کوہستان ویڈیو کیس: بشام کی عدالت میں کیا ہوا؟
ضلع کوہستان میں غیرت کے نام پر پانچ لڑکیوں کے قتل کا معاملہ ایک طویل عرصے تک گاہے بگاہے پاکستانی نیوز چینلز کے بلیٹنز کی شہ سرخیوں میں رہا لیکن جب جمعرات کو اس مقدمے کا فیصلہ سنانے کا وقت آیا تو فیصلے کی کوریج کے لیے بشام پہنچنے والے صحافیوں کی تعداد انگلیوں پر گنی جا سکتی تھی۔
ضلع شانگلہ کے شہر بشام میں ڈسڑکٹ اینڈ سیشن جج کوائی پالس کی عدالت میں اس موقع پر سکیورٹی کے سخت انتظامات کیے گئے تھے اور اضافی نفری بھی تعینات تھی۔
عدالتوں میں سائلین کی تعداد بھی بہت کم تھی اور موقع پر موجود پولیس اہلکار اکا دکا آنے جانے والوں سے بھی پوچھ رہے تھے کہ وہ کس مقدمے کے سلسلے میں آئے ہیں۔
اگر ان میں سے کوئی کوہستان ویڈیو سکینڈل کا ذکر کر دیتا تو اسے فوراً وہاں سے چلے جانے کو کہا جاتا رہا بلکہ کچھ کو تو پولیس اہلکار احاطہ عدالت سے خود بشام شہر تک چھوڑنے کے لیے بھیجے گئے۔
یہ بھی پڑھیے
کوہستان ویڈیو: پانچ لڑکیوں کے قتل پر تین ملزمان کو عمرقید
کوہستان ویڈیو: کیا اب انصاف کے تقاضے پورے ہوں گے؟
کوہستان: خواتین کے لیے موبائل فون موت کی علامت
’کوہستان قتل کیس میں فورنزک طریقہ کار استعمال کریں‘
عدالتی عملے نے صحافیوں کو بھی فیصلہ سننے کے لیے عدالت کے اندر جانے کی اجازت دینے سے انکار کر دیا اور کہا گیا کہ اہم اور حساس ترین مقدمہ ہونے کی وجہ سے ایسا نہیں کیا جا سکتا۔
عملے کا کہنا تھا کہ مقدمے کا فیصلہ سنائے جانے کے بعد موقع پر موجود صحافیوں کو فیصلے کی کاپی فراہم کر دی جائے گئی تاہم جب فیصلہ سنا دیا گیا تو بعد میں کہا گیا کہ فوری طور پر عدالتی فیصلے کی کاپی نہیں دی جا سکتی اور اس کے لیے باقاعدہ درخواست دی جائے جس کے بعد قانونی تقاضے پورے کر کے فیصلے کی کاپی فراہم کی جائے گی۔
مقدمے کا فیصلہ سننے کے لیے تو زیادہ لوگ کیمپ کورٹ نہیں پہنچے تاہم ملزمان کی جانب سے کچھ لوگ ضرور موجود تھے جن کو پولیس بار بار وہاں سے ہٹا رہی تھی۔
اسی طرح غدر پلاس کی ان لڑکیوں کے قتل کو منظرِ عام پر لانے والے مقتول افضل کوہستانی کے بھانجے فیض الرحمان جب فیصلہ سننے عدالت پہنچے تو فیصلہ سنائے جانے کے دوران ہی پولیس اہلکار انھیں اپنے ہمراہ عدالت سے باہر لے آئے۔
فیض الرحمان کے ساتھ پہلے تو دو پولیس اہلکاروں کی ڈیوٹی لگائی گئی اور انھیں قریب ہی موجود پولیس کے لیے بنی ہوئی قیام گاہ میں بٹھایا گیا اور اس سے پہلے کے ملزمان کو عدالت سے واپس جیل بھیجا جاتا پولیس فیض الرحمان کو اپنی گاڑی میں بیٹھا کر بشام سے کوہستان جانے والی گاڑیوں کے اڈے پر چھوڑ آئی۔
اس سے پہلے جب ملزمان کو عدالت لایا گیا تو اس موقع پر فیض الرحمان اور ایک ملزم کے درمیان پولیس کی موجودگی میں تلح کلامی بھی ہوئی تھی جس کے بعد پولیس نے فیض الرحمان کو کچھ وقت کے لیے حفاظتی تحویل میں بھی لیا۔
پولیس کی ان احتیاطی تدابیر کی وجہ بظاہر اس مقدمے میں گذشتہ سات برس کے دوران ہونے والی ہلاکتیں ہیں جن میں تازہ ترین نام مدعی افضل کوہستانی کا ہے جنھیں رواں برس مارچ میں ایبٹ آباد میں فائرنگ کر کے ہلاک کر دیا گیا تھا۔
تمام ملزماں کو داسو جیل کوہستان سے ساڑھے بارہ بجے کے قریب عدالت میں لایا گیا تھا اور فیصلہ سنائے جانے کے بعد تقریباً دو بجے واپس جیل لے جایا گیا۔
فیصلے کے بعد جہاں عمر قید کی سزا پانے والے تین ملزمان عمر، صبیر اور صغیر کو سنٹرل جیل منتقل کر دیا جائے گا وہیں تحریری عدالتی فیصلہ اور رہائی کی روبکار کے اجرا کے بعد بری ہونے والے پانچ افراد کی رہائی عمل میں آئے گی۔
سزا پانے والے محمد عمر خان، صغیر اور صبیر آپس میں قریبی عزیز ہیں۔ صغیر اور سیبر آپس میں سگے بھائی ہیں جبکہ محمد عمر ان کا بھانجا ہے۔
محمد عمر خان مقتولہ بیگم جان کے بھائی ہیں جبکہ سیبر باذغہ نامی مقتولہ جبکہ تطہیر قتل ہونے والے کرم جان کے والد ہیں۔
فیصلے کے بعد افضل کوہستانی کے بھانجے فیض الرحمان نے بی بی سی سے بات کرتے ہوئے کہا کہ انھیں یہ فیصلہ قبول نہیں ہے اور وہ اس کے خلاف اعلیٰ عدالت میں جائیں گے۔
‘صرف تین کو سزا ہوئی ہے جبکہ باقی پانچ کو بری کر دیا گیا ہے۔ تو لڑکیوں کا قاتل کون ہے، یہ واضح نہیں ہوا۔ ہم اس فیصلے کے خلاف ہائی کورٹ میں اپیل کریں گے۔’
- پاکستان میں خواتین کو گھورنے کا مسئلہ: ’گھورنے پر وہی اکتفا کرتے ہیں جنھیں اس سے بڑھ کر کچھ کرنے کا موقع نہیں ملتا‘ - 16/04/2024
- مسلم ملک اُردن نے اسرائیل پر داغے گئے ڈرون کیوں مار گرائے اور یہ ملک تاریخی اعتبار سے کہاں کھڑا ہے؟ - 16/04/2024
- ’میری آنکھ باہر نکل کر میرے چہرے پر لٹکی ہوئی تھی، میں سوچ رہا تھا کہ میں مر رہا ہوں‘: سلمان رشدی - 16/04/2024
Facebook Comments - Accept Cookies to Enable FB Comments (See Footer).