سرد جنگ میں جاسوسی کی وہ ٹیکنالوجی جو آج ہم سب استعمال کر رہے ہیں


ایویرل ہیریمین

امریکی سفیر ایویرل ہیریمین کریملن میں ونسٹن چرچل اور جوزف سٹالن کے درمیان بیٹھے ہیں

ماسکو 4 اگست 1945۔ دوسری عالمی جنگ کا یورپی باب ختم ہوچکا تھا اور امریکہ اور سوویت یونین اپنے مستقبل کے تعلقات پر غور کر رہے تھے۔

امریکی سفارت خانے میں سوویت یونین کی ینگ پائینیئر آرگنائزیشن سے تعلق رکھنے والے نوجوان لڑکوں کے ایک گروہ نے دونوں عالمی طاقتوں کے درمیان دوستی کی علامت کے طور پر ایک تحفہ پیش کیا۔

انھوں نے اس وقت روس میں امریکی سفیر ایویرل ہیریمین کو ہاتھ سے تیار کردہ امریکی مہر کا ایک طغرہ پیش کیا۔ اسے بعد میں صرف ‘دی تھِنگ’ کہا جانے لگا تھا۔

ظاہر ہے کہ ہیریمین کے دفتر نے لکڑی سے بنے ہوئے اس آرائشی پیس کی تلاشی لی ہوگی کہ کہیں اس میں خفیہ آلات تو نصب نہیں، مگر نہ اس میں تاریں ملیں نہ بیٹریاں، تو اس سے کیا نقصان ہو سکتا تھا؟

چنانچہ ہیریمین نے اس چیز کو نمایاں جگہ پر اپنے سٹڈی روم کی دیوار پر آویزاں کر دیا، جہاں سے یہ اگلے سات سال تک ان کی ذاتی گفتگو سنتی رہی۔

انھیں کبھی یہ احساس نہیں ہوسکتا تھا کہ یہ ڈیوائس 20 ویں صدی کے ذہین ترین دماغوں میں سے ایک لیون تھیریمین نے بنائی تھی۔

وہ اپنے نام پر موجود انقلابی برقی آلہ موسیقی کے لیے مشہور تھے جو بغیر چھوئے بجایا جا سکتا تھا۔

لیون تھیریمین

لیون تھیریمین 1927 میں پیرس میں اپنے نام پر موجود موسیقی کے آلے کا مظاہرہ کر رہے ہیں

وہ امریکہ میں اپنی اہلیہ لیوینیا ولیمز کے ساتھ رہتے تھے مگر پھر 1938 میں سوویت یونین واپس لوٹ آئے۔ ان کی اہلیہ نے بعد میں بتایا کہ لیون کو اغوا کیا گیا تھا۔ لیکن کچھ بھی ہو، انھیں فوراً ہی ایک جیل کیمپ میں کام سے لگا دیا گیا جہاں انھیں سن سکنے والی دیگر ڈیوائسز کے ساتھ ساتھ ‘دی تھِنگ’ ڈیزائن کرنے کے لیے مجبور کیا گیا۔

کچھ عرصے بعد امریکی ریڈیو آپریٹرز نے پایا کہ امریکی سفیر کی گفتگو ہوا کی لہروں پر نشر ہو رہی تھی۔ مگر یہ نشریات کافی ناقابلِ پیشگوئی تھیں: ریڈیو کی لہریں کہاں سے نشر ہورہی ہیں، یہ جاننے کے لیے جب سفارتخانے کی تلاشی لی گئی تو کوئی خفیہ آلہ نہیں مل سکا۔ اس راز کی تلاش میں ابھی مزید کچھ عرصہ لگنے والا تھا۔

