بہترین وائلڈ لاف تصاویر: ’زومبی فنگس‘ اور دیگر عجیب الخلقت چیزیں
یہ ایک عجیب و غریب لیکن انتہائی خوبصورت منظرہے۔
اوپر لگی تصویر میں یہ کسی بھونرے یا بیٹل کے جسم پر سجایا کوئی انٹینا نہیں بلکہ یہ ‘زومبی فنگس’ ہے جس نے کیڑے کے جسم کو اپنے قابو میں کر لیا ہے اور یہ انٹینا نما چیز اس بیٹل کے جسم پر کِھلنے والے پھول کی طرح ہیں۔
فنگس نے کیڑے پر مکمل فتح حاصل کر لی ہے اور اب اس نے اپنے بازو ہوا میں پھیلا دیے ہیں تاکہ وہ اپنا نیا شکار تلاش کر سکے۔
رواں سال وائلڈ لائف فوٹوگرافی کے مقابلے میں فرانسیسی فوٹوگرافر فرینک دیشاندول کی اس تصویر نے کافی داد حاصل کی۔
اس مقابلے کے فاتح کا اعلان لندن کا نیچرل ہسٹری میوزیم آئندہ ماہ کرے گی۔
انھوں نے بی بی سی کو بتایا: ‘پہلے تو میں اس سوچ میں پڑ گیا کہ یہ عجیب الخلقت چیز ہے کیا۔ پھر میں اس کے قریب گیا اور میں فنگس کی اس کامل ترتیب سے متاثر ہوئے بغیر نہ رہ سکا۔’
فرینک کا کہنا ہے کہ انھوں نے ایسے اور کیڑے بھی دیکھے لیکن کوئی بھی تصویر کے لیے اس قدر موزوں نظر نہیں آیا۔
ایسی ہی متاثر کن تصاویر مندرجہ ذیل دی گئی ہیں۔
تنبیہ: پڑھنے والوں سے گزارش ہے کہ تصاویر دیکھتے ہوئے احتیاط برتیں۔ قدرت کے کچھ مناظر ظالمانہ ہوسکتے ہیں۔
15 اکتوبر (منگل) کو ایک تقریب میں مقابلہ جیتنے والے فوٹو گرافرز میں انعامات تقسیم کیے جائیں گے۔ ان تصاویر کی پھر اگلے جمعے میوزیم میں نمائش کی جائے گی۔
برطانیہ کے پیٹر ہیگارتھ کی تصویر: چیتے اور جنگلی کتے کی لڑائی
افریقی جنگلی کتے متاثر کن شکاری سمجھے جاتے ہیں۔ لیکن اس موقع پر ایسا ثابت نہیں ہو سکا۔
ایک تنہا چیتا ان کے غول سے جان بچا کر نکلنے میں کامیاب ہو گیا۔
یہ تصویر جنوبی افریقہ کی ایک پناہ گاہ میں لی گئی ہے اور اسے میمل جانوروں کے برتاؤ کے زمرے میں مقابلے میں شامل کیا گیا۔
برطانیہ کے ایلکس مسٹارڈ کی تصویر: زندگی کا دائرہ
بحیرہ احمر میں بڑی آنکھوں والی شول مچھلیوں کے ایک غول کی یہاں تصویر بندی کی گئی ہے۔
یہ اپنے جوڑے بنانے سے قبل جنسی تعلقات قائم کرنے کے لیے ایک چکر میں گردش کر رہی ہیں اور یہ عمل شکاریوں کو روکنے کے لیے بھی کیے جاتے ہیں۔
یہ تصویر بلیک اینڈ وائٹ کے زمرے میں شامل کی گئی۔
کینیڈا کے جیسن بینٹل کی تصویر:واہ کیا قسمت پائی ہے!
