستان کے راستے روس کا سفر کیا۔ وہ بالشویک انقلاب کے بعد انیس سو تئیس تک سویت یونین میں مقیم رہے، جہاں انہوں نے سوشلزم کا گہرا مطالعہ کیا، اور سوشلسٹ انقلابیوں کے ساتھ طویل بحث و مباحثہ کیا۔ بعد ازاں وہ روس سے ترکی چلے گئے، جہاں انہوں نے دولت کی منصفانہ تقسیم پر زور دیتے ہوئے اسلام اور سوشلزم کے درمیان مماثلت پر بحث و مباحثوں میں حصہ لیا، اور اسلامی سوشلزم کے بارے میں اپنے نظریات پیش کیے۔

بر صغیر کی سیاست پر عبیداللہ سندھی کی فکر کے بڑے گہرے اثرات مرتب ہوئے۔ یہاں تک کہ تحریک پاکستان پر بھی گاہے اسلامی سوشلزم کی جھلک دکھائی دی۔ مرزا عبدل حسین اصفہانی نے اپنی کتاب ”قائد اعظم جیسا کہ میں انہیں جانتا تھا“ میں لکھا ہے کہ محمد علی جناح نے 26 مارچ 1948 کو چٹاگانگ میں ایک ہجوم کے سامنے اعلان کیا کہ ”آپ صرف میرے جذبات اور کروڑوں مسلمانوں کے جذبات کی آواز اٹھا رہے ہیں، جب آپ کہتے ہیں کہ پاکستان سماجی انصاف اور اسلامی سوشلزم کے اصولوں پر مبنی ہو، جو انسان کی مساوات اور بھائی چارے پر زور دیتے ہیں“ ۔

اس طرح کے اعلانات پاکستان کے قیام کے بعد آنے والے کچھ حکم رانوں نے بھی کیے۔ محمد رضا کاظمی کی کتاب : ”لیاقت علی خان، زندگی اور کام“ کے صفحہ تین سو چھبیس اور ستائیس پر لکھتے ہیں کہ لیاقت علی خان نے پچیس اگست انیس سو انچاس کو کہا ”آج کل بہت سے ’ازم“ کے بارے میں بات کی جا رہی ہے، لیکن ہم اس بات پر یقین رکھتے ہیں کہ ہمارے لیے صرف ایک‘ ازم ہے، یعنی اسلامی سوشلزم، جس کا مختصراً مطلب یہ ہے کہ اس سرزمین کا ہر فرد برابر ہے۔

خوراک، رہائش، لباس، تعلیم اور طبی سہولیات فراہم کرنا ہر ملک کے لیے لازم ہے۔ جو ملک اپنے عوام کے لیے یہ سہولیات یقینی نہیں بنا سکتے، وہ کبھی ترقی نہیں کر سکتے۔ جو اقتصادی پروگرام تقریباً ساڑھے تیرہ سو سال قبل تیار کیا گیا تھا، وہ اب بھی ہمارے لیے بہترین اقتصادی پروگرام ہے۔ در حقیقت، لوگ جتنے بھی نظاموں کو آزماتے ہیں، وہ سب بالآخر اسلامی سوشلزم کی طرف لوٹتے ہیں، خواہ وہ اسے کسی نام سے بھی پکارتے ہوں ”۔

انیس سو ساٹھ کی دہائی میں پاکستان میں ایوب خان کی آمریت کے دوران طبقاتی تقسیم کے پیش نظر کئی دانش وروں نے اسلامی سوشلسٹ خیالات کا پر چار شروع کیا۔ خلیفہ عبدالحکیم کی فکر پر مبنی ان کے خیالات نے ذوالفقار علی بھٹو کو بھی متاثر کیا، جب انہوں نے پاکستان پیپلز پارٹی کی بنیاد رکھی۔ پارٹی کے کچھ دانش وروں نے اسلامی سوشلزم کے برانڈ کی ترجیحات کا خاکہ پیش کیا، جس میں جاگیرداری اور بے قابو سرمایہ داری کا خاتمہ، معیشت کا وسیع تر ریاستی کنٹرول، بڑے بینکوں، صنعتوں اور اسکولوں کو قومیانا، کار خانوں میں شراکتی انتظام کی حوصلہ افزائی اور جمہوری اداروں کی تعمیر شامل ہیں۔