سفیر کی گفتگو سن سکنے والی ڈیوائس ’دی تھنگ‘ کے اندر تھی۔ اور یہ ایک انتہائی سادہ سا اینٹینا تھا جس پر ایک چاندی کی جھلی چڑھا کر مائیک بنا دیا گیا تھا، اور ایک چھوٹے سے خانے میں چھپا دیا گیا تھا۔ اس میں نہ کوئی بیٹری اور نہ ہی توانائی کا کوئی دوسرا ذریعہ موجود تھا، کیونکہ دی تھنگ کو اس کی ضرورت ہی نہیں تھی۔

یہ بھی پڑھیے

’جوہری جنگ رکوانے والا‘ روسی ہیرو چل بسا

دوسری جنگ عظیم کی وہ جاسوس جن سے نازی ’ڈرتے‘ تھے

جب سوویت سائنسدان امریکی سفارتخانے کی جانب ریڈیو لہریں پھینکتے تو یہ ڈیوائس فعال ہوجاتی۔ یہ اپنی جانب آنے والے سگنلز سے توانائی حاصل کرتی اور گفتگو واپس نشر کرتی۔ جب سوویت سگنل بند ہوجاتا تو یہ ڈیوائس بھی خاموش ہوجاتی۔

تھیریمین کے پراسرار آلہ موسیقی کی طرح دی تھنگ بھی شاید ایک ٹیکنالوجیکل پہیلی معلوم ہوتی ہو، مگر اپنی جانب آنے والے ریڈیو سگنلز سے فعال ہو کر معلومات واپس بھیجنے والی ڈیوائس کا تصور اس سے کہیں زیادہ وسیع ہے۔

جدید ٹیکنالوجی کے دور میں ریڈیو فریکوئنسی آئیڈینٹیفکیشن (آر ایف آئی ڈی) ٹیگز تقریباً ہر جگہ ہی استعمال ہو رہے ہیں۔

میرے پاسپورٹ میں بھی ایک ٹیگ ہے، اور ایسا ہی ایک ٹیگ میرے کریڈٹ کارڈ میں بھی ہے جس کی وجہ سے کسی آر ایف آئی ڈی ریڈر کے پاس گھما کر ہی ادائیگی کی جا سکتی ہے۔

لائبریری کی کتابوں میں بھی اکثر ٹیگز ہوتے ہیں جبکہ ایئرلائنز اکثر مسافروں کا سامان ٹریک کرنے کے لیے جبکہ دکانیں سامان چوری ہونے سے بچانے کے لیے اس کا استعمال کرتی ہیں۔

امریکہ

26 مئی 1960 کو امریکہ نے اقوامِ متحدہ کے سامنے اس کی نشاندہی کی

ان میں سے کچھ میں کرنٹ کا ذریعہ موجود ہوتا ہے مگر تھیریمین کے آلے کی طرح ان میں سے زیادہ تر اپنی جانب آنے والے کسی ریڈیو سگنل سے توانائی حاصل کرتے ہیں۔ اس سے ان کی قیمت کم ہوجاتی ہے اور کم قیمت ہونا ہی ان کی مقبولیت کی وجہ ہوتا ہے۔

دوسری عالمی جنگ کے دوران اتحادی طیاروں نے آر ایف آئی ڈی کی ہی ایک صورت استعمال کی تھی۔ ریڈار جب کسی طیارے پر لہریں پھینکتا تو ٹرانسپونڈر کہلانے والا ایک آلہ ریڈار کی جانب ایک سگنل واپس بھیجتا جس سے یہ مطلب لیا جاتا کہ ‘ہم تمہارے ساتھی ہیں، ہمیں مار مت گرانا۔’

مگر جب سلیکون سے بننے والے سرکٹس کی سائز میں کمی ہونے لگی تو ایسے ٹیگز کا تصور بھی عام ہوا جنھیں آپ طیارے سے کہیں کم قیمت چیزوں پر بھی لگا سکتے ہیں۔

بار کوڈز کی طرح آر ایف آئی ڈی ٹیگز کو بھی کسی چیز کی فوراً شناخت کے لیے استعمال کیا جا سکتا ہے۔

