لاڑکانہ ہاسٹل کے کمرے میں مردہ پائی جانے والی نمرتا کی موت خودکشی نہیں: پوسٹ مارٹم رپورٹ


چانڈکا میڈیکل کالج لاڑکانہ کی ہاسٹل میں کمرے سے مردہ حالت میں ملنے والی 22 سالہ طالبہ نمرتا کی موت کے بارے میں مزید انکشافات ہوئے ہیں۔ پوسٹ مارٹم کرنے والے ڈاکٹر نے کہا ہے کہ نمرتا کے گلے میں دوپٹا بندھا تھا لیکن اس کے گلے میں رسی کے نشانات ہیں۔ انہوں نے کہا ہے کہ نمرتا کی موت خودکشی نہیں ہے تاہم ابھی حتمی طور پر کچھ نہیں کیا جا سکتا، تفصیلی رپورٹ آنے کے بعد حتمی رائے دی جا سکے گی۔

خیال رہے کہ لاڑکانہ کے چانڈکا میڈیکل کالج کے ہاسٹل سے 22 سالہ طالبہ کی لاش برآمد ہوئی ہے۔ پولیس ذرائع کے مطابق نمرتا کی نعش کو کمرے کا دروازہ توڑ کر نکالا گیا، نمرتا کے گلے میں دوپٹہ بندھا ہوا تھا۔ اس کا تعلق ضلع گھوٹکی سے تھا جبکہ متوفیہ کے والدین کراچی میں رہائش پذیر ہیں۔

چانڈکا میڈیکل کالج کی وائس چانسلر ڈاکٹر انیلہ کےمطابق جس لڑکی کی لاش ملی ہے اس کا نام نمرتا ہے اور وہ بی ڈی ایس فائنل ائیرکی طالبہ تھی۔

وائس چانسلر نے بتایا ہے کہ نمرتا چھٹیوں پر تھی اور آج کل امتحانات کی تیاری میں مصروف تھی اور اس کے گھر والوں‌ کو اس کی وفات کی خبر کر دی گئی ہے اور وہ لاڑکانہ کے لیے روانہ ہوگئے ہیں۔ پولیس ذرائع کے مطابق طالبہ کی ہلاکت کے معاملے کی تحقیقات کے لیے ایس ایس پی لاڑکانہ کی سربراہی میں تحقیقاتی کمیٹی بنائی جائے گی جو کہ تمام پہلوؤں سے معاملے کی چھان بین کرے گی جبکہ میڈیکل کالج میں طالبہ کی ہلاکت کے واقعے کے بعد ہاسٹل نمبر تین کو سیل کر دیا گیا ہے۔

ابتدائی تحقیقات کے مطابق لڑکی نمرتا کے گلے پر نشانات بھی ملے تھے۔ پولیس نمرتا کے ساتھ ہاسٹل کے کمرے میں مقیم دیگر طالبات سے بھی بیان لے رہی ہے۔


Facebook Comments - Accept Cookies to Enable FB Comments (See Footer).