#BBL09: حارث رؤف کی میلبورن سٹارز کے لیے ہیٹ ٹرک، کیا وہ ٹی ٹوئنٹی ورلڈ کپ کے لیے پاکستانی ٹیم میں جگہ بنانے میں کامیاب ہو جائیں گے؟
پاکستانی فاسٹ بولر حارث رؤف نے بدھ کو بِگ بیش ٹی ٹوئنٹی لیگ میں میلبورن سٹارز کی طرف سے سڈنی تھنڈرز کے خلاف لگاتار تین گیندوں پر وکٹیں حاصل کر کے ہیٹ ٹرک مکمل کی۔
انھوں نے اننگز کے آخری اوور کی دوسری گیند پر وکٹ کیپر میتھیوگلکس کو سندیپ لمیچان کے ہاتھوں کیچ کرایا۔ تیسری گیند پر انھوں نے کیلم فرگوسن کو بولڈ کر دیا، جس کے بعد انھوں نے ڈینیئل سیمس کو ایل بی ڈبلیو کر کے ہیٹ ٹرک مکمل کی۔
حارث رؤف اب تک بگ بیش کے صرف چار میچ کھیل کر تیرہ وکٹیں حاصل کر چکے ہیں۔ یوں وہ ڈینیئل سیمس کی پندرہ وکٹوں کے بعد دوسرے نمبر پر ہیں۔
ان کی ہیٹرک کے بعد ٹوئٹر پر ان کا نام ٹرینڈ کر رہا ہے اور فینز ان کی تعریفوں کے پل باندھتے دکھائی دے رہے ہیں۔
یہ بھی پڑھیے
’یہ گیند بہت قیمتی ہے، اسے سنبھال کر رکھنا‘
حارث رؤف: ’پی ایس ایل میں تیز ترین گیند کرنا چاہتا ہوں‘
کرکٹ کے اعداد و شمار کے ماہر مظہر ارشد نے لکھا ’تیز، درست، اور پرجوش۔ نام ہے رؤف۔ حارث رؤف۔ آج میلبورن کے لیے ہیٹ ٹرک، آداب کے جشن کے ساتھ۔‘
کرکٹ تجزیہ کار ساج صادق نے لکھا ’حارث رؤف کی ایک اور عمدہ پرفارمنس، انھوں نے بگ بیش لیگ میں میلبورن سٹارز کے لیے 23 رنز پر ہیٹرک کر لی۔ آج ان کی ایک گیند کی رفتار 151.3 کلومیٹر فی گھنٹہ تھی۔‘
https://twitter.com/Saj_PakPassion/status/1214846304725217280
میلبورن سٹارز نے ٹوئٹر پر اپنے اکاؤنٹ پر انتہائی دلچسپ انداز میں حارث رؤف کی بولنگ کی منظر کشی کی۔
https://twitter.com/StarsBBL/status/1214827298806849536
ایک صارف عمر فاروق نے لکھا ’حارث رؤف نے ابھی انٹرنیشنل کرکٹ کا آغاز تو نہیں کیا لیکن ان کے ابھی سے بیرون ملک بہت سے فینز ہیں۔‘
https://twitter.com/UmarFarooqGL/status/1214891212815192064
حارث رؤف کا بگ بیش کھیلنا بھی ایک دلچسپ کہانی ہے۔ انھیں جنوبی افریقی فاسٹ بولر ڈیل سٹین کے ان فٹ ہونے کے بعد میلبورن سٹارز نے ٹیم میں شامل کیا تھا۔
حارث رؤف نے دوسرے ہی میچ میں ہوبارٹ ہریکینز کی پانچ وکٹیں حاصل کر لیں۔ وہ اپنی اس کارکردگی کے ساتھ ساتھ گراؤنڈ کے ایک انڈین سکیورٹی گارڈ کو وہ گیند تحفے میں دینے کی وجہ سے بھی شہ سرخیوں میں آ گئے تھے جس سے انھوں نے پانچ وکٹیں حاصل کی تھیں۔
حارث رؤف پاکستان سپر لیگ کھیلنے والی ٹیم لاہور قلندر کی دریافت ہیں۔
انھوں نے اپنا پہلا ٹی ٹوئنٹی میچ اکتوبر 2018 میں لاہور قلندر کی طرف سے ہوبارٹ ہریکینز کے خلاف ابوظہبی میں کھیلا تھا جس کے بعد انھوں نے پاکستان سپر لیگ بھی کھیلی۔
لاہور قلندر نے ان کے کھیل کو مزید نکھارنے کے لیے انھیں آسٹریلیا بھی بھیجا جہاں انھوں نے کلب کرکٹ کھیلی۔
حارث رؤف اور ٹی ٹوئنٹی ورلڈ کپ
حارث رؤف کی مسلسل عمدہ کارکردگی کے بعد پاکستانی کرکٹ حلقوں میں یہ سوال سامنے آیا ہے کہ کیا وہ اسی سال آسٹریلیا میں ہونے والے ٹی ٹوئنٹی ورلڈ کپ کے لیے پاکستانی ٹیم میں جگہ بنانے میں کامیاب ہو جائیں گے؟
مبصرین اور تجزیہ کاروں کا خیال یہ ہے کہ حارث رؤف جس طرح ٹی ٹوئنٹی میں اچھی بولنگ کر رہے ہیں وہ اپنی سلیکشن کا کیس مضبوط بنا رہے ہیں۔
بگ بیش کھیلنے کے سبب انھیں آسٹریلین کنڈیشنز کا اندازہ ہو چکا ہے جو ٹی ٹوئنٹی ورلڈ کپ میں ان کے کام آ سکتا ہے۔
پاکستان کرکٹ بورڈ کی سلیکشن کمیٹی کے ذرائع کا کہنا ہے کہ حارث رؤف بگ بیش کھیلنے سے پہلے ہی ان کی نظروں میں آ چکے ہیں اور بنگلہ دیش کے خلاف ہونے والی سیریز میں ان کی سلیکشن پر غور ہو سکتا ہے۔
ذرائع کا یہ بھی کہنا ہے کہ حارث رؤف ایک مضبوط فاسٹ بولر ہیں جنھیں نہ صرف ٹی ٹوئنٹی بلکہ لمبی دورانیے کی کرکٹ کے لیے بھی تیار کیا جاسکتا ہے۔
اسی مقصد کے تحت انھیں ناردرن کی طرف سے قائداعظم ٹرافی میں فرسٹ کلاس کرکٹ کھیلنے کا موقع بھی فراہم کیا گیا۔ ان کے پاس رفتار ہے اور ان کا یارکر بہت خطرناک ہے۔ وہ سٹمپس میں گیند کرتے ہیں اسی لیے ان کی زیادہ تر وکٹیں بولڈ اور ایل بی ڈبلیو ہوتی ہیں۔
اس سے قبل فاسٹ بولرز کے کیمپ میں وقاریونس نے بھی انھیں اپنی بولنگ میں بہتری لانے کے لیے مفید مشورے دیے تھے۔
Facebook Comments - Accept Cookies to Enable FB Comments (See Footer).