مگر بار کوڈز کے برعکس انھیں خودکار انداز میں سکین کیا جا سکتا ہے اور انھیں مخصوص روشنی کی سیدھ میں رکھنے کی ضرورت نہیں ہوتی۔ کچھ ٹیگز کو کئی فٹ دور سے پڑھا جا سکتا ہے، کچھ کو غلطیوں کے ساتھ ہی مگر مجموعوں کی صورت میں بھی پڑھا جا سکتا ہے۔

اور ان میں صرف بار کوڈ کے علاوہ اور بھی بہت کچھ محفوظ کیا جا سکتا ہے جس کی وجہ سے نہ صرف کسی چیز کو پہچانا جا سکتا ہے، بلکہ اس ٹیگ میں یہ بھی محفوظ کیا جا سکتا ہے کہ یہ مخصوص چیز کہاں اور کس دن تیار کی گئی تھی۔

آر ایف آئی ڈی ٹیگز کو 1970 کی دہائی میں ریل کے ڈبوں اور مویشیوں پر نظر رکھنے کے لیے بھی استعمال کیا جاتا تھا۔

مگر سنہ 2000 کی ابتداء تک ٹیسکو، وال مارٹ اور امریکی محکمۂ دفاع نے مطالبہ کرنا شروع کر دیا کہ ان کے سپلائرز فراہم کیے جانے والے سامان پر ٹیگز لازماً چسپاں کریں۔ چنانچہ نتیجتاً آر ایف آئی ڈی ٹیگز ہر جگہ نظر آنے لگے۔

کچھ جوشیلے افراد نے تو اپنے جسموں میں بھی آر ایف آئی ڈی ٹیگز لگوا لیے جن کی مدد سے ان کے لیے دروازے کھولنا یا صرف ہاتھ کے اشارے سے سب وے میں سوار ہونا آسان ہوگیا۔

1999 میں گھریلو استعمال کی اشیا بنانے والی کمپنی پروکٹر اینڈ گیمبل میں کام کرنے والے کیوین ایشٹن نے آر ایف آئی ڈی کے گرد گھوم رہے اس تمام جوش و جذبے کے لیے ایک نئی اصطلاح ایجاد کی۔ انھوں نے کہا کہ آر ایف آئی ڈی بالآخر ہمیں انٹرنیٹ آف تھنگز (آئی او ٹی) کی جانب لے جائے گا، یعنی ایک ایسی دنیا جس میں ہر چیز دوسری چیز سے منسلک ہوگی۔

مگر جلد ہی آر ایف آئی ڈی کے بارے میں سارا جوش و خروش چمک دھمک والی مصنوعات کی جانب مڑ گیا جس میں 2007 میں متعارف ہونے والے سمارٹ فون، سمارٹ واچ، سمارٹ تھرموسٹیٹ، سمارٹ سپیکر اور یہاں تک کہ سمارٹ کارز تک شامل ہیں۔

یہ تمام مصنوعات جدید ہیں، کمپیوٹنگ کی بے پناہ قوت رکھتی ہیں، مگر اس کے علاوہ یہ مہنگی بھی ہوتی ہیں اور انھیں کافی توانائی کی ضرورت ہوتی ہے۔

جب ہم آج انٹرنیٹ آف تھنگز کی بات کرتے ہیں تو ہم آر ایف آئی ڈی کی بات نہیں کرتے بلکہ ان ڈیوائسز کی بات کرتے ہیں۔ یہ اتنی پیچیدہ انجینیئرنگ والی ایک دنیا ہوگی جس میں آپ کا ٹوسٹر بلاوجہ آپ کے فرج سے رابطے میں ہوگا جبکہ ریموٹ کنٹرولڈ سیکس ٹوائز آپ کی ان عادات کے بارے میں بھی معلومات رکھتے ہوں گے جنھیں ہم نہایت ذاتی نوعیت کی سمجھتے ہیں۔

