فن لینڈ: 34 سالہ سنا مرین دنیا کی کم عمر ترین وزیرِ اعظم منتخب

  •  
  •  
  •  
  •  
  •  
  •  
  •  
  •  
  •  
  •  
  •  
  •  

سنا مرین، فن لینڈ، وزیرِ اعظم

Getty Images
سنا مرین کی جماعت سوشل ڈیموکریٹک پارٹی فن لینڈ کے پانچ جماعتی اتحاد کا حصہ ہے اور ان پانچوں جماعتوں کی سربراہی خواتین کے ہاتھ میں ہے

فن لینڈ کی سوشل ڈیموکریٹک پارٹی نے 34 سالہ سنا مرین کو وزیرِ اعظم منتخب کیا ہے جس کے بعد وہ دنیا کی کم عمر ترین وزیرِ اعظم بن جائیں گی۔

ان کی جماعت فن لینڈ کے پانچ جماعتی اتحاد کا حصہ ہے اور ان پانچوں جماعتوں کی سربراہی خواتین کے ہاتھ میں ہے۔

وزیرِ ٹرانسپورٹ مرین کا بطور وزیرِ اعظم اس وقت انتخاب کیا گیا جب ان کی ہی جماعت کے وزیرِ اعظم آنتی رائنے نے عہدہ چھوڑا۔

توقع کی جا رہی ہے کہ وہ اس ہفتے حلف اٹھائیں گی۔

یہ بھی پڑھیے

برطانیہ میں کبھی عورت وزیر اعظم رہی ہے؟

’اِس بچی کا نام بینظیر رکھا جانا چاہیے‘

وزیر اعظم ٹریزا مے کا سیاسی سفر، تصاویر میں

مرین فن لینڈ کی تیسری خاتون وزیرِ اعظم ہوں گی۔ اپریل میں ہونے والے انتخابات میں سوشل ڈیموکریٹک پارٹی سب سے بڑی جماعت بن کر ابھری تھی اور اس لیے وہ اتحادی حکومت کی سربراہی کے لیے وزیرِ اعظم چُن سکتی ہے۔

ان کے پیش رو کو ایک ڈاک ہڑتال سے نمٹنے کے اپنے طریقہ کار کے سبب ایک اتحادی جماعت کا اعتماد کھونا پڑا۔

https://twitter.com/TNiskakangas/status/1203729511658995713

حلف اٹھانے پر مرین دنیا کی کم عمر ترین وزیرِ اعظم ہوں گی۔ نیوزی لینڈ کی وزیرِ اعظم جیسِنڈا آرڈرن 39 سال جبکہ یوکرین کے وزیرِ اعظم اولیکسی ہونچاروک 35 سال کے ہیں۔

فن لینڈ کے نشریاتی ادارے وائے ایل ای کے مطابق سنا مرین کی پرورش ان کی والدہ نے کی اور وہ اپنے خاندان کی پہلی فرد ہیں جو یونیورسٹی گئیں۔

سنا مرین

Reuters

مرین نے ایک باریک مارجن سے وزارتِ عظمیٰ کا ووٹ حاصل کرنے کے بعد رپورٹرز سے بات کرتے ہوئے کہا کہ ’ہمیں اعتماد کی بحالی کے لیے بہت کام کرنا پڑے گا۔‘

انھوں نے اپنی عمر کے بارے میں سوالات پر کہا کہ ’میں نے کبھی اپنی عمر یا اپنی صنف کے بارے میں نہیں سوچا۔ میں سیاست میں آنے کی اپنی وجوہات کے بارے میں اور ان چیزوں کے بارے میں سوچتی ہوں جن کے لیے ہم نے عوام کا اعتماد حاصل کیا ہے۔‘

فن لینڈ کے پاس فی الوقت یورپی یونین کی صدارت ہے جو یونین کے تمام ممالک کو باری باری ملتی ہے۔

Comments - User is solely responsible for his/her words

  •  
  •  
  •  
  •  
  •  
  •  
  •  
  •  
  •  
  •  
  •  
  •  

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 11779 posts and counting.See all posts by british-broadcasting-corp