شمالی امریکہ کے میمل جانور ریکون کو یہاں سنہ 1970 کی دہائی کی ایک بیکار گاڑی فورڈ پنٹو کے ٹوٹے شیشے سے اپنا چہرہ نکالتے دیکھا جا سکتا ہے۔
یہ تصویر کینیڈا کے سسکاچیون میں لی گئی ہے۔ یہ جانور اس کار کو اپنے بچے کی محفوظ پناہ گاہ کے طور پر استعمال کر رہا ہے۔
یہ سوراخ بہت چھوٹا ہے اور ان کا شکار کرنے والے جانور اس میں سے اندر نہیں آ سکتے۔ اسے شہری وائلڈ لائف زمرے میں شامل کیا گیا ہے۔
جرمنی اور جنوبی افریقہ کے تھامس پیشاک کی تصویر: یقین کو چھونا
ایک نوجوان نے اپنی کشتی سے پانی میں ہاتھ ڈالے ہوئے ہیں اور وہیل مچھلی کے پاس اپنے ہاتھ لہرا رہا ہے۔
یہ تصویر میکسیکو کے سین ایگیشیو لیگون یعنی ساحلی جھیل میں لی گئی ہے۔
اس تصویر کو وائلڈ لائف فوٹوجرنلزم کے زمرے میں شامل کیا گيا ہے۔
چین کے منگوئی یوان کی تصویر: بالوں کے جال میں ریشم کا کیڑے
یہ سائنا کے ایک کیڑے پاپوا کے کوکون یا پیپے کے گرد پنجرا نما ایک پیچیدہ ڈھانچہ ہے۔
یہ کیٹرپیلر کیڑا اسے بناتا ہے تاکہ وہ اپنے گھونسلے کو شکاریوں سے محفوظ رکھ سکے۔ وہ لاروا سے کیڑا بننے کے دوران یہ کام کرتا ہے۔
یہ تصویر بغیر ریڑھ کی ہڈیوں والے جانداروں کی تصاویر کے زمرے میں شامل کیا گیا ہے۔
امریکہ کے تھامس ویئر کی تصویر: ساحل پر کوڑا
سمندر کو آلودہ کرنے کے اپنے نتائج ہیں۔
یہ سمندری کچھوا مچھلی مارنے والے سازو سامان سے الجھ گیا جو کہ ایک بیکار سمجھ کر پھینک دی جانے والی کرسی سے منسلک تھے۔
اس تصویرکو الاباما میں لیا گیا اور اسے وائلڈ لائف فوٹو جرنلزم کے زمرے میں شامل کیا گیا ہے۔
سوئزر لینڈ کے ایڈریان ہرشی کی تصویر: آخری ہچکی
یہ تصویر سوئٹزر لینڈ کے فوٹوگرافر ایڈرین ہرشی نے زمبابوے کی جھیل کیربا میں لی جہاں ایک دریائی گھوڑے کے ایک نوزائیدہ بچے کو ایک سانڈ کے حملے کی زد میں دیکھا جا سکتا ہے۔
یہ عام بات نہیں ہے لیکن اگر کوئی مقابلہ ہے یا کوئی نر اپنا تلسط قائم کرنا چاہتا ہے تو ایسا برتاؤ دیکھا جا سکتا ہے۔
اسے ممالیہ کے برتاؤ کے زمرے میں شامل کیا گیا ہے۔
۔
- انڈیا میں سول سروس کے امتحان میں کامیابی پانے والے مسلمان طلبہ: ’سخت محنت کا کوئی نعم البدل نہیں‘ - 20/04/2024
- ایرانی جوہری تنصیب اور ڈرون و بیلسٹک میزائل تیار کرنے والی فیکٹریوں کے مرکز اصفہان کی سٹریٹجک اہمیت کیا ہے؟ - 20/04/2024
- غزہ کی وہ تصویر جسے ’ورلڈ پریس فوٹو آف دی ایئر‘ کا ایوارڈ ملا: ’اس لمحے میں غزہ کے درد کی داستان موجود ہے‘ - 19/04/2024
Facebook Comments - Accept Cookies to Enable FB Comments (See Footer).