ایک ایسے دور میں رہنے کی وجہ سے ہمیں شاید حیران نہیں ہونا چاہیے جسے ماہرِ سماجیات شوشانہ زوبوف سرویلینس کیپٹل ازم یا ‘جاسوسانہ سرمایہ داری’ کہتی ہیں۔ اس دور میں لوگوں کی ذاتی زندگی پر نظر رکھنا ایک مقبول کاروباری ماڈل ہے۔

یہ بھی پڑھیے

سمارٹ فون اتنا سمارٹ کیسے بنا؟

ہم سب کی جیب میں ایک جاسوس ہے؟

ہوائی سفر: ہر سال 25 ملین بیگ کیوں گم ہو جاتے ہیں؟

مگر اس تمام جوش اور فکر کے درمیان آر ایف آئی ڈی خاموشی سے اپنے کام میں مصروف ہے اور میں شرط لگا کر کہہ سکتا ہوں کہ اس کے عروج کے دن ابھی آگے ہیں۔

انٹرنیٹ آف تھنگز کے بارے میں ایشٹن کا نقطہ نظر سادہ تھا: کمپیوٹرز کو اگر صرف برقی دنیا کے بجائے حقیقی دنیا کے بارے میں فہم پیدا کرنی ہو تو انھیں ڈیٹا کی ضرورت ہوگی۔

انسانوں کے پاس اس ڈیٹا کے ساتھ کام کرنے سے زیادہ بہتر دوسرے کام ہیں، چنانچہ ایسی چیزیں بنائی جائیں گی جو خود ہی کمپیوٹر کو یہ معلومات فراہم کریں جس سے حقیقی دنیا ڈیجیٹل معنوں میں زیادہ قابلِ فہم بن جائے گی۔

آر ایف آئی ڈی

ہانگ کانگ کی پولی ٹیکنیک یونیورسٹی کی پروفیسر جواین چنگ وائی یی دواؤں کے نسخوں میں غلطی کو روکنے والے ایک آر ایف آئی ڈی سسٹم کا عملی مظاہرہ کر رہی ہیں

کئی لوگوں کے پاس اب سمارٹ فونز ہیں مگر چیزوں کے پاس سمارٹ فون نہیں ہوتے۔ آر ایف آئی ڈی ان چیزوں کو ٹریک کرنے کا ایک کم قیمت طریقہ ہوسکتا ہے۔

اگر زیادہ تر ٹیگز صرف یہ بھی کریں کہ اپنے پاس سے گزرتے آر ایف آئی ڈی ریڈر کو یہ کہہ دیں ‘میں یہاں ہوں!’، تو یہ کمپیوٹرز کے لیے حقیقی دنیا کے بارے میں جاننے کے لیے کافی ہوگا۔

ٹیگز دروازے کھول سکتے ہیں، اوزاروں، آلات اور یہاں تک کہ دواؤں کو بھی ٹریک کر سکتے ہیں، پیداوار کو خودکار بنا سکتے ہیں، اور چھوٹی ادائیگیوں کو فوری کروا سکتے ہیں۔

آر ایف آئی ڈی کے پاس بھلے سمارٹ واچ یا خود چلنے والی گاڑی جتنی قوت اور لچک نہیں ہوگی مگر یہ کم قیمت اور چھوٹی ٹیکنالوجی ہے، اتنی کم قیمت اور اتنی چھوٹی کہ اسے سینکڑوں ارب چیزوں کو ٹیگ کرنے میں استعمال کیا جا سکتا ہے۔

اور اس کے لیے بیٹریوں کی ضرورت بھی نہیں ہوگی۔ کوئی بھی شخص جو یہ سمجھتا ہے کہ اس سے فرق نہیں پڑتا، اسے دوبارہ لیون تھیریمن کے بارے میں پڑھنا چاہیے۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32493 posts and counting.See all posts by british-broadcasting-corp