برازیل کی التمیرا جیل میں ہلاکت خیز ہنگامہ آرائی
برازیل کے شمال مشرق میں واقع التمیرا جیل میں قیدیوں کے دو گروہوں میں ہونے والی تباہ کن لڑائی کے بعد جیل حکام نے گینگز کے سرغنہ افراد کو جیل سے منتقل کرنا شروع کر دیا ہے۔
کمانڈو کلاس اے نامی قیدیوں کے ایک گینگ کی جانب سے مخالف کمانڈو ورمیلہو نامی گروہ پر حملے کے نتیجے میں 58 قیدی ہلاک ہوئے تھے۔
ابتدائی طور پر ہلاک ہونے والوں کی تعداد 57 بتائی گئی تاہم اب یہ تعداد 58 تک پہنچ گئی ہے۔
ہلاک شدگان میں سے 16 افراد کے سر قلم کر دیے گئے تھے جبکہ باقی آتشزدگی کے نتیجے میں دھواں بھر جانے کی وجہ سے ہلاک ہوئے۔
دھواں جلد ہی عمارت بھر میں پھیل گیا اور اسے جیل کی عمارت سے اٹھتے بھی دیکھا جا سکتا تھا۔
وزیرِ انصاف سرجیو مورو نے اس ہنگامہ آرائی اور ہلاکتوں میں ملوث مجرم گروہوں کے ارکان کو مختلف جیلوں میں منتقل کرنے کا حکم دیا اور اس کے نتیجے میں 46 قیدیوں کو یہاں سے لے جایا گیا ہے۔
خطرناک ترین تصور کیے جانے والے قیدیوں کو وفاق کے زیرِ انتظام چلنے والی جیلوں میں لے جایا گیا جن کے بارے میں خیال ہے کہ وہاں ریاستی جیلوں کے مقابلے میں حفاظتی انتظامات بہتر ہوتے ہیں۔
ایک سرکاری رپورٹ کے مطابق التمیرا جیل میں صرف 33 محافظ تعینات تھے جو کہ جیل کا تحفظ یقینی بنانے کے لیے ناکافی تھے۔
اس لیے جب فورینزک ماہرین جیل میں گئے تو ان کے ساتھ مسلح محافظ بھی بھیجے گئے۔
اسی اثنا میں لیگل میڈیکل انسٹیٹیوٹ کے باہر بھی افراتفری کا سماں دیکھنے کو ملا جہاں اس ہنگامہ آرائی میں ہلاک ہونے والوں کے لواحقین کو شناخت کے لیے بلایا گیا تھا۔
کچھ لوگ اپنے پیاروں کی مسخ شدہ لاشیں دیکھ کر انھیں شناخت کرتے ہوئے بےہوش بھی ہو گئے۔
ہسپتال کے حکام نے فائر بریگیڈ کے مقامی عملے سے کہا کہ وہ منتظر لواحقین کو پانی، خوراک اور طبی مدد فراہم کریں۔
فورینزک ماہرین کے مطابق 15 لاشوں کو تدفین کے لیے روانہ کیا گیا ہے۔
تمام تصاویر کے جملہ حقوق محفوظ ہیں۔
Facebook Comments - Accept Cookies to Enable FB Comments (See Footer).