انہوں نے ان پالیسیوں کو قرآن میں موجود مساوات اور انصاف کے اصولوں کی ایک جدید توسیع کے طور پر سیاق و سباق کے طور پر پیش کیا۔ پارٹی کے قیام کی دستاویز نمبر چار کے مطابق اسلامی سوشلزم کے تحت غیر طبقاتی سماج کے قیام کا تصور دسمبر انیس سو ستا سٹھ میں لاہور میں پیش کیا گیا تھا، جس میں یہ واضح طور پر بیان کیا گیا تھا کہ ملک کے تمام سماجی و معاشی مسائل کا حل اسلامی سوشلزم کے نفاذ میں ہے۔ آگے چل کر حیدر آباد سندھ میں خطاب کرتے ہوئے ذوالفقار علی بھٹو نے کہا کہ سوشلزم کا پہلا بیج اسلام کے زیر اثر کھلا تھا۔

یہ پیغمبر اسلام اور ان کے خلفا کا اسلام تھا۔ یہ وہی اسلام تھا، جس نے سوشلزم کے تصور اور اصولوں کو جنم دیا۔ اور یہی ہمارا اسلام ہے، پاکستان کے عوام کا اسلام۔ لیکن پاکستان کے بیشتر علما کرام نے ذوالفقار علی بھٹو کے اسلامی سوشلزم کی سخت مخالفت کی۔ یہ انیس سو ستر کے الیکشن کا ایک اہم موضوع بن گیا۔ اسلامی سوشلزم دائیں بازوں اور بائیں بازوں کی قوتوں کے درمیان بحث کا ایم ترین نقطہ بن گیا۔ اس موضوع پر مذہبی طبقات نے ایک طرح کا نظریاتی اتحاد قائم کر لیا، چنانچہ ایک سو تیرہ علما نے اسلامی سوشلزم کے خلاف ایک مشترکہ فتوی دیا۔

اس کے باوجود عوام کی ایک بڑی اکثریت میں بائیں بازوں کی قوتوں کے حق میں فیصلہ دیا، اور ذوالفقار علی بھٹو ایک بہت بڑی اکثریت لے کر کامیاب ہو گئے۔ لیکن آگے چل کر ذوالفقار علی بھٹو نے اقتدار کے دوران، اپنے انقلابی پروگرام کو پیچھے چھوڑ دیا اور 1973 کے تیل کے بحران کے بعد سوشلسٹ مسلمان ریاستوں کو نظر انداز کر کہ قدامت پسند، تیل کی دولت سے مالا مال خلیجی بادشاہتوں کے ساتھ تعلقات کو گہرا کیا۔ اس کے ساتھ انہوں نے پارٹی کے اندر موجود بائیں بازوں کو کمزور کیا، اور مذہبی جماعتوں کے مطالبات تسلیم کرتے ہوئے ان کو بے شمار جماعتوں کو رعائتیں دے کر انہیں مطمئن کرنے کی کوشش کی۔ ذوالفقار علی بھٹو کے اس تجربے نے ثابت کیا کہ جدید دور میں اسلامی سوشلسٹ معیشت کا قیام جدید سائنسی سوشلزم اور مارکسی تصورات کے بغیر ممکن نہیں۔ یہ ایک سائنسی نظریہ ہے، جس کو سائنسی اور عقلی بنیادوں پر ہی سمجھا جا سکتا ہے۔ اور جدید دور کے معاشی مسائل کا حل جدید سائنسی اور عقلی نظریات میں موجود ہے۔


Facebook Comments - Accept Cookies to Enable FB Comments (See Footer).

Subscribe
Notify of
guest
0 Comments (Email address is not required)
Inline Feedbacks
View all comments