ایران نے پکڑے جانے والے برطانوی پرچم بردار ٹینکر کے عملے کی تصاویر جاری کر دی ہیں
ایران کے سرکاری میڈیا نے اس برطانوی پرچم بردار ٹینکر کے عملے کی تصاویر شائع کی ہیں جسے خلیج فارس سے قبضے میں لیا گیا تھا۔
ویڈیو فوٹیج اور ایک تصویر میں جہاز کے باورچیوں کو کھانا تیار کرتے اور ایک ایرانی افسر کو سٹینا اِمپیرو کے عملے کو بریفنگ دیتے دکھایا گیا ہے۔
برطانیہ میں سکیورٹی کی اعلیٰ سطحی ایمرجنسی کمیٹی کوبرا کا اجلاس بھی ہوا ہے۔ اس سے قبل حکومت نے جہاز پر قبضے کو ناقابلِ قبول اور کشیدگی میں انتہائی اضافہ کرنے والا فعل قرار دیا تھا۔
توقع ہے کہ برطانوی وزیرخارجہ جلد ہی ارکانِ پارلیمان کے سامنے آئندہ کا لائحہ عمل بیان کریں گے۔
اطلاعات ہیں کہ بعض وزراء ایرانی اثاثے منجمد کرنے پر بھی غور کر رہے ہیں۔
فارس اور اِیرِب نیوز ایجنسیوں کی جاری کردہ تصاویر میں عملے کے 23 ارکان میں سے چند نظر آ رہے ہیں۔ عملہ، انڈیا، روس، لیٹویا اور فلپائن کے شہریوں پر مشتمل ہے۔
ایک موقع پر ایک ایرانی افسر انھیں کیمرے کی طرف نہ دیکھنے کی ہدایت دے رہا ہے۔
اس سے قبل برطانوی حکومت نے ایران سے جمعہ کو پکڑے جانے والے ٹینکر کو فوری طور پر چھوڑنے کا مطالبہ دہرایا تھا۔
وزیراعظم ٹریسا مے نے کوبرا اجلاس کی صدارت کی تھی جس میں سکیورٹی اور ممکنہ ردعمل پر غور کیا گیا۔
Facebook Comments - Accept Cookies to Enable FB Comments (See Footer).