امریکہ: تین گولڈ میڈل جیتنے والی پاکستانی طالبہ ندا جمالی کون ہیں؟


ریسلنگ

ندا جمالی اپنے ساتھیوں اور ’ریسلنگ ہیمر‘ کے ہمراہ

پاکستان کے صوبہ سندھ کے ضلع بدین کی رہائشی 15 سالہ ندا جمالی جب امریکہ کے لیے روانہ ہوئی تھیں تو ان کی شناخت ایک ذہین طالبہ کی تھی۔ لیکن صرف چار ماہ کی تربیت میں انھوں نے ریسلنگ میں تین گولڈ میڈل حاصل کر کے اپنی ایک نئی شناخت اور مقام بنا لیا۔

ندا جمالی نے امریکہ کی ریاست کیلیفورنیا میں 116 پاؤنڈ کی کیٹگری کی وومین ریسلنگ میں یہ گولڈ میڈل حاصل کیے۔

امریکہ میں طلبہ کی فیلوشپ ’یس (یوتھ ایکسچینج اینڈ سٹڈی) پروگرام‘ کے تحت وہاں جانے والی ندا ایک سال کے لیے ریاست کیلیفورنیا کے شہر یوبا کے ہائی سکول میں زیر تعلیم ہیں۔

ندا جمالی پاکستان کے ان 77 طالبعلموں میں شامل ہیں جن کا 6500 درخواست گزاروں میں سے اس فیلوشپ کے لیے انتخاب کیا گیا تھا۔

یہ بھی پڑھیے

’چوتھی جماعت میں چار لڑکوں کی پٹائی لگائی تھی‘

سعودی عرب میں خواتین کا پہلا ریسلنگ میچ

شلوار قمیض میں پہلوانی! بھئی واہ

ندا جمالی کی والدہ ڈاکٹر زید جمالی نے بی بی سی کو بتایا کہ ندا بچپن سے جوڈو کراٹے کی کلاسیں لیتی تھیں لیکن ریسلنگ کی کوئی پریکٹس نہیں تھی اور جوڈو کی یہ کلاسیں بھی کچھ عرصے میں معطل ہو گئیں کیونکہ انسٹرکٹر وہاں سے چلا گیا تھا۔

’ندا واحد لڑکی تھی جو جوڈو سیکھتی تھی۔ میں نے خود بھی جوڈو سیکھا تھا، میرے والد میری حوصلہ افزائی کرتے تھے تو میں نے بھی اپنے بچوں کو فزیکل سپورٹس میں سپورٹ کیا۔‘

ڈاکٹر زید کا کہنا ہے کہ یہاں دیہی سماج میں ریسلنگ سیکھنا تو ممکن ہی نہیں تھا لیکن ندا کو بچپن سے ہی شوق تھا۔

ندا جمالی

ندا جمالی انڈین اداکار عامر خان کی ریسلنگ پر مبنی فلم دنگل سے بھی متاثر ہیں

’یہ شوق اس میں کیسے آیا اور وہ کس سے متاثر ہوئی، مجھے معلوم نہیں ہے کیونکہ میں نے اس کو کبھی ٹی وی یا انٹرنیٹ پر ریسلنگ دیکھتے ہوئے نہیں دیکھا تھا۔‘

انھوں نے مزید بتایا ’ندا خاموش طبیعت کی مالک لڑکی ہے، جھگڑالو نہیں ہے جو ہم سجھیں کہ اس لیے ہو سکتا ہے کہ ریسلنگ میں گئی ہو۔ جب وہ امریکہ جارہی تھی تو میں نے اس سے کہا تھا کہ تمھیں ریسلنگ کا شوق ہے اگر موقع ملے تو ریسلنگ میں حصہ لینا اور اس نے ایسا ہی کیا۔‘

اگست میں امریکہ پہچنے والی ندا جمالی کہتی ہیں کہ ریسلنگ امریکہ میں موسم سرما کا کھیل ہے اور اسی ماہ انھوں نے اپنی تیاری شروع کی اور اس کے بعد نومبر سے مقابلوں کا آغاز ہوا۔

’مجھے بچپن سے ریسلنگ کا شوق تھا لیکن امریکہ آنے سے قبل میں نے کوئی تربیت حاصل نہیں کی تھی۔ ہماری روزانہ ایک گھنٹہ ویٹ لفٹنگ اور دو گھنٹے کی ریسلنگ کی پریکٹس ہوتی ہے۔‘

ندا جمالی کا کہنا ہے کہ انھیں یقین نہیں تھا کہ وہ تین گولڈ میڈل حاصل کر لیں گی۔ اس کی وجہ وہ بتاتی ہیں کہ نئے ریسلر کے پاس تجربہ ہوتا ہے اور نہ ہی وہ اتنے ماہر ہوتے ہیں۔

’میں نے جن سے ریسلنگ کی وہ بچپن سے ریسلنگ کر رہے ہیں یعنی سات آٹھ سالوں سے لیکن میں محنت اور کوچنگ کی بدولت کامیاب ہو گئی۔‘

انھوں نے بتایا کہ بچپن سے وہ کھیلوں میں دلچسپی رکھتی تھیں لیکن ایسا کوئی واقعہ یاد نہیں ہے کہ کسی سے لڑائی ہوئی اور جس نے انھیں ریسلنگ کی طرف مائل کیا ہو۔

ندا جمالی انڈین اداکار عامر خان کی ریسلنگ پر مبنی فلم دنگل سے بھی متاثر ہیں۔

ریسلنگ

ندا جمالی نے امریکہ کی ریاست کیلیفورنیا میں 116 پاؤنڈ کی کیٹگری کی وومین ریسلنگ میں گولڈ میڈل حاصل کیے ہیں

وہ کہتی ہیں کہ گیتا کماری کی جو کہانی اور جدوجہد ہے وہ دنیا کی ہر گرل ریسلر کے لیے باعث کشش اور سبق آموز ہے۔

ڈبیلو ڈبلیو ای کے نامور ریسلرز ڈوین جانسن المعروف راک اور جان سینا ندا جمالی کے پسندیدہ ریسلرز ہیں، لیکن وہ راک کی ذاتی زندگی اور جدوجہد سے زیادہ متاثر ہیں۔

ندا کا کہنا ہے کہ انھوں نے کبھی راک یا جان سینا کا داؤ پیچ استعمال نہیں کیا۔

امریکہ میں ریسلر اپنے اپنے ریجن میں کوالیفائی کرتے ہیں وہاں سے اگلے درجے میں جاتے ہیں جس کے بعد وہ دیگر ریاستوں میں ریسلنگ کرتے ہیں۔

اس پورے عمل میں کئی سال لگ جاتے ہیں لیکن ندا جمالی کے پاس محدود وقت ہے کیونکہ وہ ایک سال کی فیلوشپ پر ہیں۔

انھوں نے کہا کہ یہ حقیقیت ہے کہ اگر وہ امریکہ نہ آتیں تو ریسلنگ کا یہ موقع نہیں ملتا۔

’پاکستان میں وومین ریسلنگ عام کھیل نہیں ہے تاہم پنجاب میں وومین ریسلنگ کے کچھ مواقع ہیں، سندھ میں میں نے کبھی وومین ریسلنگ اکیڈمی یا فیمیل ٹورنامنٹ کے بارے میں نہیں سنا ہے۔ ریسلنگ صرف یہ نہیں ہے کہ آپ مضبوط ہیں بلکہ یہ آپ کی شخصیت کے دیگر پہلووں کو اجاگر کرتی ہے۔‘

ندا جمالی کی ریسلنگ ٹیم نے ریسلنگ ہیمر بھی جیتا ہے جو پورا سال اس ٹیم کے پاس ٹرافی کے طور پر رہے گا۔

ندا جمالی سائنس دان بننے کا ارادہ رکھتی ہیں اور ان کا کہنا ہے کہ وہ سائنس اور فزیکل سپورٹس دونوں کو ساتھ لے کر چل سکتی ہیں کیونکہ وہ دونوں سے لطف اندوز ہوتی ہیں اس لیے دونوں میں سے کسی ایک کا انتخاب نہیں کر سکتیں۔


Facebook Comments - Accept Cookies to Enable FB Comments (See Footer).

بی بی سی

بی بی سی اور 'ہم سب' کے درمیان باہمی اشتراک کے معاہدے کے تحت بی بی سی کے مضامین 'ہم سب' پر شائع کیے جاتے ہیں۔

british-broadcasting-corp has 32290 posts and counting.See all posts by british-broadcasting-corp